7 قاراشا كۇنى الماتىداعى «تسەزار» كينوتەاترىندا رەسەيدىڭ باسقىنشىلىق ارەكەتىن اقتايتىن «روسسيا. نام 30 لەت» اتتى فيلم كورسەتىلدى. ءفيلمدى تمد ەلدەرىنىڭ «ەۋرازيا.doc» دەرەكتى فيلمدەر فەستيۆالىنىڭ تۇساۋكەسەرىنە وراي كورسەتكەن كورىنەدى.

رەسەيلىك «تۋىندىنى» كورسەتۋگە №132 مەكتەپتىڭ مۇعالىمى 8-ءشى ورىس ءتىلدى سىنىپتىڭ وقۋشىلارىن الىپ كەلگەن. مۇعالىمنىڭ ايتۋىنشا، ولاردى مەكتەپ ديرەكتورى وسىندا جىبەرگەن.

ال الماتى قالاسىنىڭ ءبىلىم باسقارماسى «ازاتتىققا» بەرگەن جاۋابىندا: «№ 132 گيمنازيا وقۋشىلارىنا اتالعان ءفيلمدى كورسەتۋگە باسقارما رۇقسات بەرگەن جوق»، - دەپ اقتالعان.

«جوعارىدا ايتىلعان جايتتارعا بايلانىستى № 132 گيمنازيا ديرەكتورى ك.ا. ابدىماناپوۆاعا ءوز مىندەتىن دۇرىس اتقارماعانى ءۇشىن تارتىپتىك ايىپپۇل سالىنادى، ياعني سوگىس بەرىلەدى...»، - دەدى الماتى قالاسىنىڭ ءبىلىم باسقارماسى وكىلدەرى. ءبىلىم باسقارماسىنداعى شەنەۋنىكتەردىڭ ايتۋىنشا، الماتىدا № 132 گيمنازيانىڭ 8ب جانە 8ۆ سىنىپ وقۋشىلارىنا رەسەي تۋرالى فيلم كورسەتىلگەن.

ولاردىڭ سوزىنشە، رەسەيدىڭ الماتىداعى باس كونسۋلدىعى جانە «روسسوترۋدنيچەستۆو» اگەنتتىگىنىڭ قازاقستانداعى وكىلدىگى ولارعا تاعى ەكى ءفيلمنىڭ كورسەتىلىمىنە قاتىسۋدى ۇسىنعان. ءبىرىنشى فيلم – «روسسيا. نام 30 لەت»، ەكىنشىسى – «زەمليا بولشيح كوشەك» دەپ اتالادى. ەكىنشىسى رەسەي مەن قىتاي اۋماعىندا بارىستار پوپۋلياتسياسىن قالپىنا كەلتىرۋ جونىندە باياندايدى.

«روسسوترۋدنيچەستۆو» رەسەي پرەزيدەنتى پۋتينگە تىكەلەي قارايتىنىن ۇمىتپايىق. بۇل ۇيىم 2008 جىلى دميتري مەدۆەدەۆتىڭ باستاماسىمەن قۇرىلعان بولاتىن.

«ەۋرازيا.doc» دەرەكتى فيلمدەر فەستيۆالىنىڭ ديرەكتورى ۆالەري شەحوۆتسوۆ «ۋكراينا-رەسەي سوعىسى ءجۇرىپ جاتقان كەزدە، رەسەيدىڭ «باتىرلارىن» دارىپتەيتىن ءفيلمدى قازاقستاندىقتاردىڭ نارازىلىعىنا قاراماستان قازاقستاندا كورسەتكەن دۇرىس پا؟» دەگەن arbat.media ءجۋرناليسىنىڭ سۇراعىنا: «اركىمنىڭ ءوز پىكىرى بار، ونى بىلدىرۋگە دە قۇقىعى بار. بىراق مەنىڭ پىكىرىم: رەسەي بۇرىننان بار، قازىر دە ءومىر ءسۇرىپ جاتىر، بولاشاقتا دا جاساي بەرەدى. رەسەيدىڭ ءار كەزەڭدە، ءار داۋىردە، ءتىپتى ەڭ قيىن كەزدەرى دە ءوز باتىرلارى بولدى»، - دەپ جاۋاپ بەرگەن. ونىڭ ايتۋىنشا، فيلم «رەسەيدىڭ ماڭگى بولۋى» تۋرالى ماعىنانى بەرەدى ەكەن.

فيلمدە جارىلىستاردىڭ، لاڭكەستىك ارەكەتتىڭ كادرلارى بار، سونداي-اق كەيىپكەرلەر قىرىمنىڭ رەسەيگە قوسىلعانىنا قۋانىشىن جاسىرماي، ءتىپتى وڭتۇستىك وسەتيانىڭ رەسەي قۇرامىندا بولعانىن ماقتان تۇتاتادى.

فەستيۆال ديرەكتورى قىرىمنىڭ ءىس جۇزىندە رەسەي فەدەراتسياسىنىڭ بولىگى ەكەنىن جانە بۇل تۋرالى كونستيتۋتسيادا بەلگىلەنگەنىن اتاپ ءوتتى.

«قىرىمدا رەفەرەندۋم بولدى، حالىق رەسەيگە قوسىلۋدى تاڭدادى»، - دەيدى ول.

ايتا كەتەيىك، پرەزيدەنت توقاەۆ قازاقستان وڭتۇستىك وسەتيانى دا، لحر، دحر-دا مويىندامايدى دەپ ايتقان بولاتىن.

«ەۋرازيا.doc» دەرەكتى فيلمدەر فەستيۆالىن وتكىزۋگە «تۇران» ۋنيۆەرسيتەتى مەن «تسەزار» كينوتەاترى قولداۋ بىلدىرگەن.

رەسەيدىڭ ۋكرايناعا باسقىنشىلىق سوعىس جاساپ وتىرعان ۋاقىتىندا، رەسەيدىڭ يمپەرلىك امبيتسياسىن ناسيحاتتايتىن ءفيلمدى قازاقستاندا مەكتەپ وقۋشىلارىنا كورسەتۋگە شەحوۆتسوۆ سياقتىلار قالاي رۇقسات الىپ وتىر؟ وقۋ-اعارتۋ ءمينيسترى اسحات ايماعامبەتوۆتەن جاۋاپ كۇتەمىز.

ايجان تەمىرحان

Abai.kz