بۇگىن ماجىلىستە «قازاقستان رەسپۋبليكاسىنىڭ كەيبىر زاڭنامالىق اكتىلەرىنە جىلجىمايتىن مۇلىكتىڭ بىرىڭعاي مەملەكەتتىك كاداسترى شەڭبەرىندە مەملەكەتتىك كورسەتىلەتىن قىزمەتتەردى تسيفرلاندىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» قازاقستان رەسپۋبليكاسى زاڭىنىڭ جوباسى قارالدى. 

«بۇگىندە جەر ءۇشىن، ول جەردەگى جىلجىمايتىن مۇلىك ءۇشىن بولەك مەملەكەتتىك اكت بەرىلەدى. ەندىگى ۋاقىتتا ەكەۋى بىرىكتىرىلىپ ءبىر عانا مەملەكەتتىك اكت بولادى. اتالعان جاڭاشىلدىق جۇيەنى، سالانى دامىتۋ ءۇشىن قابىلدانىپ وتىر. ويتكەنى حالىقارالىق تاجىريبە بويىنشا جەر مەن جىلجىمايتىن مۇلىك بىرگە جۇرەدى. مىسالى، نيدەرلاند، وڭتۇستىك كورەيا جانە كوپتەگەن ەلدەردە كاداسترلىق تولقۇجات ءاردايىم جەر جانە جىلجىمايتىن مۇلىكپەن بىرگە بولادى. مەنىڭ ويىمشا، كاداسترلاردى بىرىكتىرۋ ءتيىمدى. سونداي-اق ازاماتتار ءۇشىن قۇقىقتىق جانە جەر كاداسترى تۋرالى، قوعامدىق كاداسترلىق كارتاداعى جىلجىمايتىن مۇلىك وبەكتىلەرى تۋرالى اقپاراتتىڭ اشىقتىعى مەن قولجەتىمدىلىگىن قامتاماسىز ەتەدى»، - دەدى قر تسيفرلىق دامۋ، يننوۆاتسيالار جانە اەروعارىش ونەركاسىبى ۆيتسە-ءمينيسترى اسەت تۇرىسوۆ ءماجىلىس وتىرىسىندا.

ۆيتسە-ءمينيستردىڭ مالىمدەۋىنشە، جاڭا مەملەكەتتىك كاداسترلىق كارتا ارقىلى بوس جەر ۋچاسكەلەرى تۋرالى اقپارات الۋعا بولادى.

«وسى كارتادا وزىڭىزگە ۇناعان جەر ۋچاسكەسىن تاڭداپ، زاڭناماعا سايكەس بۇل جەردى اۋكتسيونعا شىعارۋ ءۇشىن ءوتىنىم بەرۋگە باستاماشىلىق جاساي الاسىز. سودان سوڭ «ەلەكتروندى ۇكىمەتتەگى» جەكە كابينەتىڭىزگە حابارلاما كەلەدى. وسىلايشا بوس جەر ۋچاسكەلەرىن الۋ بويىنشا اشىقتىق پەن قولجەتىمدىلىك ارتا تۇسەدى»، - دەيدى ول.

Abai.kz