پارتيالىق ەمەس بايقاۋ ورتالىعى 20 قاراشادا وتەتىن پرەزيدەنت سايلاۋىندا بارلىق سايلاۋ ۋچاسكەسىنە بايقاۋشىلارىن جىبەرمەك. بۇل تۋرالى اتالعان ورتالىقتىڭ توراعاسى تولەگەن كۇنادىلوۆ ايتتى.

«وڭىرلەردە رەسپۋبليكالىق دەڭگەيدە احۋال شتابتارىن قۇردىق. ول جەردە بارلىق بايقاۋشىلار پۋلىن وقىتۋ ءىس-شاراسى جۇرگىزىلىپ جاتىر. قازىرگى تاڭدا 80-نەن استام ونلاين جانە وفلاين فورماتتا وقىتۋ جۇرگىزىلدى. سايلاۋ ناۋقانىنىڭ كۇردەلى ەكەنىن جاقسى بىلەمىز. سوندىقتان وسى ناۋقاندا تاجىريبەلى، بايقاۋشى رەتىندەگى قۇقىقتارى مەن مىندەتتەرىن تۇسىنەتىن ادامدارعا ارقا سۇيەيمىز. بۇل سايلاۋدى شىنايى باعالاۋعا مۇمكىندىك بەرەدى. 20 قاراشا كۇنى ەلىمىزدەگى بارلىق سايلاۋ ۋچاسكەسىنە بايقاۋشىلارىمىزدى جىبەرۋگە نيەتتى بولىپ وتىرمىز»، - دەدى ول ەلوردادا ۇيىمداستىرىعان بريفينگ بارىسىندا.

ونىڭ اتاپ وتۋىنشە، وتكەن اپتادا ورتالىق پرەزيدەنتتىككە كانديداتتاردىڭ شتاب جەتەكشىلەرىمەن كەزدەسۋ ۇيىمداستىرعان. وندا ۇگىت-ناسيحات جۇمىستارى كەزىندە قوعامدىق مونيتورينگ جۇرگىزۋ، سايلاۋ كۇنى بارلىق ۋچاسكەدە سايلاۋ ۇردىستەرىن باقىلاۋ ماسەلەلەرى بويىنشا پىكىر الماسۋ بولعان.

سونداي-اق ورتالىق توراعاسى پرەزيدەنتتىك سايلاۋدى بايقاۋعا كەلەتىن تمد، ەقىۇ جانە باسقا دا حالىقارالىق ۇيىمداردىڭ ميسسيا وكىلدەرىمەن كەزدەسۋلەر جوسپارلانعانىن دا اتاپ ءوتتى.

Abai.kz