ول كافەدەگى داياشىلاردى قۋالاپ ءجۇرىپ كەشىرىم سۇراتۋ نەمەسە دۇكەنگە بارىپ ۇرىس شىعارۋ ەمەس.

مەملەكەتتىك تىلدە ءبىرىنشى كەزەكتە مەملەكەتتىك قىزمەتكەرلەر سويلەۋ كەرەك. تالاپتى دەپۋتاتتارعا، مينيسترلەرگە، پرەزيدەنتكە قويۋ كەرەك، سولار سويلەسىن. قالعاندارى جاعدايدى كورگەندە ۇيرەنىپ شىعادى. ازەربايجاندا، وزبەكستاندا ءتىل ماسەلەسى شەشىلمەي قالعان جوق. جاس بۋىننىڭ بارلىعى سول تىلدە سويلەپ ءجۇر.

ءبىزدىڭ بيلىك ءتىل ماسەلەسىن قولدان جاساپ وتىر. ويتكەنى بىردە-بىرەۋىنىڭ بالاسى قازاقشا سويلەمەيدى. 30 جىلدا 30 ءتىل ۇيرەنۋگە بولار ەدى. ماسەلە تىلدە ەمەس، بيلىكتىڭ پوزيتسياسىندا. وعان ءوزىڭ سەكىلدى قاراپايىم، نەسيەسىن زورعا تولەپ، ونسىز دا تەپەرىش كورىپ جۇرگەن ادامداردى ايىپتاۋعا بولمايدى. وزىڭمەن تەڭ ادامعا ءزابىر كورسەتۋ دۇرىس ەمەس. ال بيلىكتەن تالاپ ەتۋ كەرەك، سەبەبى بيلىك مىندەتتى.

ەڭ بولماعاندا قازاق تىلىندە سويلەۋگە مىندەتتى لاۋازىمدار ءتىزىمىن ەنگىزۋگە بولار ەدى. ەگەر ادام قازاق ءتىلىن بىلمەي، جەكە سەكتوردا جۇمىس ىستەسە تولىق كەلىسەر ەدىم، ول ونىڭ ءوز ەركى.

مىسالى امەريكادا اعىلشىنشا بىلمەيتىن يسپاندىقتار، يسپانشا سويلەيتىن مەكسيكاندار وتە كوپ. بىراق اقش كونگرەسمەنىنىڭ اعىلشىنشا سويلەي الماعانىن ەلەستەتە الاسىز با؟

پارلامەنتكە قازاقشا بىلمەيتىن ادامداردى جىبەرمەسىن. بۇل سايلاۋعا ءتۇسۋ ءۇشىن قويىلاتىن شارت بولسىن. (شەشكىسى كەلەتىن ادام بولسا، وتىز جىلدا ءتىل ماسەلەسىن شەشۋگە بولار ەدى... )

دارحان ابدىك

Abai.kz