قۇرمەتتى نۇرلان ءماجيتۇلى!

ءسىز بۇگىن وراسان زور زاڭ بۇزۋشىلىقتارعا جول بەردىڭىز!

انت جانە انت قابىلداۋ دەگەن جاي نارسە ەمەس. مەملەكەتتىك قىزمەتكەردىڭ ءبىرىنشى قادامى وسى انت بەرۋدەن باستالادى.

ءوزىڭىز جاقسى بىلەسىز، دەپۋتاتتار بەرەتىن انتتىڭ ءماتىنى: «قازاقستان حالقىنا ادال قىزمەت ەتۋگە، قازاقستان رەسپۋبليكاسىنىڭ تۇتاستىعى مەن تاۋەلسىزدىگىن نىعايتۋعا، ونىڭ كونستيتۋتسياسى مەن زاڭدارىنا قاتاڭ باعىنۋعا، دەپۋتاتتىڭ وزىمە جۇكتەلگەن مارتەبەلى مىندەتتەرىن ادال اتقارۋعا انت ەتەمىن، - دەپ، «قازاقستان رەسپۋبليكاسىنىڭ پارلامەنتi جانە ونىڭ دەپۋتاتتارىنىڭ مارتەبەسi تۋرالى» كونستيتۋتسيالىق زاڭمەن بەكىتىلگەن.

انتتىڭ اتالعان كونستيتۋتسيالىق زاڭمەن بەلگىلەنگەن ءماتىنىن ەشكىمنىڭ وزگەرتۋگە جانە بۇرمالاپ ايتۋىعا قۇقىعى جوق!

ەگەر، انت ءماتىنىنىڭ سوزدەرى بۇرمالانسا، بۇل اتالعان زاڭعا قايشىلىق جاساعاندىق بولادى.

ءسىز سەگىزىنشى شاقىرىلىم دەپۋتاتتارى انت بەرگەن كەزدە ەكى ۇلكەن قاتەلىك جاسادىڭىز.

ءبىرىنشى، دەپۋتاتتاردىڭ انتىن قابىلداۋ ءسىزدىڭ قۇزىرەتىڭىزگە كىرمەيدى! ءسىز پرەزيدەنتتىڭ قۇقىعىن تاپتاپ، ءوز قىزمەتىڭىزدى اسىرا پايدالاندىڭىز.

ەكىنشى، انتتىڭ ءماتىنىن دۇرىس ايتا الماعان دەپۋتاتتاردىڭ دا انتىن قابىلداپ، «قازاقستان رەسپۋبليكاسىنىڭ پارلامەنتi جانە ونىڭ دەپۋتاتتارىنىڭ مارتەبەسi تۋرالى» كونستيتۋتسيالىق زاڭىنىڭ بۇزىلۋىنا جول بەردىڭىز. بۇل جەردە «تۇسىنىستىكپەن قاراۋ» دەگەن قازاقى قاعيدا جۇرمەيدى...

ءسىز وسى ەكى ماسەلە بويىنشا سوت الدىندا جاۋاپ بەرەتىن بولاسىز!

اۋىت مۇقيبەك

Abai.kz