ورىس تەلە ەفيرى سوڭعى جىلدارى قازاقستانعا قاباق شىتۋدى، اشىق پروۆوكاتسيالىق مالىمدەمەلەر جاساۋدى، قازاقستاننىڭ تاۋەلسىزدىگىنە شەك ەلتىرىپ، ەلى مەن جەرىنە كوز الارتۋدى جيىلەتتى. بۇرىندارى جيرينوۆسكي، ليمونوۆ سەكىلدىلەردىڭ اۋزى كوبىكتەنىپ، سوعىس شاقىرىپ سويلەگەن سوزدەرىن جىلىنا ءبىر-ەكى رەت ەستىپ تۇرۋشى ەدىك. قازىر ايىنا، ءتىپتى، اپتاسىنا قازاقستانعا قاراتا نەشە ءتۇرلى سوزدەر ايتىلۋدا.

رەسەي پرەزيدەنتى ۆلاديمير ءپۋتيننىڭ «ءتاپسىرشىسى» دميتري پەسكوۆ: «بۇل كرەملدىڭ پوزيتسياسى ەمەس، ال ساياساتكەرلەردىڭ اۋزىنا ءبىز قاقپاق بولا المايمىز»، - دەپ قۇتىلاتىندى شىعاردى.

انە، كۇنى كەشە عانا رەسەيدىڭ مەملەكەتتىك تەلەارناسىنان ەۆگەني ساتانوۆسكي دەگەن ساياساتشى تاعى سويلەدى. سويلەگەندە دە: «قازاقستانمەن سوعىسامىز. قاقتىعىس ءسوزسىز بولادى»، - دەدى.

سوزبە-ءسوز: «قازاقستانداعى اقش-تىڭ بيوزەرتحانالارى جايلى ءبىز ۇمىتىپ كەتە بەرەمىز. العاشقىدا، كۇلىپ ەدىك. سەنبەپ ەدىك. اقش قازاقستاندا بيوزەرتحانا اشۋى مۇمكىن ەمەس دەدىك. سويتسەك، ۋكرايناداعى سەكىلدى، قازاقستاندا دا 2 اسكەري بيوزەرتحانا بار ەكەن. ول اقش-تىكى. سوندىقتان، ءسوزسىز، تىكەلەي قاقتىعىس بولادى. ال قاقتىعىستىڭ قاشان بولاتىنىن ءبىز شەشپەيمىز»، - دەيدى.

بۇل دەگەنىڭىز، قاراپايىم سوزبەن ايتساق، «ۋكراينادان سوڭ، قازاقستاننىڭ ماسەلەسىنە كىرىسەمىز. كەرەك بولسا، سوعىسامىز»، - دەگەن ءسوز! «قاقتىعىس ءسوزسىز بولادى»، دەگەنىڭىز باسقا ەمەس، ناق وسى ءسوز!

ال بۇل ايتىلعاندارعا قاتىستى ءبىزدىڭ سىرتقى ىستەر مينيسترلىگى جاۋاپ بەردى مە؟ قانداي دا ءبىر ارەكەت جاسادى ما؟ رەسەيدىڭ قازاقستانداعى ەلشىسىن شاقىرتتى ما؟ ەستىگەن جوقپىز. ادەتتەگىدەي، ەستىسە دە، ەستىمەگەندەي بولىپ وتىر. مەيلى، كىم ايتسا دا، رەسەي جاقتان ايتىلعان مۇنداي سوزدەرگە كەلگەندە مينيستر مۇحتار تىلەۋبەردى «ءتىلىن جۇتىپ» قويعانداي، ءۇن شىعارمايدى. ال كرەمل مۇنداي پىكىرلەردى اشىق ايتقىزادى. ول ورىستىڭ ءسوزىن سويلەگەندەردى قۋدالامايدى.

باسقاسىن قويعاندا، ساتانوۆسكيدىڭ كەشەگى سوزدەرى اشىق سوعىسقا شاقىرۋ! «سوعىس بولادى»، - دەيدى. قازاقستانعا قاۋىپ توندىرەتىن سوزدەردى ايتىپ جاتىر. ۇكىمەت تە، پارلامەنت تە، اقوردا دا ازىرگە ءۇنسىز.

Abai.kz