القيسسا، بۇل ساپاردىڭ حابارى ساۋىردە شىققان-دى. باكۋدا تۇراتىن ءازىربايجان اقىنى ايدا ەيۆازلى اپامىز حابارلاسىپ، "الماس دجان، مەن سەنى انتالياعا ءبىر جاقسى پرەسس تۋرعا جازدىرىپ قويدىم. ۇسىندىم، بارىپ، كورىپ، دەمالىپ كەلگەيسىڭ" دەگەن. ەلەڭ ەتە قالعانمەن قاتتى قۇلاپ سەنە قويمادىم. "قازاقتا مىقتى جۋرناليست تە، بلوگەر دە كوپ قوي، ءبىزدى تاڭداي قويماس ءسىرا" دەپ ويلاعان بولۋىمىز كەرەك.

ءساۋىردىڭ سوڭىندا تۇركيادان وسمان قۇرت ەسىمدى جىگىت حابارلاسقان كەزدە اجەپتاۋىر تاڭعالدىق. وسمان ءدال سول ايدا حانىم حابارلاعان پرەسس تۋر جونىندە بايلانىسقا شىققان ەكەن. "ماۋسىمنىڭ باسىندا تەڭىز ابدەن جىلىنعان كەزدە كەلىپ، قوناق بولىپ، كەرمەتتى كوزبەن كورىپ كەتىڭىز، بارلىق شىعىندى ءوزىمىز كوتەرەمىز" دەدى...

ءبىز ەندى شىنىمەن سەنە باستاعانداي بولدىق. مامىردا استانا انتاليا باعىتىنا بارۋ، قايتۋ بيلەتتەرىن جولدادى.

سونىمەن باسىڭدى اۋىرتىپ نە كەرەك، ماۋسىمنىڭ سەگىزىنشى جۇلدىزى كۇنى تاڭەرتەڭ استانا اۋەجايىنان "انتاليا، قايداسىڭ" دەپ ۇشا جونەلدىك.

ستامبۇلعا بارعانىمىز بار ەدى، انتاليانىڭ اجارىنا قانىق ەمەس ەك. ماۋسىمنىڭ باسىنداعى اۋا رايى ماقپالداي جۇمساق قالا قۇشاق جايدى: سۇڭگي بەردىك.

اۋەجايدان شىعا بەرىستە اتى-ءجونىم جازىلعان قاعازدى ۇستاعان جۇرگىزۋشىگە تاياندىم، "مەرھابا، الماس بەي" دەپ كولىگىنە باستادى. جەرورتا تەڭىزىن جاعالاپ جيىرما مينۋت جۇردىك پە، جۇرمەدىك پە... جەردەگى جۇماقتىڭ قاقپاسىنان اتتادىق!

Bayou Villas - ءبىز جۇماققا تەڭەپ وتىرعان جاۋھارداي دەمالىس ورىنى وسىلاي اتالادى!

Lara Barut Collection قوناقۇيلەر تىزبەگىنە كىرەتىن عاجاپ ۆيللا - ءىسلام جارىلعاپوۆتىڭ اۋدارماسىمەن ايتساق، جانناتجاي بيىل عانا اشىلعان! العاشقى قوناقتارى الەمنىڭ ءار ەلىنەن كەلگەن ءانشى، اكتەر، بلوگەر، جۋرناليستەر ەكەن، سولاردىڭ قاتارىندا قازاق ەلىنەن ءبىز دە بارمىز.

قوناقۇي كەشەنىنە كىرگەن جەردە وسمان قۇرت باۋىرىمىز قارسى الدى. مەنىڭ ۇمىتىڭقىراپ قالعان اعىلشىنىم تىلىمە ورالىپ، ءبىراز سويلەستىك. انتاليادا تاڭعى توعىزدان ەندى كەتكەن شاق، كۇن ىسي قويماعان، Bayouدىڭ ەلگەزەك قىزمەتكەرلەرى استى-ۇستىمە ءتۇسىپ ەلپىلدەپ ءجۇر، وسمانىم باياعىدان تانىس ادامداي ىشتەسىپ اڭگىمە ايتادى، عاجاپ ەدى سول ءبىر ءسات.

انتاليانىڭ لارا جاعالاۋ ايماعى حالىقارالىق اۋەجايعا ەڭ جاقىن ورنالاسقان دەمالىس زوناسى. بۇل جەردەگى قوناقۇيلەر سالىستىرمالى تۇردە ارزان بولمايتىنىن بۇرىن دا بىلەتىنبىز. ال، Bayou Villasتىڭ ءنومىرى 205 ۆيللاسىنا كىرىپ، ورنالاسقان كەزدە ءوزىمنىڭ قانداي الەمگە تاپ بولعانىمدى سەزدىم...

كوزىم كورگەندى ءتىلىم جەتكەنشە بايانداپ كورەيىن...
ءۇش قاباتتى جانناتجاي. تومەندە ءبىر قابات، مۇندا ساۋنا، تۇرىك حامامى، ەكى ادامعا ارنالعان ارنايى ماسساج بولمەسى، شاعىن جاتتىعۋ زالى مەن بيليارد ۇستەلى ورنالاسقان.

جەر بەتىندەگى ءبىرىنشى قابات - نەگىزگى قابات. مۇندا ۇلكەن قوناق بولمەسى. كىرىپ كەلگەندە الدىڭنان كەڭ زال اشىلعاندا قازاقتىڭ ۇيىنە كىرگەندەي اسەر الاسىڭ. ۇستەل ۇستىندە ءيىسى بۇرقىراپ جاڭا ۇزىلگەن گۇلدەر تولى سەبەت، ونىڭ جانىندا جەمىس پەن جيدەكتىڭ نەشە تۇرىنە تولا ۇلكەن سەبەت.

ءبىرىنشى قاباتتاعى ەكىنشى بولمەدە ەكى ءبىر كىسىلىك توسەك تۇر، ءسىرا، بالالارعا ارنالعان بولمە. وسى توسەكتەردىڭ بىرىنە مەن جايعاستىم. جەكە جۋىناتىن بولمە، اجەتحانا، گاردەروب، جانىڭا نە كەرەكتىڭ ءبارى بار.

ەڭ عاجابى - وسى ءبىرىنشى قاباتتان ءبىز ءوزىمىزدىڭ ۆيللامىزدىڭ اۋلاسىنا شىعا الامىز. اۋلادا نە بار دەيسىز بە؟ اۋلادا سىڭسىعان جاتاعان اعاش، ىرعالا وسكەن بويشاڭ گۇلدەر، ەڭ باستىسى - باسسەين بار! بىرەۋ ەمەس! ەكەۋ! ءيا، ءبىر ۆيللاعا ەكى باسسەين. كەڭ اۋلا، بىرنەشە شاتىر، جاعالاي قويىلعان جۇمساق ديۆان، باسسەيننەن شىق تا اۋناي كەت، ەشكىم "نەگە ءۇيتتىڭ" دەمەيدى. راحات! جاننات دەمەي كور ەندى!

وسىلايشا، ءبىرىنشى قاباتقا تاڭعالىپ بولىپ ەكىنشى قاباتقا كوتەرىلدىك. ەكىنشى قاباتتاعى ۇلكەن زالدىڭ ورتاسىندا ەكى ادامعا ارنالعان كەڭ توسەك. كۇن بارىنشا مول تۇسەتىن ۇلكەن تەرەزە، بالكونىن اشىپ ەكىنشى قاباتتاعى تەرراسساعا شىقساڭىز الدىڭىزدان ەرتەگىدەي عاجاپ كورىنىس اشىلادى. كورشى ۆيللالاردا شۋلاعان بالالار، دەمالىپ جاتقان شەتەلدىكتەردىڭ ءار تىلدەگى داۋىستارى ارالاسىپ انتاليا ساسكەسىن الۋان بوياۋعا تولتىرىپ جىبەردى. كوزبەن كورگەننىڭ بارىنە تامسانىپ، ءسوز جوق تەك ەموتسيامەن باس شايقاي بەرگەنىم ەسىمدە قالىپتى.

وسماننىڭ ايتۋىنشا، ءبىز ءبىرىنشى كۇنىمىزدە تازا دەمالامىز، كەشكى اس ۇستىندە عانا جولىعۋىمىز كەرەك بولعان. الايدا، انتاليانىڭ جەلىگى جاتقىزا ما، ۇشاقتاعى از ۇيقىنىڭ ورىنى تولا جاتار دەپ، لارا بارۋتتىڭ ايلاپات اۋماعىن ارالاۋعا شىقتىق. جولباسشىم سول وسمان.

وسمان - ستامبۇلدىق تۇرىك. كوزى كوگىلدىر، بيداي ءوڭدى، جيرەنگە جاقىن سارى شاشى سيرەكتەۋ، اعىلشىنشانى ادەمىلەپ، باياۋ داۋىسپەن سويلەيتىن جىگىت.

- الماس بەي، ۆيللاعا ورنالاسقان قوناقتارعا لاراداعى بارلىق يگىلىك تەگىن، تەز جەتكىزىلەدى. ءسىز ۆيللاڭىزدان شىقپاساڭىز دا وسى كەشەندەگى بارلىق قىزمەت، بارلىق سۋسىن، بارلىق تاماق تۇرلەرى الدىڭىزعا اپارىلادى. تەڭىزدى الىس دەسەڭىز، كولىك شاقىرىڭىز. تۇرىك تاتتىلەرىمەن ءشاي ىشكىڭىز كەلسە، بۇيىرىڭىز. بالمۇزداق قالايسىز با، تەلەفون شالىڭىز. تاڭعى استى توسەگىڭىزگە اكەلىپ بەرەيىك پە، ونى ايتىڭىز...

انتاليانىڭ اسپانىندا تەڭگەدەي بۇلت جوق. قاز-قاتار ەگىلگەن ءزاۋلىم پالمالاردىڭ كولەڭكەسىمەن جەرورتا تەڭىزىنە جاقىنداپ كەلە جاتتىق.

- توبەسى قامىسپەن جابىلعان مىناۋ ۇيشىكتەر - گاۆانا دەپ اتالادى. بۇل دا سىزدەردىڭ يگىلىكتەرىڭىز. قالاعان گاۆاناڭىزعا ورنالاسىپ، تاڭعى، تۇسكى نەمەسە كەشكى اسىڭىزدى وسىندا ىشكىڭىز كەلسە، تەڭىزگە قاراپ وتىرىپ اۋقاتتانعىڭىز كەلسە، الماس بەي، ايتىڭىز.

مەن ىشپەي ماس، جەمەي توقپىن. كوك شالعىندى ءتىلىپ سالعان اسفالت ءبىتىپ، قۇمداۋىت جاعالاۋ باستالدى. اشىق ايدىننىڭ جاعاسىنا كەلگەندە وڭ جاعىمنان عالامات كورىنىس اشىلدى - جەرورتا تەڭىزىنىڭ كەكجيگەن كوگىلدىر تاۋلاردىڭ ەتەگىن شايىپ جاتقانىن كورىپ ءتىلىم بايلانىپ قالىپتى. وسماننىڭ ءبىر ءسوزىن ەستىسەم، ءبىر ءسوزىن ەستىمەيمىن، و توبا✅

كۇنىمىز تۇتاس سەرۋەنمەن، لارا بارۋت كەشەنىمەن تانىسۋعا كەتتى. توعىز رەستوران، جەتى بار تاماقتى دا، سۋسىندى دا ەسەپسىز تاراتىپ جاتىر. ءوتىپ بارا جاتىپ كوز الدىڭدا سىعىلعان اپەلسين شىرىنىن ءىش، كەتىپ بارا جاتىر ءدامى ءتىل ۇيىرگەن تۇرىك كەبابىن تىستەي كەت، قاباق شىتقان كىسى بولساشى...

كەشكى سالقىنمەن تاعى دا تەڭىز جاعالاۋىنا تارتتىق. ىڭىرانا كۇرسىنىپ جەرورتا تەڭىزى جاتىر. كۇن باتىپ، ىمىرت ەندى ۇيىرىلگەن شاق. تۇرىك ءتۋريزمىنىڭ تاڭعاجايىبىن، انتاليا كەرەمەتىنىڭ تاعى ءبىرىن وسى كەزدە بايقادىم. ءبىز تۇرعان تۇستان 20 شاقىرىمداي جەردە عانا تۇرعان انتاليا اۋەجايىنا الىپ ۇشاقتار ءار وتىز سەكۋند سايىن ۇشىپ قونىپ جاتتى. ءبىر ۇشاق جەر باۋىرلاي بەرگەن كەزدە ەندى ءبىر ۇشاق كوزگە انىق كورىنىپ قاناتى دىرىلدەپ كەلە جاتادى. ال، بۇل كەزدە ءۇشىنشى ۇشاقتىڭ جىلت جىلت ەتكەن جارىعى بۇلت اراسىنان كورىنىپ قاپ كەلە جاتادى. سول ۇشاقتىڭ بارىندە تۇرىكتىڭ تاماشا دەمالىسىنا، كەرەمەت قىزمەتىنە اسىعىپ كەلە جاتقان جولاۋشى تولى ەكەنىنە كۇمان جوق-تى.

ەكىنشى كۇنى ءبىز تاڭعى استان سوڭ Lara Barut Collection باس ديرەكتورىنىڭ ورىنباسارى، انتاليا كەشەنىنىڭ باسشىسى ونۋر چانكايامەن كەزدەستىك. ءوز جۇمىسىن قاتتى جاقسى كورەتىن ءھام وتە جەتىك بىلەتىن ونۋر مىرزا باس اياعى جيىرما مينۋتتىڭ ىشىندە بىزگە بۇكىل كەشەننىڭ جۇمىسىن تولىق بايانداپ شىقتى.

- ءدال قازىر ءبىزدىڭ كورپوراتسيادا 8 000 ادام جۇمىس ىستەپ جاتىر. جازعا دەيىن ۇدايى ءوسۋ ۇستىندە بولادى جانە تامىزدىڭ سوڭىندا ون مىڭ ادامنان استام قىزمەتكەرگە جۇمىس تابىلادى.
- Bayou Villas كەشەنى ىسكە بيىل قوسىلدى. ءبىزدى تاڭداعان دەمالۋشىلاردىڭ كومفورتى ءۇشىن ءبىز بارىمىزدى سالدىق. ۆيللالار ەڭ سوڭعى ۇلگىدەگى قۇرىلىس ماتەريالدارىمەن سالىندى، ىشىندەگى دەتالدارعا قاراجات ايالعان جوق.
- ءبىز قازىر تۇركياداعى تاڭداۋلى قوناقۇيلەر قاتارىندامىز. ال، ءبىزدىڭ ۆيللالارىمىز ستيلىندەگى دەمالىس ورىندارى وتە سيرەك، ءتىپتى جوق دەسەك تە بولادى.
- تۇرىك سەرۆيسى - بۇكىل الەم مويىنداعان ء"بارى قامتىلعان" - "all inclusive" ستيلىمەن تانىمال. ءبىزدىڭ بەس جۇلدىزدى ۆيللالاردا "ultra all inclusive" دارەجەسىندە قىزمەت كورسەتىلەدى. مۇندا ءسىز ءوز ۆيللاڭىزدان شىقپاي-اق بارلىق قىزمەت تۇرلەرىنە يە بولا الاسىز!
- تاماق پەن سۋسىن تۋرالى سىزدەر وتە جاقسى بىلەسىزدەر دەپ سەنەم. دەسەك تە، سىزدەرگە بەيمالىم تاعى ءبىر اقپاراتىم بار. بىزدە "تيرميس" اتتى رەستوران بار. بۇل ءدامحانادا ءدال قازىر ءبىز وتىرعان جەردەن 100 شاقىرىم قاشىق اينالادان عانا اكەلىنگەن ونىمدەر ۇسىنىلادى. ەت تە، كوكونىس تە، ءسۇت تە، ءبارى ءبارى وسى انتاليا ايماعىنىڭ ءتول ءدامى. ءبىز ول رەستورانعا بۇگىن كەشكە بىرگە بارىپ كەشكى اس ىشەمىز-, دەدى ونۋر چانكايا مىرزا.

چانكايا شاپشاڭ سويلەپ، شالت قيمىلدايتىن ازامات ەكەن. مۇمكىن، قىزمەتى دە ۋاقىتتى ءتيىمدى پايدالانۋعا مىندەيتتىن شىعار، ءار مينۋتىن اقپاراتقا تولتىرىپ، سۇراقتارعا دا ناقتى قىسقا جاۋاپ بەرىپ، ءماسليحاتتى اياقتادى.

وسىلايشا ەكىنشى كۇنگە جوسپارلانعان جۇمىستار دا مارەگە جەتتى، ءبىز تاڭعى ون كەزىندە ازات بولدىق. الدىمىزدا تەڭىز، ءتۇرلى سۋسىندار، ءتورت قابات ۇيدەي اتتراكتسيوندار مەن ءدامى ءتىل ۇيىرەر تۇرىكتىڭ باي اسحاناسى تۇر ەدى.

ۆيللامىزعا كەلىپ رەسميلەۋ كيىمدەرىمىزدى سىپىرىپ تاستاپ جاعاجاي دەمالىسىنا ارنالعان كيىمدەرىمىزدى كيىپ اتىپ شىعىستىق. ءومىر بىزدىكى!!!

كەلەسى كۇنى استانا ۋاقىتىمەن ءبىر وياندىم، تەلەفونىما ءۇڭىلىپ جاتىپ تاعى ۇيىقتاپ كەتىپپىن، انتاليا ۋاقىتىمەن تاعى ءبىر وياندىم دا توسەكتەن تۇرا سالا اۋلاداعى باسسەينگە كۇمپ سەكىردىم. مەن بۇنداي ءلاززاتتى ەندى قاشان سەزىنەرىمدى قۇداي ءبىلسىن، سول ءسات "قۇدايدىڭ بەرگەن نىعمەتى عوي" دەپ شەكسىز شۇكىر ەتتىم. راسىندا بۇنداي دەمالىسقا ءار قازاق ءجۋرناليسى نەمەسە بلوگەرى لايىق ەدى، سولاردىڭ ءبىرى كەلۋى ابدەن مۇمكىن-ءدى، بىراق، شەبەر قۇداي الماس التايدى جارىلقاپ تۇر عوي.

تاڭعى استان سوڭ ءبىز وسمان قۇرتتىڭ باستاۋىمەن انتاليانىڭ ەسكى بولىگى - كالە يچي - قالا ءىشى اۋدانىنا تارتتىق. باكۋدىڭ ورتاسىنداعى كونە باكۋدى ءازىربايجان اعايىندار "ىچەرى شەير" - ىشكەرى شاحار دەيدى عوي. بۇل دا تاپ سول سەكىلدى انتاليانىڭ كونە بولىگى، قازىرگى انتاليا سول كالەيچي اۋدانىن قورشاي سالىنعان.

اسەرى عاجاپ بولدى. اسىرەسە، جەرورتا تەڭىزىنىڭ اۋراسى عاجاپ، كوگىلدىر تاۋلارى قول سوزىمدا تۇرعانداي، اق جەلكەندى قايىقتارى مەن سۇيرىكتەر سۇلۋ ياحتالارى مامىراجاي تۇرىك دەمالىسىنىڭ بەلگىسىندەي...

انتاليانىڭ ەسكى بولىگىن جاياۋ كەزىپ، ابدەن شارشاپپىز، تۇسقايتا ۆيللا كەلە قۇلادىم. "دۋشقا تۇسەم بە" دەپ ويلاعام، ۆيللاعا كىرىپ كەلە جاتقاندا مەندە ءبىر ەمەس، ەكى باسسەين بار ەكەنى ەسىمە ءتۇستى. ەكەۋىنە ءبىر بىردەن سۇڭگىپ شىققاندا قۇر اتتاي بوپ جايناپ شىعا كەلدىم. دەگەنمەن، توسەگىمە جاتۋىم مۇڭ ەكەن اڭدىعان "دۇشپان" الىپ جىقتى.

تۋرا كەشكى اسقا بارار كەزگە دەيىن ۇيىقتاپپىن. ۋادە بويىنشا بۇگىنگى كەشكى اس ونۋر چانكايا مىرزامەن بىرگە عوي، "تيرميسكە" كەلسەك اقسيا كۇلىپ كۇتىپ تۇر ەكەە ازاماتىم.

ۇستەلگە جايعاسقان سوڭ ونۋردىڭ ءبىرىنشى سۇراعى "انتاليادا سىزگە ەڭ قاتتى اسەر قالدىرعان نە" دەگەن سۇراق بولدى. قۇداي دا شەبەر عوي، سالىپ تۇر عوي اۋىزعا: - Bayou Villas -, دەدىم جۇلىپ العانداي. ونۋردىڭ قۋانعانىن كورسەڭىز سول كەزدە، ورنىنان تۇرىپ بيلەپ جىبەرۋگە قاپتاعان قىزمەتكەرلەرىنەن قىسىلدى بىلەم، قاتتى ريزا بولعانىن ەرەكشە جايناپ كەتكەن جانارىنان بايقادىم. نەگىزى، ونۋر ءبىز ارالاعان انتاليانى ايتتى عوي، الايدا، مەنىڭ بەرگەن جاۋابىم ونى شەكسىز قۋانتتى.

"تيرميستە" وتكەن كەشكى اس ۇستىندە ونۋر چانكايانىڭ دا، وسمان قۇرتتىڭ دا تۇركيانى شەكسىز جاقسى كورەتىنىن، "تۇرىك بوپ تۋعانى ءۇشىن بەك باقىتتى" ەكەنىن بايقادىم. "تيرميسكە" انتاليانىڭ ءجۇز شاقىرىم اۋماعىنان تازا، بالعىن، ءدامى بۇزىلماعان تابيعي كۇيدە كەپ جاتقان ءار تاعامىنا توقتالىپ، ءار جۇگەرىنىڭ دانىنە دەيىن جانى قالماي ماقتاعاندا تۇرىك جۇرتىنا دەگەن ماحابباتتارى ءۇشىن مىناۋ ەكى ازاماتقا شەكسىز قۇرمەت سەزىمى بيلەدى.

كەشكى استان سوڭ وسمان ەكەۋىمىز شۋلاپ جاتقان كەشكى كەشەندى كەسىپ ءوتىپ امفيتەاترعا بەتتەدىك. مۇندا جىلدىڭ ەڭ تاڭداۋلى ماتچى - ستامبۇلداعى اتاتۇرىك ستاديونىندا چەمپيوندار ليگاسى ءتۋرنيرىنىڭ فينالى ۇلكەن ەكراندا كورسەتىلىپ جاتقان. ءبىرىنشى تايمنان سوڭ ۇيقىم كەلدى، ۆيللاما قايتتىم، ويتكەنى، ەرتەڭ استاناعا ۇشۋىم كەرەك-ءتى.

كەلەسى كۇننىڭ تاڭىندا ءومىرىمنىڭ ادەمى ءۇش كۇنى سۇرىلگەن Bayou Villas كەشەنىنە شىعىپ، وسمان باۋىرىمدى قۇشاعىما قىسىپ، قوشتاسىپ، اۋەجايعا بەتتەدىم.

P.S. ەير استانانىڭ Airbus A 320 NEO لاينەرى ءشاسسيىن انادولى توپىراعىنان كوتەرگەندە "بيىل تاعى ءبىر كەلىپ كەتەرمىز" دەپ ويلاپ ۇلگەردىم.

ازدان سوڭ بورتتاعى پلانشەتتەن فيلم ىزدەپ، جول قىسقارتپاققا نيەت ەتتىم. تاڭداۋىم ماەسترو گاي ءريچيدىڭ "فورتۋنا" وپەراتسياسى: جەڭۋ ونەرى" اتتى كارتيناسىنا تۇسپەي مە؟ سۇيتسەم، باستى رولدە جەيسون ستەيتەم وينايتىن ايگىلى فيلم انتاليادا ءتۇسىرىلىپتى. ءدال كەشە ءوزىم ارالاعان كالەيچي اۋدانىن فيلمنەن تاعى ءبىر كورىپ ءماز بوپ قالدىم. تاماشا سەزىم ەكەن بۇل ءبىر!

وسىلايشا، ءۇش كۇنگە سوزىلعان "جەردەگى جۇماققا" جاسالعان ساپار مارەسىنە جەتتى. انتاليادان العان ايۋان اسەر التى ايعا جەتەرى انىق. وعان دەيىن مۇمكىن انادولىعا تاعى ءبىر كەپ قالارمىز، ءا؟!

Abai.kz