ينتەرنەت-كونفەرەنتسيامىزدىڭ كەزەكتى مەيمانى، جازۋشى - دۇكەنباي دوسجان وقىرماندار تاراپىنان كەلىپ تۇسكەن ساۋالداردىڭ العاشقى لەگىنە جاۋاپ بەرىپ وتىر.

جازۋشى ءوز شىعارماشىلىعى حاقىنداعى سۇراققا جاۋاپ بەرى كەلىپ: «شىعارماشىلىق شارۋا - تەتىگىن باسىپ قالسا، تەرە جونەلەتىن كومپيۋتەر ەمەس. ول كوبىنە كوڭىل كۇيىنە، كىسىنىڭ شابىتىنا، وقىعان،  توقىعان ءومىر تاجىريبەسىنە كوپ بايلانىستى. سانالى ومىرىمدە ونعا جۋىق رومان، جيىرمانىڭ ۇستىندە حيكايات، ءجۇز اڭگىمە جازسام - بۇل ءسوز كيەسى قونعان، دۇنيەنى بوياۋمەن، سۋرەتپەن ەلەستەتە بىلەتىن، قيالى باي، توقىعانى كوپ، جازۋمەن اۋىرعان كىسى ءۇشىن اسا كوپ شارۋا ەمەس. ءار شىعارمانى جازۋعا ءبىر نارسە تۇرتكى، يتەرمەشى، تيەك بولادى. سول تيەكتى، يتەرمەشىنى ءدال تاۋىپ، قاداعالاپ، كوركەم سوزبەن ورمەك توقىساڭ - شىعارما جەلىسىن ۇستاعانىڭ.   ءبازبىر وقىرمان اعايىن: «ءسىز سىرعىتىپ جازا بەرەسىز بە»، «جىلىنا ءبىر رومان ءبىتىرۋ وڭاي شارۋا ما»، دەگەن سەكىلدى ساۋال قويىپ حات جازىپ جاتادى. كوركەمسوز تاۋقىمەتىن تۇسىنبەگەندىكتەن جازادى. شىندىعىنا ءۇڭىلىپ قاراساق: سوزدەن سويلەم، ويدان ءومىر، قيالدان كەڭىستىك، بولمىستان مىنەز، مىنەزدەن تاعدىر تاۋقىمەتىن تۋعىزىپ، ءتىرى سوزبەن كىسى بەينەسىن ويىپ كەلتىرىپ كوركەم شىعارما جازۋ قيىننىڭ قيىنى» ەكەنىن ايتادى.

- ءسىز كىمسىز؟

ينتەرنەت-كونفەرەنتسيامىزدىڭ كەزەكتى مەيمانى، جازۋشى - دۇكەنباي دوسجان وقىرماندار تاراپىنان كەلىپ تۇسكەن ساۋالداردىڭ العاشقى لەگىنە جاۋاپ بەرىپ وتىر.

جازۋشى ءوز شىعارماشىلىعى حاقىنداعى سۇراققا جاۋاپ بەرى كەلىپ: «شىعارماشىلىق شارۋا - تەتىگىن باسىپ قالسا، تەرە جونەلەتىن كومپيۋتەر ەمەس. ول كوبىنە كوڭىل كۇيىنە، كىسىنىڭ شابىتىنا، وقىعان،  توقىعان ءومىر تاجىريبەسىنە كوپ بايلانىستى. سانالى ومىرىمدە ونعا جۋىق رومان، جيىرمانىڭ ۇستىندە حيكايات، ءجۇز اڭگىمە جازسام - بۇل ءسوز كيەسى قونعان، دۇنيەنى بوياۋمەن، سۋرەتپەن ەلەستەتە بىلەتىن، قيالى باي، توقىعانى كوپ، جازۋمەن اۋىرعان كىسى ءۇشىن اسا كوپ شارۋا ەمەس. ءار شىعارمانى جازۋعا ءبىر نارسە تۇرتكى، يتەرمەشى، تيەك بولادى. سول تيەكتى، يتەرمەشىنى ءدال تاۋىپ، قاداعالاپ، كوركەم سوزبەن ورمەك توقىساڭ - شىعارما جەلىسىن ۇستاعانىڭ.   ءبازبىر وقىرمان اعايىن: «ءسىز سىرعىتىپ جازا بەرەسىز بە»، «جىلىنا ءبىر رومان ءبىتىرۋ وڭاي شارۋا ما»، دەگەن سەكىلدى ساۋال قويىپ حات جازىپ جاتادى. كوركەمسوز تاۋقىمەتىن تۇسىنبەگەندىكتەن جازادى. شىندىعىنا ءۇڭىلىپ قاراساق: سوزدەن سويلەم، ويدان ءومىر، قيالدان كەڭىستىك، بولمىستان مىنەز، مىنەزدەن تاعدىر تاۋقىمەتىن تۋعىزىپ، ءتىرى سوزبەن كىسى بەينەسىن ويىپ كەلتىرىپ كوركەم شىعارما جازۋ قيىننىڭ قيىنى» ەكەنىن ايتادى.

- ءسىز كىمسىز؟

- جاقسى سۇراق. كەز كەلگەن ءوز ىسىنە، ءوز ومىرىنە، الىس-جاقىن  تانىس-بىلىستەرىنە ۋاقىتى كەلگەندە تۋرا قاراپ تۇرىپ جاۋاپ بەرەتىندەي بولىپ سانالى ادامنىڭ كوكەيىندە جۇرەتىن ساۋال. شىندىعىندا مەن كىممىن وسى؟ سانالى ومىرىمدە نە تىندىردىم؟..اقىرەت تارازىسىنا سالاتىن نەم بار؟

ەڭ اۋەلى - مەن جازۋشىمىن. سىرت دۇنيەنى، ادام قالىبىن قاپىسىز تانىپ، سول تانىم-تۇسىنىگىمدى ءتىرى ءسوزدىڭ بوياۋ-بەلگىسىمەن مولدىرەتىپ سۋرەتتەپ بەرە الاتىن، ءتىرى ءسوز قونعان اداممىن. وزىمە سالسا دۇنيە بەينەلى وبرازدان قۇرالعان. قۇرالىم - ءتىرى، بەينەلى ءسوز. مىسالعا جۋرناليست اعايىن: كۇن باتىپ بارا جاتىر دەپ جازسا; مەنىڭ بايانداۋ ماشىعىمدا: كۇن ءسۇرى قازىداي ەرىپ  كوكجيەككە ءسىڭدى دەپ باياندايمىن. قارسى بەتتەن تاۋ كورىندى دەپ كەلتىرسە; مەنىڭ ماشىعىمدا: ماڭداي الدىمنان تاۋ يىقتاپ تۇرەگەلدى دەپ جازامىن. ءداپ وسىلاي ءتىزىپ كەلتىرە بەرۋگە بولادى. وسى تۇستا ءتىرى ءسوز قونعان دەگەندى تۇسىندىرە كەتەيىن. ستيليستيكادان حابارى بار كەز كەلگەن بىلەدى: قازاق ءتىلى وتە باي ءتىل، ونىڭ مۇمكىندىگى ۇشان-تەڭىز، قولدانىستاعى اۋىزەكى ءتىل، بەينەلى، وبرازدى ءتىل، كوركەم ادەبيەت ءتىلى، جۋرناليستيكالىق بايان، يدەومالىق تىركەس ءتىلى،  ت.ب. سان سالاعا ءبولىنىپ حالىقتىڭ ءومىر وزەگىنە اينالادى. باس-باسىنا سينتاكسيستىك سىيپاتى جەتەرلىك. دۇكەنباي دوسجان قولدانىسىنداعى ءسوز بايلىعى - كوركەم ادەبيەت ءتىلى. كوركەم ادەبيەت ءتىلىن قۇرعاق بايانداۋ ماشىعىنا، يا بولماسا يدەومالىق دىلمارسىعان قالىپتى تىركەسىنە سالىپ رومان، پوۆەست جازىپ جۇرگەندەر اداسىپ ءجۇر - ونداي كىسىلەر جازۋشى ەمەس.

ءوز كۇشىمدى اۋەل باستا بابالاردىڭ وشەباستاعان تاريح ىزىنە جاڭعىرتىپ «جىبەك جولى» رومانىن، «فارابي»، «وتىرار» حيكاياتىن جازۋعا جۇمسادىم. سوسىن قازاق بەينەلى ءسوزىنىڭ مايتالمان شەبەرلەرى اباي، مۇحتار اۋەزوۆ تاعدىرانا ارناپ عۇمىرنامالىق بايانعا دەن قويدىم. ءوز باسىم ءبىر جاعى كارى قاراتاۋ بەلدەۋلەگەن، باتىس بەتىن قىزىلقۇم ءشولى جيەكتەگەن ايتاقىر، الاپات ىستىق جەردە تۋىپ وسكەنمىن. سول ەڭ كۇنى ىستىق، ەڭ ءومىر سۇرۋگە قولايسىز الاپات ءشول دالانى مەكەندەگەن جەرى سور، بەينەتى زور، سىڭىرىنە ىلىنگەن ديقان، مالشى قاۋىمىنىڭ تىرشىلىگىن قوزعاپ «زاۋال»، «داريا»، «تابالدىرىعىڭا تابىن» اتتى ءۇش رومان جازىپپىن. مۇنىڭ سىرتىندا الگى سىڭىرىنە ءىلىنىپ ءجۇرىپ تىرشىلىك ءۇشىن تاڭنىڭ اتىسى، كۇننىڭ باتىسى ارالىعىندا بەل شەشپەي بەينەت كەشكەن ولەرمەنادامداردى سويلەتكەن جيىرمانىڭ ۇستىندە حيكايا جۇزگە جۋىق اڭگىمە تۋدى. قايتالاۋدىڭ قاجەتى بولمادى. بۇلاردىڭ باس-باسىنا ۋاعىندا كەلەسى ءماسليحات، سىني پىكىرلەر ايتىلعان، ماقالالار جازىلعان.

مەن كىممىن؟

نەگىزگى كاسىبىمدى الگىدە ايتىپ ءوتتىم.

سوسىنداعى تىرشىلىك - كوبىڭىزگە ۇقسايدى، ۇل، قىز وسىردىك، ۇيەلمەن بولدىق، وزىمىزگە جەتەرلىك داۋلەت جينادىق.

مال سويۋ، ءۇي تىرشىلىگىمەن اينالىسۋ، قوناقكادە ءراسىمى - قولدان كەلمەيتىن تىرشىلىك. قولدان كەلەتىنى - كولدەنەڭ كەزىگىپ شارۋا ايتقان كىسىنىڭ جۇمىسىنا جۇگىرۋ، قالعان ۋاقىتتا كىتاپ وقۋ، اعىلىپ كەلىپ جاتاتىن حات-حابارعا شۇقىنىپ وتىرىپ جاۋاپ جازۋ، تۋعان-تۋىستىڭ كولدەنەڭ شارۋاسىنا كوڭىل ءبولۋ. ءوزىم وقىعان مەكتەپتىڭ توبەسى قالىڭ جاۋعان قاردان ويىلىپ ءتۇسىپتى، وسى كوكتەم پارلامەنت دەپۋتاتتارىن جاعالاپ، سولارعا ءوتىنىش حات جازعىزىپ، قىزىلوردا وبلىستىق ءبىلىم دەپارتامەنتىنە مەكتەپتى جاڭادان سالۋعا ۇسىنىس جاساتتىم. 161-ءشى قوسۇيەڭكى قازاق ورتا مەكتەبى جاڭادان سالىناتىن بولىپ وسى جىلدىڭ جوسپارىنا  ەندى.

- قۇدايعا سەنەسىز بە؟ جاعىمپازدىققا كوزقاراسىڭىز قانداي؟ ەلباسىعا ەلدەگى شىندىقتى ايتا الاسىز با؟ قازاق ەلىندە نەگە قازاقتىڭ جاعدايى ناشار؟ وسىنداي قازاقتىڭ تاعدىرى، بولاشاعى بەلگىسىزدەۋ بولىپ تۇرعان كەزدە،زيالىسىماقتار نەگە ءۇنسىز؟

- ادال سويلەپ، اق جۇرۋگە داعدىلانعان مۇسىلمانمىن. راس، ەلىمىزدە جەرگىلىكتى ۇلتتىڭ جاعدايى اناۋ ايتقان جاقسى ەمەس. مۇنى وبلىس اكىمدەرىنەن باستاپ، اتقا مىنگەن شەنەۋنىك اعايىنداردىڭ ءبارى بىلەدى. نەگىزگى مۇناي، اليۋمەني،  گاز، ۋران، تەمىر، كومىر، ۆولفرام كەنىش كوزدەرى شەتەلدىك الپاۋىتتاردىڭ قولىندا، ءبىرى از، ءبىرى كوپ ۋاقىتقا مارتەبەلى مينيسترلىكتەرمەن كەلىسىمشارت جاساپ، پايدا تابۋ كوزىنە اينالدىرىپ، نەگىزگى بايلىقتى شەتەلدىك ينۆەستور اعايىندار پايدالانىپ وتىر.  قارجى قۇيعان شەتەلدىك الپاۋىتتار تابيعي بايلىقتى قالاي پايدالانام دەسە - قازانشىنىڭ ەركى بار، قايدان قۇلاق شاعارسا دەگەندەي، پايدا ۇلەسىن ءوز ەرىكتەرىنشە جۇمساۋعا قۇقىلى. قازاق زيالىلارى بارعا ءماز بولىپ، اۋزىن قۋ شوپپەن ءسۇرتىپ قاراپ وتىرعان جوق; بۇل تۋرالى ايتىلىپ تا، جازىلىپ تا ءجۇر. جەرگىلىكتى ۇلتتىڭ تاعدىرى، بولاشاعى دەگەنگە ءتۇن ۇيقىسىن ءتورت ءبولىپ، ءۋايىم جەپ، كۇڭىرەنىپ جۇرگەن ەل زيالىلارى جەتەرلىك. الداعى ۋاقىتتا قيىن ءتۇيىننىڭ شەشىلەر تۇسى، قالىڭ ءۋايىمنىڭ جاقسى ناتيجەسى بولار دەگەن ۇمىتتەمىز.

- دۇكەنباي اعا، جازۋدى 15 جاسىڭىزدا باستاعان ەكەنسىز. ءالى دە تىنباي جازىپ كەلەسىز. ءبىر اڭگىمەنى نەمەسە ءبىر حيكاياتتى قانشا ۋاقىتتا جازىپ بىتىرەسىز؟ جالپى كۇي تالعاپ، جاعداي تاڭداپ جازاسىز با، الدە، شابىت كەلگەن كەزدە جازا بەرەسىز بە؟

- شىعارماشىلىق شارۋا - تەتىگىن باسىپ قالسا، تەرە جونەلەتىن كومپيۋتەر ەمەس. ول كوبىنە كوڭىل كۇيىنە، كىسىنىڭ شابىتىنا، وقىعان،  توقىعان ءومىر تاجىريبەسىنە كوپ بايلانىستى. سانالى ومىرىمدە ونعا جۋىق رومان، جيىرمانىڭ ۇستىندە حيكايات، ءجۇز اڭگىمە جازسام - بۇل ءسوز كيەسى قونعان، دۇنيەنى بوياۋمەن، سۋرەتپەن ەلەستەتە بىلەتىن، قيالى باي، توقىعانى كوپ، جازۋمەن اۋىرعان كىسى ءۇشىن اسا كوپ شارۋا ەمەس. ءار شىعارمانى جازۋعا ءبىر نارسە تۇرتكى، يتەرمەشى، تيەك بولادى. سول تيەكتى، يتەرمەشىنى ءدال تاۋىپ، قاداعالاپ، كوركەم سوزبەن ورمەك توقىساڭ - شىعارما جەلىسىن ۇستاعانىڭ.   ءبازبىر وقىرمان اعايىن: «ءسىز سىرعىتىپ جازا بەرەسىز بە»، «جىلىنا ءبىر رومان ءبىتىرۋ وڭاي شارۋا ما»، دەگەن سەكىلدى ساۋال قويىپ حات جازىپ جاتادى. كوركەمسوز تاۋقىمەتىن تۇسىنبەگەندىكتەن جازادى. شىندىعىنا ءۇڭىلىپ قاراساق: سوزدەن سويلەم، ويدان ءومىر، قيالدان كەڭىستىك، بولمىستان مىنەز، مىنەزدەن تاعدىر تاۋقىمەتىن تۋعىزىپ، ءتىرى سوزبەن كىسى بەينەسىن ويىپ كەلتىرىپ كوركەم شىعارما جازۋ قيىننىڭ قيىنى. ادام بويىنداعى مىنەز، يا بولماسا وقىس ارەكەتتىڭ سەبەپ-سالدارى ساعاتتار، كۇندەر، ايلار بويىنا قيالىڭدا جۇرەدى، ويىڭدى قوزعايدى; كوز الدىڭا قيمىل كۇيىندە ەلەستەپ مازا بەرمەيدى، سودان بارىپ ارەكەت شىندىعى ءپىسىپ جەتىلەدى. سول شىندىقتى قاعازعا ءتۇسىرىپ اۋرەسىڭ. ءبىر قاراساڭ - كوكەيگە قونىمدى، ءومىردىڭ وزىنەن كوشىرىپ العانداي سۋرەت شىعادى. جازۋ تاۋقىمەتى دەگەنىڭ وسى!

كوز الدىڭا كەيىپكەردىڭ قيمىل-قالپىن، ارەكەتىن، كوكەيگە قونىمدى بەينەسىن ەلەستەتىپ وتىرىپ - بىرنەشە بەت جازىپ تاستاعانىڭدى ءوزىڭ دە سەزبەي قالاسىڭ. سان ءتۇرلى سيتۋاتسيا، ارەكەت، قۇلىق، مىنەز قىرى كەمپىرقوساق بوياۋىنداي قيلى-قيلى كورىنىس جاساپ قاعازعا تۇسەدى، كوركەمدىكتىڭ ءتىرى سوزدەگى كورىنىسى وسىلايشا دۇنيەگە كەلەدى. ءار شىعارمانىڭ دۇنيەگە كەلۋى ارقيلى، ارتەكتى: ءار شىعارمانىڭ قاعازعا ءتۇسۋ تاريحى تۋرالى سونشا بەتتىك زەرتتەۋ ماقالاسىن جازۋعا بولار، بالكىم.

- دۇكەنباي دوسجانوۆقا قويار پالەندەي سۇراعىم جوق، ءبىر كەزدەردە جاقسى جازۋشى بولاتىن. جاقسى جازۋشى بولعاندىعى سول - ءتىلى كۇڭگىرت تە، وتە قۇنارلى، ال ءستيلى وتە باپتاۋلى بولاتىن: "جولبارىستىڭ سۇرلەۋى", "قىزىلقۇمنىڭ جەلى نە دەپ جىلايدى", "كۇمىس كەرۋەن" ت.ب. ورالحاننىڭ الەمى التايدىڭ قارىنداي اپپاق بولسا، دۇكەنبايدىڭ الەمى قىزىلقۇمنىڭ قۇمىنداي قىپ-قىزىل بولاتىن. ياعني، وزدەرىنىڭ وزىندىك ءبىر قايتالانباس الەمى بار جازۋشىلار بولاتىن. ورالحان - قازاقتىڭ ۇلى جازۋشىسى بولىپ قالدى. قازىرگى دۇكەنباي - ولاي ەمەس. نەگە؟

- قازاق عۇرپىندا ءولى مەن ءتىرىنى سالىستىرمايدى. ءبارىنىڭ تارازىسى - ۋاقىت. كوركەمسوز الەمىندە كىم ۇلى بولىپ قالادى، كىم وقىلماي ۇمىتىلادى - ونىڭ ءبارىن ۇلى مارتەبەلى ۋاقىت ولشەمى شەشەدى. ەشكىمنىڭ الدىنا ەشكىم شىعىپ كورگەن جوق: بۇگىن دابىرايتىپ، وڭەشتەپ، اسپانداتىپ ماقتاعان شىعارما - ەرتەڭ شالدۋار بالانىڭ شالشىق سۋ كەشكەنىندەي انشەيىن نارسە بولىپ قالۋى مۇمكىن. سوندىقتان اسىقپاعان ءجون.

بار گاپ كوركەمدىك قۇدىرەتىندە. ارينە، بۇل جەردە ءوز باسىم ءبىر نارسەدەن سەكەم الىپ، سەزىكتى سەكىرەدى دەگەندەي، وقىرمان الدىندا اقتالايىن دەپ تۇرعانىم جوق . م. ىسقاقباي ءوزىنىڭ «دارقان دارىن» اتتى ماقالاسىندا «دۇكەنبايدا كەمشىلىك بار ما؟ ارينە، بار. كەمشىلىك بارلىق كلاسسيكتەردە جەتىپ ارتىلادى» دەگەن سوزىندە شىندىق جاتىر. اسىعىس قۇرىلعان جەڭىل سيتۋاتسيا، سىدىرتپا بايانداۋ، ويدا ءپىسىپ جەتىلمەگەن پالساپالىق توپشىلاۋ -جازعاندارىمنان  ۇشىراسىپ قالادى. اسىرەسە ، «داريا»، «تابالدىرىعىڭا تابىن»  رومانىندا،  «تىلەگىمدى بەرە گور»، «قايىقشى» حيكاياتتارىندا رابايسىز ۇباق-شۇباق سوزىلعان سيتۋاتسيا، ءىش پىستىراتىن بايانداۋ، جەر تابانداعان سۇلەسوق سۋرەتتەۋ ماشىعى جەتىپ  ارتىلادى. كەمشىلىكتى شىعارمانى وقىرمانعا ۇسىنعاننان كەيىن ءبىراز ۋاقىت وتكەننەن سوڭ سەزىپ-ءبىلىپ جاعاڭدى ۇستاپ وكىنەسىڭ. ۇستىنەن ءبىر قاراعانىڭدا الگى كەمشىلىكتەن قۇتىلۋعا تىرىساسىڭ.

ەڭ عانيبەتى - ءتىرى ءسوزدىڭ ۇيقاسىمى، جاراسىمى، كەلىمسىمى، رايى، ىرعاعى ولمەي، كادۋىلگى كوكەيگە قونىمدى تابيعي تارتىلىس كۇشىمەن قۇپ ۇيلەسىپ حاتقا تۇسۋىندە دەپ ويلايمىن.

بالكىم، ءوزىمنىڭ ەرەكشەلىگىم بولار، بالكىم، اسىرە مازاسىزدىعىمنان شىعار - ءومىر بويى جەتىلۋ، ۇيرەنۋ ۇستىندە كەلەمىن. بەينە، ءشول قيىعىندا ءبىر جۇتىم سۋعا ىنتىققان جولاۋشى سەكىلدى كوركەمدىك اتتى جەتىپ بولماس، ساعىمشا سىلانىپ وڭايلىقپەن ۇستاتا قويماس قۇدىرەتتى كۇشكە ىندىنىم قۇرىپ ىنتىعۋمەن كەلەمىن. بۇگىنگى جازعاننان ەرتەڭگى كۇنى ناقتىراق، مىقتىراق، پارمەندىرەك، كەمپىرقوساق بوياۋى سەكىلدى كوزگە ەلەستەتىپ قانا جازسام دەپ ارماندايمىن. كوركەمدىكتىڭ جەتىپ بولماس، يگەرىپ تاۋىسا الماس كەپيەت-قاسيەتى دەپ  ءالسىن-ءالى ايتىپ جۇرگەنىم سودان بولار، ءسىرا.

- لاتىن تىلىنە قالاي قارايسىز؟
2030 دەگەن باعدارلامانى ورىنداپ تاستادىق دەگەنگە سەنەسىز بە؟
ۇلت ۇستازى ابايدىڭ سوزدەرىن تولىق تۇسىنەمىن دەپ ويلايسىز با؟
قازاق زيالىلارى نەگە ابايدى باسشىلىققا الىپ ءومىر سۇرمەيدى؟

- لاتىن كاليگرافياسىنا كوشۋدى ءجون سانايمىن. ەرتە مە، كەش پە، بۇل تاڭباعا سلاۆيان تۇقىمداس ءبىراز حالىق كوشەدى دەپ ويلايمىن. مۇنىڭ استارىنان يا ساياسات، يا ۇلتشىلدىق، يا بولماسا ءبىر ۇلتتىڭ الدىندا كەلەسى ۇلتتىڭ  استامشىلىعىن ىزدەۋدىڭ قاجەتى بولماس. كوشۋ ماسەلەسى - جاھاندانۋ ءۇردىسىنىڭ الدىمىزعا تارتقان سىر-سياپاتى، ءومىر تالابى! سول سەبەپتى الپىس جىل بويىنا حاتقا تۇسكەن كوركەم ءسوزىمىز، تاريحىمىز، وتكەن-كەتكەن شەجىرەمىز كيريليتسامەن قوسىلا ۇمىتىلادى دەگەن بەرگى اۋىلدىڭ بايبالام ءسوزى عانا.

ءوز باسىم حاكىم ابايدى جۇرەگىمنىڭ تورىندە ۇستاپ ۇيرەنگەن اداممىن. وعان دالەل: «اباي مەن بايرون» اتتى ۋنيۆەرسيتەتتى بىتىرەر كەزدە جازعان ديپلوم جۇمىسىم، «اباي ايناسى» (1995 ج.), «ابايدىڭ رۋحى» (2008 ج.) اتتى عۇمىرنامالىق - پالساپالىق زەرتتەۋ كىتاپتارىم دالەل بولا الادى. بۇل دۇنيەلەردى وقىرمان قاۋىم جىلى قابىلدادى،  مۇنىڭ  ۇستىنە  اتالمىش كىتاپتارىم م. اۋەزوۆ اتىنداعى سەمەي ۇلتتىق ۋنيۆەرسيەتىندە، قورقىت اتا اتىنداعى قىزىلوردا مەملەكەتتىك ۋنيۆەرسيتەتىندە  ءدارىس رەتىندە وقىتىلادى.

(جالعاسى بار)

Abai.kz