ەۋروپالىق وداق رەسەيگە قاتىستى سانكتسيالاردىڭ سەگىزىنشى پاكەتىن جاريالادى. وسى پاكەت ءوزىن ارەڭ ۇستاپ تۇرعان رەسەي ەكونوميكاسىنا نوكاۋت سوققىسى بولۋى مۇمكىن. ءبىرشاما فاكتورلاردىڭ جيىنتىعى قوردالانا باستادى. جانە ول ءبىر كۇنى، ءتىپتى وسى جاڭا جىلعا دەيىن مىندەتتى تۇردە جارىلادى.

وسى سانكتسيا پاكەتىنىڭ ەكى اۋىر بابى بار.

ءبىرىنشى باعىت. رەسەي مۇنايىنىڭ باعاسى ليميتتەلدى. بۇل ەمبارگونىڭ (مۇلدە جاۋىپ تاستاۋ) جۇمساق ءتۇرى. كەدەي، ءۇشىنشى الەم ەلدەرى سورلاپ قالماسىن دەپ، تولىق ەمبارگو نەگىزىلمەدى. سپوتتىق نارىقتاردا يۋرالس باعاسى باررەلىنە 40-60 دوللاردان اسپاۋى ءتيىس جانە تەڭىزبەن ءۇشىنشى ەلدەرگە تاسىمالدانعاندا وسى شارت قاداعالاناتىن بولادى. ونىڭ الدىندا رەسەي پرەزيدەنتى پۋتين مۇناي ليميتتەلسە، ەشكىمگە ەشتەڭە ساتپايتىنىن مالىمدەگەن بولاتىن. ەشكىمگە ەشتەڭە ساتپاۋ - رەسەيدى ۆاليۋتالىق تۇسىمنەن ايىرادى.

ەكىنشى باعىت. رەسەي ازاماتتارىنا ەۋرووداق كريپتوامياندار اشۋعا، ۇستاۋعا تيىم سالىپ وتىر. رەسەيلىكتەر شەتەلگە اقشا اۋدارۋدىڭ، الۋدىڭ، تابىس تابۋدىڭ سوڭعى كوزىنەن ايرىلماق. بۇعان دەيىن USDT ولاردىڭ سوڭعى ءۇمىتى بولىپ كەلگەن ەدى. ەندى 6 ساعاتتىڭ ىشىندە ولار ەۋرووداق ەلدەرىندە اشىلعان كريپتوامياندارىن جاۋىپ، ودان اقشالارىن شىعارىپ الۋى ءتيىس. ونىڭ ءوزى وڭاي بولمايدى.

ەۋرووداق سەگىزىنشى پاكەتتەن رەسەي ەكونوميكاسى جىلىنا 7 ميلليارد ەۆرو جوعالتادى دەگەن پىكىردە.

سەگىزىنشى پاكەت كەلمەي تۇرىپ، تاعى ءبىر قۇبىلىسقا نازار اۋدارعان بولاتىنبىز. رەسەيدە دە ۇلتتىق ءال-اۋقات قورى بار. ول قور وسى قىركۇيەكتە 777 ميلليارد رۋبل جوعالتقان. قازىر ونىڭ كولەمى 10,79 تريلليون رۋبل نەمەسە 187,9 ميلليارد دوللار. بۇدان الىپ بولىپ كورىنەتىن رەسەيدىڭ بار قورجىنى ءبىزدىڭ ۇلتتىق قوردان نەبارى 3 ەسەگە ارتىق ەكەنىن كورۋگە بولادى جانە ونىڭ ءوزى اي سايىن قىسقارۋدا.

وعان قوسا، رەسەيدىڭ كەلەسى جىلعى بيۋدجەتى دەفيتسيتتى بولماق. رەسەي سوڭعى 10 جىلدا بيۋدجەت پروفيتسيتىنە (تابىس شىعىننان ارتىق) قول جەتكىزىپ جۇرگەن ەدى. ەندى دەفيتسيت الداعى 2025 جىلعا دەيىن سوزىلادى دەپ بولجانادى جانە ونى جابۋ ءۇشىن رەسەي تەك ىشكى نارىقتان قارىز الماق. سىرتتان وعان ەشكىم قارىز بەرمەيدى.

رەسەي پروبلەمالارىنىڭ العاشقى سيگنالىن بۇگىن بەلارۋس باسشىسى لۋكاشەنكونىڭ اۋزىنان ەستىدىك. ول ەلدە باعالاردى وسىرۋگە تيىم سالدى. بىراق نارىق زاڭى لۋكاشەنكونى تىڭدامايتىنى انىق. جانە ءبارىن كەرىسىنشە ىستەيتىن بولادى، ال نارىقتاردا اجيوتاج جۇرمەك. بەلارۋس ەلىندە ينفلياتسيا 17 پايىزدان اسىپ بارادى. ال رەسەيدە سوڭعى 4-5 ايدا بايقالعان دەفلياتسيا اياقتالىپ، قايتادان ينفلياتسيا باستالدى.

بۇل جاعدايدا رەسەيگە رۋبل باعامىن قۇلدىراتۋ تىعىرىقتان شىعۋدىڭ ءبىر امالى بولۋى مۇمكىن. ەكونوميكالىق بەلسەندىلىكتىڭ تومەندەۋىنە موبيليزاتسيا اسەر ەتەتىن بولادى. كوپتەگەن كومپانيا قىزمەتكەرلەرى سوعىسقا شاقىرتۋ الدى، شامامەن 500 مىڭنان استام جۇمىسقا جارامدى ەركەك ەلدەن قاشىپ كەتتى جانە وزىمەن بىرگە جيعان-تەرگەن رۋبلدەرىن الىپ كەتتى. سوعىسقا بارعاندار سول ۋاقىتقا كرەديت تولەمەيتىن بولادى، ال ولگەندەرىنىڭ كرەديتتەرى بانك ەسەبىنەن كەشىرىلەدى. رەسەي بانكتەرى ءۇشىن بيىلعى جىل اۋىر اياقتالاتىن ءتۇرى بار.

بۇل قازاقستان ءۇشىن رەسەيمەن يمپورت/ەكسپورت وپەراتسيالارىنىڭ زاڭدى قىسقارۋىنا اكەلىپ سوقسا، ەۋرازيالىق ەكونوميكالىق وداق تەك قاعاز جۇزىندە جۇمىس ىستەمەك. بىزگە تەك جاعدايدى باقىلاپ وتىرۋ عانا بۇيىرىپ تۇر. بىراق اقىرىن كۇتپەي، رەسەيدىڭ ازىق-تۇلىك يمپورتىن قىتاي، ءۇندىستان مەن وزبەكستان باعىتتارىنا قاراي بۇرا بەرۋ ءجون بولاتىن سياقتى.

ايبار ولجاەۆ

Abai.kz