بۇگىن ەلىمىزدىڭ بارلىق ايماعىندا كەزەكتەن تىس پرەزيدەنتتىك سايلاۋعا داۋىس بەرۋ ءوتىپ جاتىر. تاڭعى ساعات 8.00 جاعداي بويىنشا، ەلدە 10 033 سايلاۋ ۋچاسكەسى اشىلعان، شەتەلدە قازاقستان رەسپۋبليكاسىنىڭ وكىلدىكتەرى جانىنداعى 17 ۋچاسكەدە داۋىس بەرۋ باستالدى. 

استانا ۋاقىتى بويىنشا اقتوبە، اتىراۋ، باتىس قازاقستان، قىزىلوردا جانە ماڭعىستاۋ وبلىستارىندا سايلاۋ ۋچاسكەلەرى ساعات 8.00 اشىلعان. الماتى، استانا جانە شىمكەنتتە 86 ۋچاسكە تاڭەرتەڭگى ساعات 6.00 اشىلدى. ەلدە 12 ملن-عا جۋىق ادامنىڭ داۋىس بەرۋ قۇقىعى بار.

پرەزيدەنتتىككە كانديداتتار ۋچاسكەلەرگە كەلىپ، ءوز داۋىستارىن بەرىپ جاتىر. ونىڭ ىشىندە استاناداعى وقۋشىلار سارايىندا ورنالاسقان №58 سايلاۋ ۋچاسكەسىندە داۋىس بەرگەن قاسىم-جومارت توقاەۆ، «ناز» مەملەكەتتىك بي تەاترى عيماراتىندا قۇرىلعان №189 سايلاۋ ۋچاسكەسىندە داۋىس بەرگەن نۇرلان اۋەسباەۆ، استانادا تۇركىستان كوشەسىندە ورنالاسقان 396 سايلاۋ ۋچاسكەسىنە كەلىپ داۋىس بەرگەن جيگۋلي دايراباەۆ، ەلورداداعى 38-ءشى كوشە بويىنداعى №135 سايلاۋ ۋچاسكەسىندە داۋىس بەرگەن قاراقات ابدەن بار.

استانا قالاسىنداعى №111 سايلاۋ ۋچاسكەسىندە تمد-عا مۇشە مەملەكەتتەردىڭ پارلامەنتارالىق اسسامبلەياسىنىڭ ءبىر توپ بايقاۋشىسى داۋىس بەرۋ بارىسىن باقىلاپ وتىر. ولاردىڭ ايتۋىنشا، ازىرگە ەشقانداي زاڭبۇزۋشىلىق انىقتالماعان.

«سايلاۋ ۋچاسكەلەرىندە تاڭەرتەڭنەن مەرەكەلىك كوڭىل-كۇي بايقالادى. داۋىس بەرۋشىلەردىڭ بەلسەندىلىگى بايقالادى. تاڭەرتەڭ ءبىز سايلاۋ ۋچاسكەسىنە كەلگەندە ادامداردىڭ قاراسى كوپ بولدى. بۇل ازاماتتىق بەلسەندىلىكتىڭ بەلگىسى. سايلاۋ ۋچاسكەلەرى قازاقستان رەسپۋبليكاسىنىڭ زاڭنامالارى مەن حالىقارالىق ستاندارتتارعا سايكەس جۇمىس ىستەپ جاتىر. سايلاۋ الدىندا ۋچاسكەلەر رەسمي تۇردە اشىلىپ، ءانۇران ورىندالدى. داۋىس بەرۋ ۋاقىتىلى باستالدى»، - دەيدى تمد-عا مۇشە مەملەكەتتەردىڭ پارلامەنتارالىق اسسامبلەياسىنىڭ حالىقارالىق بايقاۋشى ديلرابو مانسۋري.

ونىڭ ايتۋىنشا، سايلاۋ ۋچاسكەسىندە ازىرگە زاڭبۇزۋشىلىق انىقتالعان جوق.

«داۋىس بەرۋ كابينالارى تارتىپكە ساي ۇيىمداستىرىلعان. سونىمەن قاتار مۇمكىندىگى شەكتەۋلى جانە مۇگەدەك جاندارعا دا جاعداي جاسالعان. سايلاۋدى سوڭىنا دەيىن باقىلايمىز»، - دەيدى ول.

اتالعان سايلاۋ ۋچاسكەسىنە داۋىس بەرۋگە كەلگەن مەملەكەتتىك كەڭەسشى ەرلان قارين سايلاۋ بارىسىن وتاندىق بايقاۋشىلاردان باسقا، 600-دەن استام حالىقارالىق بايقاۋشى قاداعالاپ وتىرعانىن ايتتى.

«بۇگىن وتە ماڭىزدى كۇن. ءار ازامات ءوزىنىڭ كونستيتۋتسيالىق قۇقىعىن پايدالانىپ، داۋىس بەرە الادى. ءوز بولاشاعىمىز جانە ەل بولاشاعىندا جاقسى وزگەرىستەر كەرەك دەسەك، سايلاۋعا بەلسەنە قاتىسۋىمىز قاجەت. سايلاۋ ەلىمىزدىڭ بولاشاقتاعى دامۋ باعدارىن انىقتايدى. بۇگىنگى ناۋقانعا ەل ىشىندە سونىمەن قاتار شەتەلدە دە قىزىعۋشىلىق جوعارى. سايلاۋ بارىسىن 600-دەن استام حالىقارالىق بايقاۋشى قاداعالاپ جاتىر. ودان بولەك، وتاندىق بايقاۋشىلار بار»، - دەدى ەرلان قارين باق وكىلدەرىنىڭ سۇراعىنا جاۋاپ بەرە تۇرىپ.

ونىڭ ايتۋىنشا، بيىلعى سايلاۋدا قوعام بەلسەندى.

«بۇگىن داۋىس بەرۋ ارقىلى اركىم ءوز تاڭداۋىن جاسايدى. بۇل ەلىمىزدىڭ بولاشاق دامۋى ءۇشىن ماڭىزدى. سايلاۋ – مەملەكەتتىڭ دامۋىنا وزگەرىستەر اكەلەتىن مۇمكىندىك. سوندىقتان ازاماتتاردى سايلاۋعا بەلسەنە قاتىسۋعا شاقىرامىن»، - دەيدى ول.

سەنات توراعاسى ماۋلەن اشىمباەۆ استانا قالاسىنداعى №111 سايلاۋ ۋچاسكەسىندە داۋىس بەردى. ونىڭ ايتۋىنشا، سايلاۋدىڭ ءادىل ءارى اشىق وتۋىنە بارلىق جاعداي جاسالعان.

«بۇگىنگى كۇن ەلىمىز ءۇشىن ماڭىزدى، پرەزيدەنت سايلاۋى ءوتىپ جاتىر. سايلاۋ ەلىمىزدىڭ الداعى دامۋىنىڭ باعىت-باعدارىن ايقىندايدى. ءبىزدىڭ ەلىمىز ءۇشىن سوڭعى جىلدارى وڭاي بولمادى. پاندەميا ەل ەكونوميكاسى مەن حالقىمىزعا اۋىر ءتيدى. كوروناۆيرۋستى ءبارىمىز بىرگە ەڭسەردىك. بيىل الماتىداعى قاڭتار وقيعاسى ءبارىمىزدىڭ قابىرعامىزدى قايىستىردى. قازىر الەمدەگى گەوساياسي جاعداي ۋشىعىپ تۇر. دەگەنمەن قيىندىقتارعا قاراماستان قازاقستان حالقىنىڭ بىرلىگى مىقتى»، - دەدى ماۋلەن اشىمباەۆ.

ايتا كەتەيىك، ەل بويىنشا سايلاۋعا بارلىعى 10 101 ۋچاسكە ىسكە قوسىلادى، سايلاۋشىلار تىزىمىنە 11 950 485 ازامات ەنگىزىلدى. قازاقستان رەسپۋبليكاسىنىڭ شەت مەملەكەتتەردەگى وكىلدىكتەرى جانىنان 53 ەلدە 68 سايلاۋ ۋچاسكەسى قۇرىلدى.

Abai.kz