قازاقستان ۋكراينانىڭ سەپاراتيستىك اۋماقتارىندا وتكەن رەفەرەندۋمدار تۋرالى ناقتى ۇستانىمىن ءبىلدىردى.

23 قىركۇيەكتە رەسەيلىك باسقىنشىلار باقىلاۋىنا العان ۋكراينانىڭ دونەتسك، لۋگانسك، حەرسون، زاپوروجە وبلىستارىندا «رەسەيگە قوسىلۋ تۋرالى» رەفەرەندۋمنىڭ باستالعانى تۋرالى جاريالاندى. الەمنىڭ وركەنيەتتى ەلدەرى بۇل رەفەرەندۋمداردا ەشقانداي ەرەجە ساقتالماي، قارۋلى ادامداردىڭ باقىلاۋىندا ءوتىپ جاتقانىن ايتىپ، ونى مويىنداۋدان باس تارتتى.

بۇگىن قازاقستاننىڭ سىرتقى ىستەر مينيسترلىگى دە ۋكراينا اۋماعىندا ءوتىپ جاتقان رەفەرەندۋمداردى مويىندامايتىنىن رەسمي مالىمدەدى.

«لحر مەن دحر دەپ ءوزىن-ءوزى جاريالاعان مەملەكەتتەردىڭ جانە زاپوروجە مەن حەرسون وبلىستارىنىڭ اسكەري اكىمشىلىكتەرىنىڭ رەسەيگە قوسىلۋ تۋرالى رەفەرەندۋمدار وتكىزۋىنە كەلەتىن بولساق، قازاقستان مەملەكەتتەردىڭ اۋماقتىق تۇتاستىعى، ولاردىڭ ەگەمەندىك تەڭدىگى جانە بەيبىت قاتار ءومىر ءسۇرۋ قاعيداتتارىن نەگىزگە الادى.

پرەزيدەنتىمىز بىرنەشە رەت، ونىڭ ىشىندە بۇۇ مىنبەرىنەن جاقىندا عانا سويلەگەن سوزىندە وسى دۇنيەجۇزىلىك امبەباپ ۇيىمنىڭ جارعىسىنا نەگىزدەلگەن حالىقارالىق قۇقىق قاعيداتىن بۇلجىتپاي ساقتاۋدىڭ ماڭىزدىلىعى تۋرالى مالىمدەدى. ءبىز ساياسي ديالوگ ورناتۋ ءۇشىن جان-جاقتى قولداۋ كورسەتۋگە دايىن ەكەنىمىزدى تاعى دا راستايمىز. بۇل رەتتە ەلىمىز تۇراقتىلىقتى وڭىرلىك ءارى جاھاندىق دەڭگەيدە ساقتاۋدى اسا ماڭىزدى مىندەت سانايدى»، - دەدى قر ءسىم رەسمي وكىلى ايبەك سمادياروۆ.

بۇعان دەيىن، پرەزيدەنت قاسىم-جومارت توقاەۆ سانكت-پەتەربۋرگتە وتكەن ەكونوميكالىق فورۋمدا قازاقستاننىڭ لۋگانسك پەن دونەتسكى ەگەمەندىگىن تانىمايتىنىن جەتكىزگەن بولاتىن.

«بىزدە بۇعان قاتىستى ءارتۇرلى پىكىر ايتىلادى... ەگەر حالىقتاردىڭ تاڭداعانى بولا بەرسە، الەمدە بۇۇ قۇرامىنا ەنەتىن 193 ەل ەمەس، جەر بەتىندە 500 نە، 600 ەل بولار ەدى. ارينە، بۇل حاوسقا اپارادى. سوندىقتان ءبىز تايۋاندى دا، كوسوۆانى دا، وڭتۇستىك وسەتيانى دا، ابحازيانى دا مويىندامايمىز. بۇل ءپرينتسيپتى لۋگانسك پەن دونەتسكتىڭ كۆازيمەملەتتىك قۇرىلىمىنا دا قولدانامىز»، - دەدى توقاەۆ.

ال، رەفەرەندۋم وتكىزۋشىلەر ءۇش كۇن ىشىندە قارۋمەن قورقىتىپ، رەفەرەندۋمعا قاتىستىرعان سايلاۋشىلارىنىڭ لۋگانسكىدە 76,09 پايىزى، دونەتسكىدە 77,12 پايىزى كەلدى دەپ جاريالاعان، سونىمەن رەفەرەندۋم وتكەن بولىپ ەسەپتەلمەك.

ايجان تەمىرحان

Abai.kz