اتىراۋدا قولونەرشىلەردىڭ حالىقارالىق «شەبەرFEST-2026» فەستيۆالى باستالدى. سۇلتان بەيبارىس الاڭىندا كيىز ءۇي ۇلگىسىندەگى تاقىرىپتىق ايماقتار ۇيىمداستىرىلىپ، ناعىز شەبەرلەر شاھارىنا اينالدى.

فەستيۆالگە قازاقستان، رەسەي، قىرعىزستان مەن وزبەكستاننان كەلگەن 100-گە جۋىق ساندىك-قولدانبالى ونەر شەبەرى قاتىسۋدا. ولار كيىزدەن جاسالعان بۇيىمدار مەن زەرگەرلىك اشەكەيلەردەن باستاپ، اعاش ويۋ، ۇلت اسپاپتارى، توقىما جانە ەتنوديزاين باعىتىنداعى 4000-عا جۋىق اۆتورلىق ەڭبەگىن كوپشىلىك نازارىنا ۇسىندى.

مەرەكەگە قاتىسقان وبلىس اكىمى سەرىك شاپكەنوۆ كورمەنى ارالاپ، ۇلتتىق قولونەردى ساقتاۋ مەن دارىپتەۋدىڭ ماڭىزىن اتاپ ءوتتى.

– حالىق قولونەرى – ۇلتتىڭ جانى مەن بولمىسىن ايقىندايتىن اسىل مۇرا. ودان اتا-بابادان رۋحاني قۇندىلىقتار كورىنىس تابادى. اتىراۋ ءوڭىرى – تاريحى تەرەڭ، مادەنيەتى باي ايماق. حالىق شەبەرلەرىن قولداپ، ۇلتتىق ونەردى جاس ۇرپاققا كەڭىنەن ناسيحاتتاۋعا ارنالعان حالىقارالىق دەڭگەيدەگى فەستيۆالدىڭ ءبىزدىڭ ولكەمىزدە ءوتۋى — ايماقتىڭ مادەني ومىرىندەگى ەلەۋلى وقيعا، – دەدى س. شاپكەنوۆ.

ۇلتتىق مەرەكە رۋحىن ەتنو-دەفيلە، ءداستۇرلى تاعامدار كورمەسى مەن قازاقتىڭ ۇلتتىق ويىندارى ودان ءارى ايشىقتاي ءتۇستى.

فەستيۆال جەرگىلىكتى ونەرپازداردىڭ كونتسەرتتىك باعدارلاماسىمەن جالعاسادى. كەشتىڭ باستى قوناعى – قازاقستاندىق ءانشى BAYANSULU.

«شەبەرFEST-2026» حالىقارالىق قولونەرشىلەر فەستيۆالى 23 مامىر كۇنى دە مازمۇندى باعدارلامالارمەن جالعاسادى. فەستيۆال قوناقتارىن ەتنوجارمەڭكە، شەبەرلەرمەن ەركىن سۇحبات، ۇلتتىق قولونەر تۇرلەرىنەن شەبەرلىك ساعاتتارى كۇتەدى. كيىز باسۋ، الاشا توقۋ، زەرگەرلىك بۇيىم جاساۋ، قىش قۇمىرا دايىنداۋ، اعاش جانە تەرى وڭدەۋ ونەرى كوپشىلىككە تانىستىرىلىپ، ءار بۇيىمنىڭ تاريحى مەن ەرەكشەلىگى باياندالادى. ۇلتتىق ونەر مەن مادەني مۇرانى دارىپتەيتىن ەرەكشە ءىس-شارا سۇلتان بەيبارىس الاڭىندا وتەدى.

Abai.kz