ارقانكەرگەن شەكارا بەكەتىندە 15 ادامدى ءولتىردى دەگەن ايىپپەن 2012 جىلى ءومىر بويىنا سوتتالعان ۆلاديسلاۆ چەلاح قازاقستان پرەزيدەنتى قاسىم-جومارت توقاەۆقا حات جازدى. بۇل تۋرالى Abai.kz ازاتتىق راديوسىنا سىلتەمە جاساپ حابارلايدى.

چەلاح توقاەۆتان تەرگەۋ پروتسەسىن قايتا باستاپ، وزىنەن "جالعىز كۋاگەر رەتىندە" جاۋاپ الۋدى سۇرايدى.

"قۇرمەتتى پرەزيدەنت، كوپ جىل وتسە دە قايعىلى وقيعا جايلى قايتا ايتۋعا دايىنمىن. مەنىڭ بار سۇرارىم، مەنى تىڭداپ، ماعان مۇمكىندىك بەرسەڭىزدەر. قالاي بولعانىن ايتقىم كەلەدى جانە ءبارىن ايتۋعا دايىنمىن. تەرگەۋشىلەرگە دە ءبارىن ايتۋعا دايىنمىن. وقيعانىڭ قالاي بولعانى سول كۇيى اشىلماي قالدى" دەپ جازعان چەلاح پرەزيدەنتكە حاتىندا.

ول حاتىندا شەكارا بەكەتىنە "شابۋىل جاسالعانى جايلى" جازعان، سونداي-اق، سوت كەزىندە دە وسى نۇسقانى ايتقانىمەن، سوت ونىڭ ءسوزىن قاراستىرماعان.

تۇرمەدەن جازىلعان حاتتى ازاتتىققا چەلاحتىڭ تۋىستارى بەردى. جاقىندارىنىڭ سوزىنشە، چەلاح حاتىن پرەزيدەنتكە ەلەكتروندى تۇردە جىبەرگەن. حات قاڭتاردا قارالاتىنى كورسەتىلگەن.

چەلاح پرەزيدەنتكە قايىرىلعان حاتىندا "جاساماعان قىلمىسى ءۇشىن" ءومىر بويىنا قامالعانىن جازادى. ول بۇۇ ادام قۇقىعى كوميتەتىنىڭ قازاقستان بيلىگىن چەلاحقا قورعانۋعا مۇمكىندىك جاساۋدى ۇسىنعان شەشىمىن دە ەسكە سالعان.

2012 جىلى 30 مامىردا الماتى وبلىسىنداعى ارقانكەرگەن شەكارا بەكەتىنىڭ ورتەنگەن ورنىنان 14 شەكاراشى مەن ءبىر قورىقشىنىڭ ءمايىتى تابىلعان. ءتىرى قالعان جالعىز شەكاراشى ۆلاديسلاۆ چەلاحتىڭ ۇستىنەن قىلمىستىق ءىس قوزعالىپ، 2012 جىلعى جەلتوقساندا سوت ونى ءومىر بويى باس بوستاندىعىنان ايىرعان.

چەلاحقا قىلمىستىق كودەكستىڭ "ەكى جانە ودان كوپ ادامدى ءولتىرۋ", "جەكە زاتتاردى ۇرلاۋ", "قۇپيا قۇجاتتاردى ۇرلاۋ", "قارۋ ۇرلاۋ" جانە "زاڭسىز قارۋ ۇستاپ ءجۇرۋ" ءتارىزدى بارلىعى توعىز باپ بويىنشا ايىپ تاعىلعان.

2017 جىلى قاراشادا بۇۇ-نىڭ ادام قۇقىعى كوميتەتى قازاقستاننىڭ ازاماتتىق جانە ساياسي قۇقىقتار تۋرالى حالىقارالىق پاكتىنىڭ 14-بابىن بۇزىپ، چەلاحتى ءوز ءىسىن ء"ادىل جانە بەيتاراپ سوتتا قاراۋ قۇقىعىنان ايىردى" دەگەن ۇيعارىم شىعارعان. كوميتەتكە شاعىمدى ونىڭ ادۆوكاتى سەرىك سارسەنوۆ (ول 2018 جىلى ناۋرىزدا قايتىس بولعان) دايىنداعان.

كەيىنگى 10 جىلدا قوعامدا ارقانكەرگەن وقيعاسىنا قاتىستى سىرتتان شابۋىل، كونترابانديستەر، تەرروريستىك توپ سياقتى ءارتۇرلى بولجامدار ايتىلعان. ءتىپتى بۇل قانتوگىستى كۇش قۇرىلىمدارى اراسىنداعى باسەكەمەن بايلانىستىرعاندار دا بولعان. ول كەزدە (28 مامىر – شەكاراشىلار كۇنى) زاستاۆاعا جاقىن ماڭداعى اڭشىلىق شارۋاشىلىعىنا جوعارى شەندى تۇلعالار دەمالىسقا بارعان، ولاردىڭ اراسىندا كيكىلجىڭ تۋىپ، ونىڭ سوڭى قانتوگىسكە ۇلاسقان دەگەن نۇسقا دا بار.

Abai.kz