ءماجىلىس دەپۋتاتتارى باس پروكۋروردان قاڭتار وقيعاسى كەزىندە مەملەكەتتىك توڭكەرىس جاساعىسى كەلگەندەردىڭ كىم ەكەنىن بۇكپەسىز ايتۋىن تالاپ ەتتى.

“بۇكىل ەلدى ءدۇر سىلكىندىرگەن «قاسىرەتتى قاڭتار» وقيعاسىنا 1 جىل بولدى. سول كۇندەرى حالقىمىز بۇرىن-سوڭدى بولماعان قاۋىپ-قاتەرمەن بەتپە-بەت كەلدى. مەملەكەتىمىزدىڭ تۇتاستىعى مەن مىزعىماس ەگەمەندىگىنە زور قاۋىپ ءتوندى. قاڭتارلى كۇندەردە تاۋەلسىزدىكتىڭ قادىر-قاسيەتىن، تىنىشتىق پەن بەيبىتشىلىك قانشالىقتى ماڭىزدى ەكەنىن جان-جۇرەگىمىزبەن سەزىندىك.

قاڭتاردىڭ باسى ماڭعىستاۋدا ءورىس العانى بەلگىلى. وقيعا سۇيىتىلعان گاز باعاسىن تومەندەتۋ كەرەك دەگەن ۇرانمەن باستالدى. باسىندا بەيبىت تۇردە باستالعان شەرۋدى ارانداتۋشى توپتار پايدالانىپ، ونىڭ سوڭى ءىرى قالالاردا تارتىپسىزدىك پەن قايعىلى وقيعالارعا ۇلاستى.

ولار ساتقىندىق جاساپ، مەملەكەت باسشىسىنا ەلدەگى احۋال تۋرالى جالعان اقپاراتتار بەردى. ىشتەن شىققان جاۋلار، مۇقيات ويلاستىرىلعان اۋقىمدى وپەراتسيادا، كاسىبي دايىندىقتان وتكەن باسكەسەر-سودىرلاردى ەش تارتىنباستان پايدالاندى. ءىرى شاھارىمىز اياۋلى الماتى مەن كەيبىر قالالارىمىزدا ۇرىستار ورىن الدى.ەڭ سۇمدىعى ىشكى جانە سىرتقى جاۋلارىمىز بىرىگە قىلمىستىق قيمىل جاساپ، بيلىككە قارسى قولدارىنان كەلگەنىن ىستەدى. ولار مەملەكەتتىك ورگاندارعا، ستراتەگيالىق نىساندارعا، قارۋ-جاراق دۇكەندەرى مەن بيزنەسكە تيەسىلى عيماراتتارعا اياۋسىز شابۋىلدار ۇيىمداستىردى. شىن مانىندە، بۇل ەلدىك پەن مەملەكەتىمىزگە تونگەن اسا قاۋىپتى سىن-قاتەر ەدى”، – دەلىنگەن دەپۋتاتتاردىڭ باس پروكۋراتۋراعا جولداعان حاتىندا.

بۇعان دەيىن «جاڭا قازاقستان» دەپۋتاتتىق توبى باس پروكۋرورعا دەپۋتاتتىق ساۋال جولداعان بولاتىن.

“ول ساۋالعا پارلامەنتتە ارنايى جاۋاپ بەرىلدى. شىندىعىن ايتقاندا، ءماجىلىس تورىندە مەملەكەتتىك توڭكەرىسكە يتەرمەلەگەن وقيعانى مۇنداي كەڭ اۋقىمدى تالقىلاۋ ەشقاشان بولماعان. قۇقىق قورعاۋ ورگاندارى تەرگەۋ قورىتىندىلارى تۋرالى ەسەپ بەرىپ، ءبارى اشىق ايتىلدى. سول كەزدە ءبىرىنشى رەت قايتىس بولعان 238 ادامنىڭ ءتىزىمى مەن 3 مىڭنان استام قارۋدىڭ ۇرلانعانى حاباردار ەتىلدى. قوعامدى مازالاعان سۇراقتاردى بۇكپەسىز قويدىق. بىرىنە جاۋاپ الساق، ەندى كەيبىرىنە تەرگەۋ امالدارىنان سوڭ ناقتى جاۋاپ ايتىلادى دەلىندى”، – دەيدى دەپۋتاتتار.

Abai.kz