ءۇندىستاننىڭ الەمدەگى ءۇشىنشى ءىرى مۇناي يمپورتتاۋشى ەل ەكەنى بەلگىلى. ەۋروپا ەلدەرى پۋتيننءىڭ ۋكرايناعا باسقىنشىلىعىن ايىپتاپ، ەكونوميكالىق سانكتسيا جاريالاپ، گازى مەن مۇنايىن الۋدان باس تارتقان ءبىر جىلدا ولاردىڭ ورىنىن ءۇندىستان باسىپ، ورىس مۇنايىنىڭ باستى تۇتىنۋشىسىنا اينالعان. رەسەي مۇنايى بۇل ەلدىڭ سىرتتان ساتىپ العان مۇناي كولەمىنىڭ ۇشتەن ءبىرىن ۇستاعان. سوعىستان بۇرىنعى كەزبەن سالىستىرعاندا ەكسپورت كولەمى 16 ەسە ۇلعايعان.

سوڭعى ونجىلدىقتاردا الەمدەگى مۇناي ايىرباسىنىڭ اقش دوللارىمەن جۇرگىزىلىپ كەلگەنى ءمالىم. امەريكا باستاعان باتىس ەلدەرى رەسەيگە سانكتسيا سالىپ، ەكونوميكالىق قۇرساۋدى قىسا تۇسكەن سايىن، ورىسپەن ساۋدا جاساۋدىڭ قاتەرى ەسەلەپ ارتقان. الدىنعى كەزەكتە رەسەيدىڭ نەگىزگى كىرىس كوزى سانالاتىن مۇنايى تۇرعانى انىق. وتكەن جىلى جەلتوقساننىڭ بەسىندە ۇلكەن جەتىلىك ەلدەرى رەسەي مۇنايىنا 60 دوللار شەكتى باعا بەلگىلەپ، ودان اسقان جاعدايدا وپەراتسيانى جۇزەگە اسىرعان كومپانيالارعا ساقتاندىرۋ قاراجاتىن تولەۋدەن، ەسەپ جاساۋدى اياعىنا جەتكىزۋدەن باس تارتاتىنىن مالىمدەگەن ەدى. سانكتسيادان قاشقان «گازپروم» مەن «رۋسنەفت» دوللاردان باسقا شەتەل اقشالارىمەن ەسەپ ايىرىسۋدىڭ جولىنا كوشكەن. ءۇندىستان كومپانيالارى دا ميلليارد دوللاردان اساتىن ساۋدانى رۋبلمەن، بىرىككەن اراب امىرلىگىنىڭ اقشاسى ديرحاممەن جاساسقان.

وتكەن ايدا رەسەي اسكەرىنىڭ ۋكرايناعا باسىپ كىرگەنىنىڭ ءبىر جىلدىعىنا وراي امەريكا مەن ەۋرووداق رەسەيگە قارسى جاڭا سانكتسيا جاريالادى. جاڭا تىزىمدە ماۋكەۋمەن ءابۋ دابيدە باس كەڭسەلەرى ورنالاسقان رەسەيدىڭ MTS كومپانياسى بار. اتالمىش كومپانيا ورىس مۇنايىن ساتىپ العان ءۇندى كومپانيالارىنا دوللاردان باسقا اقشامەن ەسەپ ايىرىسۋعا مۇمكىندىك جاساپ كەلگەن ەكەن. ەندى قيىندىق تۋىندايتىن ءتۇرى بار.

بىراق ءبىر ءۇندىستان وكىلى: «باستىسى بىزگە ۇكىمەت رەسەي مۇنايىن ساتىپ الۋعا تىيىم سالىپ جاتقان جوق. قالعان جۇمىس رەسەيلىكتەردىڭ مويىنىندا. ولار ءبىر جول كەسىلسە، ەكىنشىسىن تابادى»، - دەپتى Reuters اگەنتتىگى تىلشىسىنە.

Abai.kz