قاراشا حالىقتىڭ وتانشىلدىق، ۇلتشىلدىق سەزىمىن ءورشىتۋ ءۇشىن سىرتتان جاۋ ويلاپ تابۋ – ساياسي تەحنولوگتاردىڭ كانىگى ءتاسىلى. جاۋىڭنىڭ دەڭگەيى قانشالىقتى جوعارى بولسا، ونىڭ اسەرى دە جويقىن بولماق. كەڭەس وداعى ىدىراعاننان كەيىن، ەكونوميكاسى كەرى كەتىپ، ىشكى جالپى ءونىم قۇنى قىتايدىڭ ءبىر عانا گۋاڭدۇڭ ولكەسىمەن قارايلاس بولىپ قالسا دا، كرەملدىڭ ناتو مەن اقش-تى باستى جاۋى ساناپ، اتتان تۇسسە دە، ۇزەڭگىدەن تۇسپەي كەلە جاتقانىنىڭ سىرى سوندا جاتىر.

جاۋىنىڭ مىقتىلىعى ەل ازاماتتارىنىڭ مەنمەن كەۋدەسىنە جەل بەرۋ ءۇشىن عانا ەمەس، بيلىگى جالتاق وسال مەملەكەتتەردى تۇقىرتۋ ءۇشىن دە كەرەك. ورىستىڭ بودانى بولعان ورتا ازيا ەلدەرىنىڭ ەل ىشىندە ساياسي تۇراقسىزدىق ورىن العاندا «سىرتقى ارانداتۋشى كۇشتەردىڭ اسەرىنەن بولدى»، كىم ەكەنىن ناقتىلاماي، «كوكەمىز ايتتى عوي» دەگەندەي ەكى ۇشتى جاۋاپ ايتاتىنى دا سوندىقتان. الدەقاشان تۇقىمى قۇرىپ كەتكەن جوڭعارلارمەن شابىسۋدان شارشاعان قازاق قاۋىمىنىڭ ارقالى اقىنىنىڭ زەلەنسكيدى باتىستىڭ قۋىرشاعى سانايتىن ءپۋتيننىڭ «بابۋشكالار وتريادىنىڭ» قاتارىن تولىقتىرىپ جۇرگەنىنە دە كۋا بولدىق.

ناتو مەن اقش ۇگىت-ناسيحاتقا يمانداي سەنگىش جۇرت ويلاعانداي قاۋىپتى مە، رەسەيدىڭ ىرگەسىنە كەلىپ، «حالقىڭدى شاۋىپ، جەرىڭدى باسىپ الام...» دەپ كىجىنىپ تۇر ما؟! جاۋابى بىرەۋ عانا: جوق! كەرىسىنشە ورىس حالقى قاراداي جەك كورەتىن باتىس – ورىس شەنەۋنىكتەرى مەن ولليگارحتارىنىڭ بۇل دۇنيەدەگى جانناتى. وعان باسقا ايعاقتاردى ايتپاعاندا، حان سارايداي ياحتالارى دالەل.

پۋتين ۋكرايناعا سوعىس اشقالى بەرى ناتو-عا مۇشە ەلدەردىڭ ورىس بايلارىنىڭ وننان استام سالتاناتتى ياحتالارىن تارتىپ العانى بەلگىلى. اتاپ ايتقاندا، يتاليا اندرەي مەلنيچەنكونىڭ قۇنى 578 ميلليون دوللار تۇراتىن ياحتاسىن، فرانتسيا يگور سەچيننىڭ 120 ميلليون دوللارلىق ياحتاسىن، يسپانيا سەرگەي چەمەزوۆتىڭ 153 ميلليون دوللار تۇراتىن ياحتاسىن، گەرمانيا اشىشەر وسمانوۆتىڭ ۇزىندىعى 156 مەترلىك قۇنى 600 ميلليون دوللار تۇراتىن ياحتاسىن تاركىلەگەن. بۇل ياحتالاردىڭ بىرەۋىنىڭ عانا جىلدىق شىعىنى 100 ميلليون دوللاردان اسادى ەكەن. ورىس بايلارى «الەمدىك ەكىنشى اسكەري دەرجاۆا ليدەرى» دەپ اسپەتتەلگەن ءپۋتيننىڭ وزدەرىنىڭ حالىقتان تىققان بايلىعىنا كەپىل بولا المايتىنىنا كوزدەرى جەتىپ، تىلدەرىن تىستەپ، سانكتسياعا ىشتەي كونىپ، ءالىپتىڭ ارتىن باعىپ وتىر. ىشتەرىندە ياحتاعا دەگەن ماحابباتى ەلدەن بولەكتەرى دە بار ەكەن.

ءپۋتيننىڭ «ارناۋلى سوعىس وپەراتسياسىنان»، موبليزاتسيادان قاشقان ورىس ازاماتتارى سياقتى ميللياردەر اندرەي مورداشوۆتىڭ قۇنى 500 ميلليون دوللارلىق ۇزىندىعى 142 مەتر، 6 قاباتتى، ەكى تىكۇشاق قاتار قوناتىن، الەمدە الدىنعى وندىققا كىرەتىن «Nord» ياحتاسىنىڭ سەرگەلدەڭ بولىپ جۇرگەگىنە 8 اي. مورداشوۆقا امەريكا، انگليا، ەۋرووداق ەلدەرى اقپاننىڭ 28 كۇنى سانكتسيا جاريالادى. ىلە-شالا قۇنى 71 ميلليون دوللارلىق كىشى ياحتاسىن يتاليا تاركىلەدى. وزىنە تىقىر تاياعانىن سەزگەن مورداشوۆ تا قاراپ جاتپاعان. ونىڭ جانىنداي كورەتىن «Nord» ياحتاسى GPS جۇيەسىن ءوشىرىپ، شىعىس افريكاداعى ارال مەملەكەت سەيگەلدىڭ ۆيكتوريا پورتىنان سۋىت ءجۇرىپ، ۆلاديۆوستوكتان ءبىر-اق شىققان. ءوز جەرىندە دە تۇراقتاي الماي، مامىر ايىندا وڭتۇستىك كورەيانىڭ فۋسان پورتىنا كىرىپ اڭىس اڭداپ، قايتا كەرى قايتقان. قازاننىڭ بەسىندە جاپون تەڭىزى ارقىلى گونكونگ پورتىنا كەلگەنى انىق بولدى. ساياسي ايتىس-تارتىستاردان كەيىن، ول جەردە دە ەكى-اق اپتا قونالقىلاپ، وڭتۇستىك افريكانىڭ كەيپتاۋىنىنا كەلىپ، ۋاقىتشا تۇرۋعا رۇقسات العانى ءمالىم بولدى.

موبليزاتسيادان قاشقان ورىس ازاماتىنا جان قايعى بولسا، ءپۋتيننىڭ ارقاسىندا بايىعان مورداشوۆقا ياحتاسى، بايلىعى – مال قايعى بولىپ تۇر. ايدىك ورىس ءپاتريوتيزىمىنىڭ، ناقتىلاپ ايتقاندا ءشوۆنيزمنىڭ جەتكىزگەن جەرى وسى بولدى.

ەسبول ۇسەنۇلى

Abai.kz