مەملەكەت باسشىسى قاسىم-جومارت توقاەۆ قازاقستان حالقىنا ۇندەۋ جاريالادى.

بيىلعى جىل جان-جاقتى رەفورمالار مەن ناقتى وزگەرىستەر جىلىنا اينالدى.

ماۋسىم ايىندا وتكەن رەفەرەندۋمنىڭ ناتيجەسىندە بيلىك تارماقتارى اراسىندا ءتيىمدى تەپە-تەڭدىك ورنادى.

مەملەكەت «كۇشتى پرەزيدەنت – ىقپالدى پارلامەنت – ەسەپ بەرەتىن ۇكىمەت» قاعيداسىن بەرىك ۇستانادى.

ءماجىلىس پەن ءماسليحاتتار جاڭا ارالاس جۇيە بويىنشا جاساقتالادى.

دەپۋتاتتاردىڭ ءبىر بولىگى پارتيالىق تىزىممەن، قالعانى ءبىر مانداتتى وكرۋگتەن سايلانادى.

كونستيتۋتسيالىق سوت قۇرىلىپ، الداعى قاڭتار ايىنان جۇمىس ىستەي باستايدى.

ادام قۇقىقتارى جونىندەگى ۋاكىل ينستيتۋتى كونستيتۋتسيالىق مارتەبەگە يە بولدى.

بيلىكتىڭ بىرقاتار وكىلەتتىگى قايتا ءبولىنىپ، كەيبىر قۇزىرەتتەر پرەزيدەنتتەن پارلامەنتكە بەرىلدى.

ەندى وڭىرلەردىڭ اكىمدەرى بالامالى جولمەن تاڭدالادى.

كونستيتۋتسياعا جەر جانە ونىڭ قويناۋى حالىققا تيەسىلى دەگەن باپ ەنگىزىلدى.

مەن وسى ەرەجەنى جۇزەگە اسىرۋ ءۇشىن «ۇلتتىق قور – بالالارعا» دەگەن مۇلدە جاڭا باعدارلاما ۇسىندىم.

كونستيتۋتسيالىق رەفورما – مەن مەملەكەت باسشىسى بولىپ سايلانعاننان بەرى جۇزەگە اسىرىپ جاتقان اۋقىمدى ساياسي جاڭعىرۋ باعدارلاماسىنىڭ اجىراماس بولىگى.

وسى باعدارلاما اياسىندا بەيبىت جينالىستاردى وتكىزۋ ءۇشىن الدىن-الا ەسكەرتۋ ءتارتىبى ەنگىزىلدى.

ساياسي پارتيالاردى تىركەۋ ءراسىمى جەڭىلدەتىلىپ، تىركەۋدىڭ قاجەتتى شەگى تومەندەتىلدى.

سايلاۋ الدىنداعى پارتيالىق ءتىزىمدى جاساقتاۋ جانە  دەپۋتات مانداتتارىن ءبولۋ كەزىندە ايەلدەر مەن جاستار ءۇشىن 30 پايىزدىق كۆوتا ەنگىزىلدى.

ساياسي پارتيالاردىڭ ماجىلىسكە ءوتۋ شەگى 7-دەن 5 پايىزعا تومەندەدى.

سايلاۋ بيۋللەتەندەرىنە «بارىنە قارسىمىن» دەگەن باعان قوسىلدى.

پارلامەنتتىك وپپوزيتسيا ينستيتۋتى قۇرىلدى.

قىلمىستىق كودەكستىڭ 130-بابى قىلمىستىق دەپ تانىلمايتىن بولدى، 174-بابى ىزگىلەندىرىلدى. ءولىم جازاسى جويىلدى.

اۋىل اكىمدەرىن تىكەلەي سايلاۋ تاسىلدەرى ەنگىزىلدى. سونداي-اق باسقا دا كوپتەگەن تىڭ باستامالار جۇزەگە اسىرىلدى.

جالپى، سوڭعى ءۇش جىلدا جاسالعان وزگەرىستەر مەن كونستيتۋتسيالىق رەفورما مەملەكەتتىك-ساياسي قۇرىلىمنىڭ جاڭا ۇلگىسىن قالىپتاستىردى.

سوندىقتان مەن جولداۋىمدا سايلاۋ مەرزىمىن جاريا تۇردە جانە اشىق ايتتىم.

وسىلايشا، ءبىز باستى مەملەكەتتىك ينستيتۋتتار – پرەزيدەنت، پارلامەنت، ۇكىمەت جانە ءماسليحاتتاردىڭ ءبارىن بىرتىندەپ قايتا قۇرامىز.

وسى باستامالار جاريالانعاننان بەرى ءبىر ايعا جۋىق ۋاقىت ءوتتى.

بۇل – بارلىق ماسەلەنى بايىپپەن تالقىلاپ، جاعدايدى باعامداۋعا جەتكىلىكتى مەرزىم.

حالىق ءبىزدىڭ ساياسي جۇيەنى وزگەرتۋ تۋرالى جوسپارىمىزدىڭ ءمان-ماڭىزىن جاقسى ءتۇسىنىپ وتىر.

سوندىقتان مەن بۇعان دەيىن ايتىلعان سايلاۋدىڭ  مەرزىمىنە جانە اتا زاڭنىڭ تالاپتارىنا سايكەس، قازاقستان رەسپۋبليكاسى پرەزيدەنتىنىڭ كەزەكتەن تىس سايلاۋىن 2022 جىلعى 20 قاراشادا وتكىزۋ تۋرالى جارلىققا قول قويدىم.

وسى ناۋقان ەلدىڭ بۇكىل ساياسي جۇيەسىن تۇبەگەيلى وزگەرتەتىن سايلاۋ كەزەڭىن باستاپ بەرەدى.

سول ارقىلى ەكونوميكانى تۇراقتى دامىتۋدى، حالىقتىڭ ءال-اۋقاتىن ارتتىرىپ، تۇرمىس ساپاسىن جاقسارتۋدى كوزدەيتىن ۇزاق مەرزىمدى مىندەتتەردى جۇزەگە اسىرۋعا مۇمكىندىك تۋادى.

مەن جولداۋىمدا بىرقاتار اۋقىمدى الەۋمەتتىك-ەكونوميكالىق شارالار  قولعا الىناتىنىن جاريالادىم.

ءبىز ونىڭ ءبارىن جاقىن ارادا جۇزەگە اسىرۋىمىز كەرەك.

كوپ ۇزاماي قوعامعا سايلاۋ الدىنداعى تۇعىرنامامدى ۇسىنامىن.

وندا الەۋمەتتىك-ەكونوميكالىق دامۋدى كوزدەيتىن جاڭا باستامالار ايتىلادى.

مەن مەملەكەت باسشىسى رەتىندە سايلاۋ ناۋقانى قاتاڭ تۇردە زاڭعا سايكەس وتەتىنىنە كەپىلدىك بەرەمىن.

ونى وتاندىق جانە شەتەلدىك بايقاۋشىلاردىڭ قاتىسۋىمەن ءادىل ءارى اشىق وتكىزەتىن بولامىز.

بارشا ازاماتتارىمىزدى جاۋاپكەرشىلىگىن سەزىنىپ، دەموكراتيا، زاڭ جانە ءتارتىپ قاعيداتتارىن بەرىك ۇستانۋعا شاقىرامىن.

ەلىمىزدىڭ بىرلىگى مەن تۇتاستىعىن كورسەتە بىلەيىك.

حالقىمىزدىڭ تاعدىرى، قازاقستاننىڭ بولاشاعى ارقايسىمىزدىڭ قولىمىزدا.

ءبىز ادىلەتتى قازاقستاندى بىرگە قۇرامىز!

Abai.kz