قازاقستاننىڭ بۇرىنعى پرەزيدەنتى نۇرسۇلتان نازارباەۆتىڭ استاناداعى رەزيدەنتسيالارىنىڭ ءبىرى "قازاقمىس" كورپوراتسياسىنىڭ يەلىگىنە وتكەن. جىلجىمايتىن مۇلىك استانانىڭ ەسىل اۋدانىندا ورنالاسقان.

بىرىڭعاي مەملەكەتتىك جىلجىمايتىن مۇلىك كاداسترىنىڭ (بمجمك) دەرەگىنشە، 213201351753 كاداستر نومىرىمەن تىركەلگەن رەزيدەنتسياعا قازىر "قازاقمىس كورپوراتسياسى" جاۋاپكەرشىلىگى شەكتەۋلى سەرىكتەستىگى يەلىك ەتەدى. نازارباەۆ رەزيدەنتسياعا "جىلجىمايتىن مۇلىكتەردى باسقارۋ جونىندەگى ديرەكتسيا" كومپانياسى مەن "ەلباسى قورى" ارقىلى يەلىك ەتكەن. قۇقىق يەسىنىڭ قاشان جانە قانداي شارتپەن اۋىسقانى بەلگىسىز.

8 جىل بۇرىنعى رەسمي قۇجاتتاردا بۇل اۋماق قازاقستان پرەزيدەنتىنىڭ استاناداعى "نۇرا" رەزيدەنتسياسى دەپ اتالعان. مەملەكەت مەنشىگىندەگى مۇلىك بەلگىسىز جولمەن جەكە مەنشىككە وتكەن.

"قازاقمىس كورپوراتسياسى" - قازاقستاننىڭ ورتالىعى مەن وڭتۇستىگىندەگى كەنىشتەرگە، بارلاۋ، كەن بايىتۋ، ماشينا جاساۋ ورىندارىنا يەلىك ەتەتىن مەكەمەلەردىڭ باسىن قۇرايتىن اسا ءىرى جەكەمەنشىك حولدينگ. وعان Forbes جۋرنالىنىڭ "قازاقستانداعى ەڭ باي كاسىپكەرى – 2022" رەيتينگىندە 1-ورىندا تۇرعان ۆلاديمير كيم (70%) مەن 14-ورىنداعى ەدۋارد وگاي (30%) يەلىك ەتەدى. ەكەۋى دە تا ەكس-پرەزيدەنتكە جاقىن ادامدار. Protenge جوباسىنىڭ جازۋىنشا، "قازاقمىستىڭ" كەيىنگى 4 جىل ىشىندە نۇرسۇلتان نازارباەۆتىڭ قورلارىنا 79,4 ميلليارد تەڭگە قاراجات بولگەن.

Abai.kz