سەيسەنبى, 31 قاڭتار 2023
بيلىك 1098 2 پىكىر 29 قاراشا, 2022 ساعات 14:18

«اشىق قازاقستان 500+» كوشى-قون ساياساتىنىڭ جاڭا تۇجىرىمداماسى بەكىتىلدى

بۇگىن قر ۇكىمەتى وتىرىسىندا «اشىق قازاقستان 500+» اتتى كوشى-قون ساياساتىنىڭ جاڭا تۇجىرىمداماسى بەكىتىلدى.

«تۇجىرىمداما كوشى-قون پروتسەستەرىن بارىنشا ءتيىمدى رەتتەۋ ءۇشىن ازىرلەندى. قۇجاتتا دەموگرافيالىق، ەكونوميكالىق جانە الەۋمەتتىك-مادەني باسىمدىقتاردىڭ بارلىعى ەسكەرىلگەن. قازاقستان ەكونوميكاسىنا جوعارى بىلىكتى مامانداردى، ينۆەستيتسيا، وزىق تەحنولوگيالاردى تارتۋ ءۇشىن تۇجىرىمداما جوباسىندا ۆيزالاردىڭ جاڭا تۇرلەرىن ەنگىزۋ كوزدەلىپ وتىر. ونداي ۆيزالار جەتەكشى عالىمدارعا، وقىتۋشىلارعا، شىعارماشىلىق جانە ءبىزدىڭ نارىقتا اسا قاجەت ماماندىق يەلەرىنە بەرىلەدى»، - دەدى پرەمەر-مينيستر ءاليحان سمايىلوۆ.

ونىڭ اتاپ وتۋىنشە، الەۋەتتى ينۆەستورلارعا قويىلاتىن تالاپتار دا قايتا قارالادى. ءىرى ينۆەستورلارعا 10 جىل مەرزىمگە تۇرۋعا رۇقساتى بار ينۆەستورلىق ۆيزا بەرىلەدى.

ۇكىمەت وتىرىسىندا ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا جاڭا باستامالاردى تاراتىپ ايتتى. ونىڭ سوزىنشە شەتەلدىك ۇزدىك عالىمدارعا 10 جىلعا «عىلىمي-پەداگوگيكالىق ۆيزا» بەرىلەدى.

ءمينيستردىڭ ايتۋىنشا، «اشىق قازاقستان 500+» اتتى كوشى-قون ساياساتىنىڭ جاڭا تۇجىرىمداماسىنىڭ ءبىرىنشى باعىتى – قازاقستاندى وڭىرلىك ءبىلىم بەرۋ حابىنا اينالدىرۋدى كوزدەيتىن ءبىلىم بەرۋ يمميگراتسياسى. بۇل باعىتتاعى جۇمىس جوعارى وقۋ ورىندارىنىڭ پروفەسسور-وقىتۋشىلار قۇرامىن كۇشەيتۋگە جانە ءبىلىم بەرۋ ساپاسىن ارتتىرۋعا ارنالعان. ول ءۇشىن 100 ۇزدىك وقىتۋشى مەن سۇرانىسقا يە تەحنولوگيالار بويىنشا عالىمداردى قازاقستانعا تارتۋ ۇسىنىلادى.

«بۇل ساناتتاعى كادرلارعا ون جىلدىق «عىلىمي-پەداگوگيكالىق ۆيزا» بەرۋدىڭ وڭايلاتىلعان ءتارتىبىن ەنگىزۋ كوزدەلىپ وتىر. سونىڭ نەگىزىندە ولارعا قازاقستاندا تۇراقتى تۇرۋ ءۇشىن ىقتيارحات الۋ، ودان كەيىن ازاماتتىق الۋ مۇمكىندىكتەرى قاراستىرىلادى. ءدال وسىنداي مۇمكىندىكتى تاپشى ماماندىقتار بويىنشا وقيتىن شەتەلدىك ستۋدەنتتەر قاتارىنان ماگيسترانتتار مەن باكالاۆرلارعا دا بەرۋ قاراستىرىلعان»، - دەدى تامارا دۇيسەنوۆا.

«سونداي-اق، ازاماتتاردى ەڭبەك كۇشى جەتپەيتىن وڭىرلەرگە كوشىپ بارۋىن ىنتالاندىرۋ دا تۇجىرىمدامانىڭ نەگىزگى مىندەتتەرىنىڭ ءبىرى بولىپ تابىلادى. بۇل رەتتە كوشىپ بارعانداردى باسپانامەن، الەۋمەتتىك ينفراقۇرىلىممەن جانە جۇمىسپەن قامتاماسىز ەتۋ الدىن-الا پىسىقتالادى»، - دەدى ول. جاڭا تۇجىرىمدامادا شەتەلدەگى قازاقتار جايى دا قاراستىرىلعان. اتاپ ايتقاندا قانداستارىمىزعا 10 جىلدىق جەڭىلدەتىلگەن ۆيزا راسىمدەپ، قازاقستاندا ءوز كاسىبىن جۇرگىزۋگە مۇمكىندىك بەرىلەدى.

«بۇل باعىتتا نەگىزگى ەكى ماسەلە بار. ءبىرىنشىسى – شەتەلدە تۇراتىن ەتنيكالىق قازاقتاردىڭ الەۋەتىن پايدالانۋ. وسى ماقساتتا «اتا جولى» كارتاسىن ەنگىزۋ ۇسىنىلادى. بۇل قۇجات جوعارى دەڭگەيدەگى كاسىبي مامان نەمەسە وزدەرى تۇراتىن ەلدەردە تابىستى بيزنەس-كەيستەردى ىسكە اسىرعان جانە ولاردى قازاقستاندا جۇزەگە اسىرۋعا ىقىلاستى قازاقتارعا بەرىلەتىن بولادى»، - دەدى ول.

ونىڭ اتاپ وتۋىنشە، مۇنداي ازاماتتار 10 جىلدىق جەڭىلدەتىلگەن ۆيزا راسىمدەپ، قازاقستاندا ءوز كاسىبىن جۇرگىزۋگە مۇمكىندىك الادى.

«ولاردى تاريحي وتانىن دامىتۋعا قوسقان ۇلەسى ءۇشىن جىل سايىنعى «پارىز» بايقاۋى اياسىندا پرەزيدەنت سىيلىعىمەن ماراپاتتاۋدى ۇسىنىپ وتىرمىز. ەكىنشى – ەلگە كەلەتىن قانداستاردىڭ كوشى-قونىن رەتتەۋ تەتىكتەرىن جەتىلدىرۋ. ياعني، ەلىمىزدەگى دەموگرافيالىق جانە ەكونوميكالىق ۇردىستەردى ەسكەرە وتىرىپ، قۇجاتتاردى راسىمدەۋدىڭ العاشقى كەزەڭىندە قانداستاردى ەڭبەك كۇشى تاپشى وڭىرلەرگە قونىستانۋعا قوسىمشا ىنتالاندىرۋ ۇسىنىلادى»، - دەدى تامارا دۇيسەنوۆا.

ۇكىمەت باسشىسى تاعى ءبىر ماڭىزدى ماسەلە – ول شەتەلدە جۇمىس ىستەيتىن قازاقستاندىقتاردىڭ قۇقىعىن قورعاۋ ەكەندىگىنە نازار اۋدارتتى.

«وتانداستارىمىزعا زاڭگەرلىك جانە كونسۋلتاتسيالىق كومەك كورسەتىلەدى. ول ءۇشىن قازاقستاندىقتار ءجيى بارىپ، جۇمىس ىستەيتىن ەلدەرمەن ەكىجاقتى كەلىسىمدەر جاسالادى. قاي ەلدە ەڭبەك ەتسە دە، ءبىز ءوز ازاماتتارىمىزدى قورعاي الۋىمىز كەرەك»، - دەدى پرەمەر-مينيستر.

 

Abai.kz

2 پىكىر

ۇزدىك ماتەريالدار

انىق-قانىعى

جاقيانوۆ: ماعان اشىق جالا جابۋعا كىرىستى...

عالىمجان جاقيانوۆ 3252
ايقاي

ەلدە ۇلتتىق يدەولوگيا وتە ءالسىز...

بەيسەنعازى ۇلىقبەك 1968