پرەزيدەنت قاسىم-جومارت توقاەۆ بىرقاتار مەملەكەتتىڭ ەلشىلەرىنەن سەنىم گراموتالارىن قابىلدادى.

«اقوردا» رەزيدەنتسياسىندا بەس ەلدىڭ توتەنشە جانە وكىلەتتى ەلشىلەرىنىڭ مەملەكەت باسشىسىنا سەنىم گراموتالارىن تاپسىرۋ ءراسىمى ءوتتى.

سەنىم گراموتالارىن پاكىستان يسلام رەسپۋبليكاسىنىڭ ەلشىسى ناۋمان باشير بحاتتي، كورەيا رەسپۋبليكاسىنىڭ ەلشىسى تە-يك چجو، فيليپپين رەسپۋبليكاسىنىڭ ەلشىسى يگور گارليت بايلەن، شري-لانكا دەموكراتيالىق سوتسياليستىك رەسپۋبليكاسىنىڭ ەلشىسى دجانيتا ابەيۆيكرەما ليانگە جانە انگولا رەسپۋبليكاسىنىڭ ەلشىسى اۋگۋشتۋ دا سيلۆا كۋنيا تاپسىردى.

قاسىم-جومارت توقاەۆ ەلشىلەردى قازاقستانداعى ديپلوماتيالىق ميسسيالارىنىڭ رەسمي باستالۋىمەن قۇتتىقتاپ، ەكىجاقتى ىنتىماقتاستىقتى ودان ءارى نىعايتۋ ىسىندە تابىس تىلەدى.

سونداي-اق پرەزيدەنت ولاردىڭ مەملەكەتتەرىنىڭ باسشىلارىنا جۇرەكجاردى سالەمىن جولدادى.

– قازاقستان بەيبىتشىلىككە نەگىزدەلگەن سىرتقى ساياسات جۇرگىزەدى. ءبىز ىنتىماقتاستىققا، سونىڭ ىشىندە سىزدەردىڭ ەلدەرىڭىزبەن تىعىز قارىم-قاتىناسقا اشىقپىز. سىزدەردىڭ ميسسيالارىڭىز وتە تابىستى بولادى دەپ سەنەمىن. قازاقستان ۇكىمەتى مەن پرەزيدەنت اكىمشىلىگى قازاقستانداعى ميسسيالارىڭىزعا قولداۋ كورسەتۋ ءۇشىن قولدان كەلگەننىڭ ءبارىن جاسايدى. سىزدەردىڭ ەلدەرىڭىزبەن ىنتىماقتاستىقتى نىعايتا وتىرىپ، زور ناتيجەگە قول جەتكىزە الامىز دەپ ويلايمىن، – دەدى مەملەكەت باسشىسى.

سۋرەت: t.me/aqorda_resmi

Abai.kz