قىرىم كوپىرىنىڭ ورتەنۋى رەسەي ءۇشىن باسقا وقيعالاردان ەرەك بولدى. بۇل ۋكراينا جەرىندەگى رەسەي اسكەرىنىڭ جاعدايى مۇشكىل ەكەنىن كورسەتتى. رەسەي بيلىگىنىڭ سيمۆولىنا اينالعان بۇل كوپىر رەسەي پرەزيدەنتى ءۇشىن قاسيەتتى سانالاتىن.

رەسەيدىڭ ۋكراينا جەرىندە ابىرويىنان ايىرىلۋ تىزبەگى جالعاسسا ءتۇستى. اۋەلى حاركوۆ وبلىسىنداعى ۋكراينا قارۋلى كۇشتەرىنىڭ بۇرىن-سوڭدى بولماعان شابۋىلىنا دەيىن «موسكۆا» فلاگماندىق كرەيسەرىنىڭ وپاتى، سودان كەيىن ۋكراين اسكەرى وڭتۇستىك پەن شىعىستاعى ەكى ءساتتى شابۋىل جاسادى، اقىرىندا كوپىردىڭ جانۋىنا جەتتى.

ۋكرايناداعى سوعىستا السىرەگەن ورىستار وزدەرىنە قاۋىپتى سۇراقتار قويا باستادى: پۋتين قۇلاۋى مۇمكىن بە؟ وسى تاقىرىپتا  «ۆاشينگتون پوست» سوڭعى نومىرلەرىنىڭ بىرىندە اۋقىمدى اناليتيكالىق ماقالا جاريالادى. ماقالا قىرىم كوپىرى قۇلاعانعا دەيىن جاريالانعان بولاتىن.

لوندون ۋنيۆەرسيتەتى سلاۆيان جانە شىعىس ەۋروپالىق زەرتتەۋلەر مەكتەبىنىڭ پروفەسسورى مارك گاللەوتتي: «رەسەيدە قازىر جاعدايدىڭ قيىن ەكەنىن تۇسىنەتىن ادامدار كوپ. ولار ءپۋتيننىڭ ەندىگى جارامسىز ەكەنىن بىلەدى. بىراق پراگماتيكالىق، كلەپتوكراتيالىق رەسەيلىك ەليتا ءۇشىن پۋتينگە قارسى شىعۋ قاۋىپتى»،-دەيدى.

بەلگىلى رەسەيلىك ساراپشى، Agentura.ru سايتىنىڭ نەگىزىن قالاۋشى اندرەي سولداتوۆ تا:  «ادامدار وتە اشۋلى، بىراق بۇل ولاردىڭ ارەكەت ەتۋگە دايىن ەكەنىن بىلدىرمەيدى»، - دەيدى.

«پۋتين ءوزىنىڭ اينالاسىنا تەك «ءيا» دەيتىن ادامداردى عانا جينادى»، - دەدى كارنەگي قورىنىڭ وكىلى ەندريۋ ۆايس.

پۋتين ءبىر-ءبىرىن جەك كورەتىن بىراق ءبىر-بىرىنە تاۋەلدى، وزىنە عانا ادال ادامدارمەن اينالاسىن مۇقيات قورشادى. ادامدار وعان قانشالىقتى تاۋەلدى بولسا، ول ءوزىن سوعۇرلىم كۇشتى دەپ سانايدى، بىراق اقىر سوڭىندا بۇل بۇكىل جۇيەنىڭ تولىقتاي كۇيرەۋىنە اكەلەدى.

ۋكرايناداعى «ارنايى اسكەري وپەراتسيانىڭ» بارلىق جەتى ايى – 24 اقپانداعى باسقىنشىلىقتان باستاپ «جارتىلاي» موبيليزاتسياعا دەيىنگى كەزەڭ ءدال وسىلاي ەكەنىن كورسەتەدى. وقيعالاردىڭ جىلدام ءجۇرىپ جاتقانى سونشا، «باسىڭدى يۋ مەن ءۇنىڭدى شىعارماۋ» ستسەناريى ەڭ قاۋىپتى بولۋى مۇمكىن. ونىڭ ۇستىنە، قازىر ءپۋتيننىڭ ۋكرايناعا وتە جاقسى كورەتىن كوپىرىنىڭ جارىلعانى ءۇشىن قانداي «جاۋاپ» بەرەتىنىن ەشكىم بىلمەيدى.

رەسەي كونستيتۋتسياعا سايكەس، پرەزيدەنت وتستاۆكاعا كەتكەن جاعدايدا ونىڭ ورنىن پرەمەر-مينيستر ميشۋستين باسادى. ول باتىس ءۇشىن جامان ەمەس باسشى بولار ەدى. بىراق سوڭعى ايلاردا پۋتين ونى جاسىرىپ ۇستاعانى سونشا، ونىڭ جوسپارلارى مەن امبيتسيالارى تۋرالى ەشتەڭە بەلگىسىز.

ونىڭ قاسىندا بەلگىلى ساياساتتانۋشى سولوۆەي مەن اشىق لوببي جاسايتىن ماسكەۋ مەرى سوبيانين بار. ول رەسەي استاناسى كوپتەگەن ەۋروپالىق مەگاپوليستەردىڭ ستاندارتتارىنان اسىپ تۇسكەندە، ماسكەۋدى ءومىر سۇرۋگە لايىقتى ورىنعا اينالدىرعان پراگماتيك، تەحنوكرات.

سونىمەن قاتار، ءسوبيانيننىڭ مەدۆەدەۆتەن ايىرماشىلىعى، ەشقاشان «اسكەري وپەراتسيا» دەپ جۇلقىنا سويلەگەن ەمەس، باتىستى اتوم بومباسىمەن قورقىتقان جوق. مۇمكىن مۇراگەرلەر قاتارىنا قاۋىپسىزدىك كەڭەسىنىڭ حاتشىسى نيكولاي پاترۋشەۆ تە كىرەر.

ول باتىستىڭ كوڭىلىنەن شىعۋى ەكىتالاي، دەگەنمەن كەيبىر قۇپيا دەرەككوزدەردىڭ ايتۋىنشا، پاترۋشەۆ مىرزا باتىس ساياساتكەرلەرىمەن سەنىمدى ادامدارى ارقىلى كەلىسسوزدەر جۇرگىزۋگە تىرىسادى ەكەن.

مۇراگەرلەر تىزىمىنە ەنۋى مۇمكىن ادامدار ىشىندە رەسەي اۋىل شارۋاشىلىعى ءمينيسترى دميتري پاترۋشەۆ تە بار. امەريكالىق Politico باسىلىمى ونى ءپۋتيننىڭ 12 مۇراگەرىنىڭ قاتارىنا قوسىپ قويىپتى.

كەرىمسال جۇباتقانوۆ

Abai.kz