الماتى قالاسىنىڭ №2 بوستاندىق اۋداندىق سوتى تىركەلمەگەن دەموكراتيالىق پارتيانىڭ (قدپ) كوشباسشىسى، قازىر ۇيقاماقتا وتىرعان  جانبولات مامايدىڭ ۇلىبريتانيا ازاماتتارىمەن كەزدەسۋى تۋرالى ءوتىنىشىن قابىلدامادى، دەپ حابارلادى الماتى قالالىق سوتىنىڭ ءباسپاسوز قىزمەتى.

"2023 جىلدىڭ 12 قاڭتارىندا سوتقا سوتتالۋشى مامايعا ۇلىبريتانيانىڭ ءۇش ازاماتىمەن كەزدەسۋگە رۇقسات سۇراۋ تۋرالى ءوتىنىش ءتۇستى. قىجك-ءنىڭ 99, 362-باپتارىنا سايكەس ءوتىنىشحات سوت وتىرىسىندا قارالدى. سوت تاراپتاردىڭ پىكىرىن تىڭداپ، ءوتىنىشتى كەلەسى نەگىزدەر بويىنشا قاناعاتتاندىرۋدان باس تارتتى. سوتتالۋشى ماماي ءۇي قاماۋىندا جانە قىجك-ءنىڭ 146-بابىنا سايكەس بەلگىلى ءبىر شەكتەۋلەردى ساقتاۋعا مىندەتتى. شەكتەۋلەردىڭ ءبىرى – جاقىن تۋىستارى مەن ادۆوكاتتان باسقا ادامدارمەن كەلىسسوزدەر جۇرگىزۋگە جانە سويلەسۋگە تىيىم سالۋ. وتىنىشتە كورسەتىلگەن ۇلىبريتانيا ازاماتتارى سوتتالۋشىنىڭ ادۆوكاتتارى نەمەسە قۇقىق قورعاۋ ۇيىمدارىنىڭ مۇشەلەرى ەمەس", - دەلىنگەن حابارلامادا.

بۇعان دەيىن قازاقستان سىرتقى ىستەر مينيسترلىگىنىڭ رەسمي وكىلى ايبەك سمادياروۆ قازاقستانعا كەلگەن بريتاندىق پارلامەنتتىك كوميسسيانىڭ رەسمي مارتەبەسى جوق ەكەنىن ايتقان بولاتىن.

Abai.kz