بۇگىن ۋكراينا سوعىسىنىڭ باستالعانىنا، دالىرەك ايتساق رەسەيدىڭ يمپەرشىل بيلىگىنىڭ تاۋەلسىز ۋكرايناعا سوعىس اشىپ، قالالارىندا قانقاساپ جاساي باستاعانىنا تۇپ-تۋرا ءبىر جىل. كرەمل ستاتەگتەرىنىڭ: «كيەۆتى 3 تاۋلىكتە، بۇكىل ۋكراينانى 6 تاۋلىكتە جاۋلاپ الامىز»، - دەگەن بليتسكريگتەرىنىڭ بىت-شىتى شىعىپ، مايداننىڭ كەي تۇستارىندا «الەمنىڭ ەكىنشى اسكەرى» دەپ اسىرە ماقتالعان ارميانىڭ ويسىراي جەڭىلگەنىن كوردىك. ءجا، ول بولەك اڭگىمە...

كەشە بۇۇ باس اسسامبلەياسى رەسەيگە قارسى، سوعىسقا قاتىستى ارنايى قارار قابىلدادى. قاراردىڭ اتاۋى: «ۋكرايناداعى جان-جاقتى، ءادىل جانە تۇراقتى بەيبىتشىلىك پرينتسيپتەرى تۋرالى»، دەپ اتالادى.

وندا رەسەيگە بىرنەشە تالاپ قويىلعان. ءبىرىنشىسى: ۋكراينانىڭ بۇۇ-دا مويىندالعان بارلىق تەرريتورياسىنان اسكەردى الىپ كەتۋ. ەكىنشىسى: ۋكراينانىڭ تەرريتوريالىق تۇتاستىعىن تولىق مويىنداۋ.

رەزوليۋتسيانى 141 مەملەكەت قولدادى. 32-ءسى قالىس قالىپ، 7 مەملەكەت قارسى داۋىس بەرگەن.

قارسى بولعاندار: رەسەي، بەلارۋس، سولتۇستىك كورەي، ەريتەريا، مالي، نيگەريا مەن ءسۇريا.

ورتالىق ازيا ەلدەرى قالىس قالعاندار قاتارىندا: قازاقستان, قىرعىزستان، وزبەكستان، تاجىكستان ت.ب.

قازاقستان ۋكرايناداعى سوعىسقا تاتىستى بۇۇ قارارلارىندا وسىعان دەيىن دە قالىس قالىپ كەلگەن ەدى.

اۋەلى: قازاقستان بيلىگى ۋكراينانىڭ تەرريتوريالىق تۇتاستىعىن قولدايتىنىن اۋىزشا ايتتى. قازاقستان پرەزيدەنتى قاسىم-جومارت توقاەۆ تا، قر سىرتقى ىستەر مينيسترلىگىنىڭ بىرنەشە لاۋازىمدى تۇلعاسى دا وسى اۋانداعى مالىمدەمەلەردى جاسادى. بۇل ءسوز.

ال ۋكراينانىڭ حالىقارالىق دەڭگەيدە مويىندالعان تەرريتوريالارىنىڭ ساقتالۋىن تالاپ ەتەتىن قارارلارعا داۋىس بەرۋدە ۇنەمى قالىس قالىپ كەلدى. بۇل ءىس.

ءسوز بەن ءىستىڭ ايىرماشىلىعىن جانە اتالمىش مازمۇنداعى قارارلاردى قابىلداۋدا قازاقستاننىڭ قالىس داۋىس بەرۋىنىڭ بىرنەشە سەبەبى بار. سونىڭ ەڭ باستىسى - سولتۇستىك كورشىلەرىمىزدىڭ ەكونوميكالىق، ساياسي جانە گەوگرافيالىق ىقپالى.

قالىس قالۋ تۋرالى قر سىرتقى ىستەر ءمينيسترى مۇحتار تىلەۋبەردى دە سويلەگەن. بۇيدەگەن: «قالىس قالۋ دا – پوزيتسيا. ءبىز ۇلتتىق مۇددەمىزدى ەسكەرە وتىرىپ داۋىس بەردىك»، - دەگەن.

ۋكرايناداعى سوعىستىڭ باستالعانىنا ءبىر جىل تولۋى قارساڭىندا، الەم ەلدەرى ۋكرايناعا قولداۋدى كۇشەيتتى. كۇنى كەشە عانا ەۋروپانىڭ 27 مەملەكەتى بىرلەسكەن مالىمدەمە جاساپ، ۋكرايناعا اسكەر، ماتەريالدىق جانە گۋمانيتارلىق كومەكتى كوبەيتەتىنىن مالىمدەگەن. ال ونىڭ الدىندا «بۋحارەست توعىزدىعىنا» مۇشە مەملەكەتتەر ورتاق مالىمدەمە جاساپ، رەسەي باسقىنشىلىعىن ايىپتاعان.

Abai.kz