قازاق ءتىلىن قورلاعان كاسىپكەر راميل مۋحورياپوۆتىڭ ۇستىنەن قىلمىستىق ءىس قوزعالدى. بۇل تۋرالى جۋرناليست كۇلتەگىن اسپانۇلى ءوزىنىڭ Facebook پاراقشاسىندا جاريالادى.

«ال، دوستار، راميل مۋحورياپوۆتىڭ مالىمدەمەسىنە قاتىستى ارىز بويىنشا قىلمىستىق ءىس قوزعالدى. الماتى قالاسىنىڭ پوليتسيا دەپارتامەنتى ەكسترەميزمگە قارسى ءىس-قيمىل باسقارماسى 20 قازاندا قر باس پروكۋراتۋراسى مەن الماتى قالاسىنىڭ پروكۋراتۋراسىنا تۇسىرگەن ارىزىما قىلمىستىق ءىس اشقانى جايلى جاۋاپ بەرىپتى.

الماتى ق. پد ەقىسب باستىعىنىڭ مىندەتىن اتقارۋشى د.ە.ابيكۋلوۆ قول قويعان حاتقا سەنسەك، پد تەرگەۋ باسقارماسىنىڭ قر قىلمىستىق كودەكسىنىڭ 174-بابىنىڭ (“الەۋمەتتىك، ۇلتتىق، رۋلىق، ناسىلدىك، تەكتىك-توپتىق نەمەسە ءدىني الاۋىزدىقتى قوزدىرۋ”) 1-بولىگىمەن سوتقا دەيىنگى تەرگەپ-تەكسەرۋدى باستاعان.

“تەرگەلىپ جاتقان قىلمىستىق ءىس شەڭبەرىندە پسيحولوگيالىق-فيلولوگيالىق ساراپتاما تاعايىندالدى، ونىڭ ناتيجەلەرى بويىنشا پروتسەسسۋالدىق شەشىم قابىلداناتىن بولادى”، - دەيدى ابىقۇلوۆ.

بۇل ايىپتىڭ جازاسى زاڭدا ءۇش نۇسقادا كوزدەلگەن: 2 مىڭ-7 مىڭ اەك ايىپپۇل، 2-7 جىل ارالىعىندا باس بوستاندىعىن شەكتەۋ نەمەسە ايىرۋ. ايىپتى دەپ تانىلسا، سوت ءمان-جايدى ەسەكەرە وتىرىپ وسى ۇشەۋىنىڭ بىرەۋىن تاڭدايدى”،-دەپ جازدى جۋرناليست.

ايتا كەتەيىك، بۇعان دەيىن Chocofamily حولدينگىنىڭ باسشىسى راميل مۋحورياپوۆ الماتى قالاسىندا رەسەيلىكتەرمەن وتكەن جيىندا «قازاق تىلىندە سويلەۋ – مادەنيەتسىزدىكتىڭ بەلگىسى» دەگەندى ايتقان. ونىڭ ءسوزى قازاقستاندىقتاردىڭ اشۋ-ىزاسىنا ءتيىپ، قوعامدىق رەزونانس تۋدىردى. كەيىن مۋحورياپوۆ ءوز ءسوزى ءۇشىن كەشىرىم سۇرادى.

«جاڭا قازاقستان» دەپۋتاتتار توبى دا كاسىپكەردىڭ ءسوزىن تەكسەرۋ كەرەكتىگىن ايتىپ، باس پروكۋرور بەرىك اسىلوۆقا حات جولداعان بولاتىن. دەپۋتاتتار باس پروكۋروردان مۋحورياپوۆقا قر قىلمىستىق كودەكسىنىڭ 174-بابى بويىنشا (“الەۋمەتتىك، ۇلتتىق، رۋلىق، ناسىلدىك، تەكتىك-توپتىق نەمەسە ءدىني الاۋىزدىقتى قوزدىرۋ”) شارا قولدانۋدى سۇرادى.

Abai.kz