قازىرگى كۇندە مەملەكەتتىك دەڭگەيدەگى تورقالى تويلار مەن توپىراقتى ءولىمنىڭ دە ساياسيلانىپ كەتكەنى بەلگىلى. ەليزاۆەتا پاتشايىممەن قوشتاسۋ ازا جيىنىنا اعىلشىن بيلىگى رومانوۆتار اۋلەتىمەن قۇداندالى بايلانىسى بولسا دا، ورىس باسشىلارىن شاقىرمادى. بىراق جىلدا كەلەتىن ءپۋتيننىڭ تۋعان كۇنى بيىل دا اتاۋسىز قالعان جوق.

ارينە، كەڭەستىڭ شەكپەنىنەن شىققان رەسپۋبليكا باسشىلارى كوش باستادى. بىرەۋى قاۋىننان تاۋ تۇرعىزدى، جوقتى قايدان تاپسىن، بىرەۋى ءوزىنىڭ برەندى بولعان تراكتورىن ۇسىندى دەگەندەي... پرەزيدەنت توقاەۆتىڭ سىيلىعى ءتىپتى، ەرەكشە بولدى. ورىس ءتىلىن دامىتاتىن حالىقارالىق ۇيىم قۇرۋدى ۇسىندى. ەل باسشىسىنىڭ باستاماسىن سىيلىق دەگەننەن گورى، كوڭىل جۇباتۋ دەسەك دۇرىس بولعانداي. ءپۋتيننىڭ "كەڭەس وداعىن قالپىنا كەلتىرۋ", "رۋسسكي مير" يدەياسى كوز الدىندا كەلمەسكە كەتىپ بارا جاتىر. وزىمىزگە تانىس ورتاعا قاراعاندا باتىستىڭ ايدىك پۋتينگە تارتقان سىيى ءتىپتى، وزگەشەلەۋ بولدى.

باسقاسىن ايتپاعان دا ششۆەيتساريا عىلىم اكادەمياسى نوبەل سىيلىعىنىڭ بەيبىتشىلىك نوميناتسياسىن بەلورۋس، ۋكراينا جانە رەسەيدىڭ ديكتاتورلىق رەجيمگە قارسى قوعامدىق ۇيىمدارىنا بەردى.

ءوزىن پەتر پاتشا سانايتىن پۋتينگە بۇل ساياسي سوققى بولعانى انىق. قىرىم كوپىرىندەگى جارىلىس ءتىپتى، ونى ەسەڭگىرەتىپ كەتتى دەسە دە بولادى. مەدۆەدەۆ قىرىم كوپىرىنە شابۋىل جاسالسا، كرەملدىڭ يادرولىق قارۋ قولدانۋعا ءماجبۇر بولاتىنىن ايتىپ، سەس كورسەتىپ ەدى. ءپۋتيننىڭ ەڭ جاقىن، ەڭ سەنىمدى ادامدارىنىڭ باقىلاۋىنداعى ساياسي، ستراتەگيالىق ماڭىزى بار نىساننىڭ كۇزەتى ەل ماقتاعانداي بولماي شىقتى. ءپۋتيننىڭ 20 جىلدان بەرگى وزىنە ادال جاقتاستارىنان قالانعان تاس قامال بيلىك پراميداسىنىڭ ىشىنە سۋ جۇگىردى. ءىس جۇزىندە قاۋقارسىز ەكەنىن انىق كورسەتتى.

قازاق بيلىگى ارمانداعانداي پۋتين ورىس ءتىلىن دامىتۋ حالىقارالىق ۇيىمىن قۇرىپ، جالعاستى "رۋسسكي ءميرىن" ارمانداي ما، جوق اتوم قارۋىمەن جاھاندى ءدۇر سىلكىنتە مە، وعان كوز جەتكىزۋگە از-اق ۋاقىت قالدى.

ەسبول ۇسەنۇلى

Abai.kz