بيىل اتىراۋ وبلىسىنا شەتەلدەن 252 وتباسى كەلىپ قونىستاندى. بۇل تۋرالى اتىراۋ وبلىسىنىڭ وڭىرلىك كوممۋنيكاتسيالار قىزمەتى حابارلادى.

"بيىل اتىراۋ وبلىسىنا شەتەلدەن 252 وتباسى قونىس اۋداردى. ەلىمىزگە ورالعان بارلىق وتانداستارىمىزعا قانداس مارتەبەسى بەرىلدى", - دەدى شەتەلدىك جۇمىس كۇشىن تارتۋ جانە كوشى-قون ءبولىمىنىڭ باسشىسى مەيرامبەك الدياروۆ

بۇل مارتەبەنى 311 ادام العانى اتاپ ءوتىلدى. تاۋەلسىزدىك العاننان بەرى اتىراۋعا بارلىعى 15 مىڭنان استام ەتنيكالىق قازاق ورالدى.

"ەلگە ورالعان ەتنيكالىق قازاقتارعا وسىندا قالىپ، ازاماتتىعىن الۋ ءۇشىن قانداس مارتەبەسى ءبىر جىلعا بەرىلەدى. ەگەر وسى كەزەڭدە ولار قر ازاماتتىعىن الۋعا ۇلگەرمەگەن جاعدايدا، مارتەبەنى ءبىر مارتە التى ايعا ۇزارتۋ كوزدەلگەن. بۇگىنگى تاڭدا تۇرعىن ءۇي كەزەگىندە 43 قانداس تىركەلگەن", - دەدى الدياروۆ.

Abai.kz