پرەزيدەنتتىڭ ۇلىقتاۋ ءراسىمى وتكەن سوڭ – قازىر قازاقستاندا دە يۋرە، دە فاكتو مەملەكەت باسشىسى بار دەگەن ءسوز. ال بىراق كوپ جەرلەردە، ءتىپتى اكىمدەردىڭ كابينەتتەرىندە، مەكتەپتەردە، ورتا، جوعارى وقۋ ورىندارىندا، ءتۇرلى جيىندار وتەتىن زالداردىڭ تورىندە، كوشەلەردە ءالى كۇنگە ن.نازارباەۆتىڭ پورترەتتەرى مەن بيلبوردتارى ءىلۋلى تۇر. ونىڭ نە قاجەتى بار ەندى؟

راس، 2019 جىلعى 20-ناۋرىزدان 2022 جىلعى 6-قاڭتارعا دەيىن ەلدە قوس بيلىك ورىن الىپ تۇرعان شاقتا ق.ك.توقاەۆ امالسىز «نازارباەۆتىڭ پورترەتتەرى ورىندارىندا قالا بەرسىن!» دەگەن نۇسقاۋ بەرۋگە ءماجبۇر بولعان. ال حالىق ەكس-ەلباسىنىڭ پورترەتتەرى قالا بەرۋىن قالامايدى! ول پورترەتتەر «ەسكى قازاقستاندى» ەسكە تۇسىرەدى. «جاڭا قازاقستانعا» دەگەن سەنىمدى جويادى.

نازارباەۆ – ەلدىڭ بولاشاعى ەمەس، وتكەن شاعى. وتكەن شاعى بولعاندا دا تۇرمىستان، قيىندىقتان سانسىراعان حالىقتىڭ ءوزىن سول حالگە دۋشار قىلعان سۇيكىمسىز باسشى رەتىندە ۇناتپايتىن، جەك كورەتىن ەلباسىعا اينالدى. جاڭاوزەندە، پاۆلوداردا ونىڭ بەينەسى سالىنعان بيلبوردتار ورتەلگەنى ەستە. قاسىرەتتى قاڭتاردا قازاق حالقى سونىڭ بيلىگىنە قارسى ۇلت-ازاتتىق كوتەرىلىسىنە شىعۋعا ءماجبۇر بولدى. وتىز جىلدىق بيلىگىندە وتىرىكتى سۋداي ساپىردى، ساياسي يميتاتسيا مەن ەكونوميكالىق كوزبوياۋشىلىقتى مەملەكەتتىك ۇستانىم دارەجەسىنە كوتەردى. ۇلتتىق مەملەكەتتىلىگىمىزدى دامىتۋدىڭ ورنىنا ازاماتتىق مەملەكەتكە اينالدىرۋعا تىرىستى.

نازارباەۆ پەن ونىڭ وتباسىنىڭ، جاقىن سىبايلاستارىنىڭ ەكونوميكالىق قىلمىستارى شاش ەتەكتەن. ولاردى جالعاننىڭ جارىعىنا شىعاراتىن، ىشكەن-جەگەندەرىن قۇسقىزاتىن كەز الىس ەمەس.

سوندىقتان نازارباەۆتىڭ پورترەتتەرى بارلىق جەرلەردەن الىنسىن! حالىقپەن كەلىسىلمەي اتى بەرىلگەن كوشەلەرگە الاش ارداقتىلارىنىڭ اتى قويىلسىن! بيۋستتەرى، ەسكەرتكىشتەرى لەنين مەن كالينين تۇراتىن تاريحي-مازاق مۇيىستەرىنە كوشىرىلسىن! 20 مىڭ تەڭگەلىك بانكنوتتان ەكس-ەلباسىنىڭ سۋرەتى الىنىپ تاستالعانى سياقتى نازارباەۆتىڭ اتى مەن بەينەسى بۇكىل قازاق ەلىندە وستراكيزمگە ۇشىراتىلسىن!

مارات ءبايدىلداۇلى

Abai.kz