قما ارمان شوراەۆتىڭ ىزىنە نەگە ءتۇستى؟
وسىدان بىرنەشە كۇن بۇرىن قارجىلىق مونيتورينگ اگەنتتىگى «قازاقستان بارىسى» جوباسىنا قاتىستى تەكسەرىس جۇرگىزىلىپ جاتقانىن حابارلاعان ەدى.
«قما الماتى قالاسى بويىنشا دەپارتامەنتى سوتقا دەيىنگى تەرگەۋ اياسىندا «قازاقستان بارىسى» قازاق كۇرەسىنەن تۋرنير وتكىزۋگە بولىنگەن 1,075 ملرد تەڭگە بيۋدجەت قاراجاتىنىڭ جۇمسالۋ زاڭدىلىعىن تەكسەرىپ جاتىر»، - دەلىنگەن اگەنتتىك اقپاراتىندا.
«باسشىلاردان، مەردىگەر وكىلدەرىنەن جاۋاپ الۋ، ءتىنتۋ جانە قۇجاتتاردى الۋدى قامتيتىن تەرگەۋ ارەكەتتەرى جۇرگىزىلىپ جاتىر. تەرگەۋ مۇددەسىن كوزدەيتىن باسقا اقپارات جاريا ەتۋگە جاتپايدى» - دەپ جازىلعان.
ايتا كەتەرى، «قازاقستان بارىسى» جوباسى تانىمال قوعام قايراتكەرى، جۋرناليست، «كتك» تەلەارناسىنىڭ باس ديرەكتورى بولعان ارمان شوراەۆتىڭ باستاماسىمەن قولعا الىنعان.
وسىدان كەيىن ارمان شوراەۆ مىرزا الەۋمەتتىك جەلىدەگى پاراقشاسىندا ءوزى مەن ارىپتەستەرىنە قاتىستى قىسىم جاسالىپ جاتقانىن جازدى.
ارمان شوراەۆ:
جاپ-جاڭا قازاقستاننىڭ جاڭاشىل بيلىگى مەنىڭ اينالامداعى ادامدارعا، ارىپتەستەرىمە، جاقتاستارىما ءتۇرلى سەبەپتەرمەن قىسىم جاساۋدى باستاپ كەتتى. جۋرناليست رەتىندە جاساعان جۇمىستارىمنان ءمىن ىزدەپ، ارحيۆ اقتارۋعا كوشتى. كوپتەگەن جوبالاردى بىرگە جۇزەگە اسىرعان پىكىرلەستەرىمدى زاڭسىز تەرگەپ-تەكسەرۋدە. كەيبىرەۋىن ءتىپتى زاڭسىز شەتەلگە شىعارماي، زاڭسىز تىنتۋلەر جاساۋدا.
سونداعى كوزدەگەندەرى مەنىڭ اۋزىمدى جابۋ! مەن وسى ازاماتتىق اشىق ۇستانىمعا كوشكەندە الدىمنان نە شىعاتىنىن ءبىلىپ كەلگەن اداممىن، شىراقتارىم! مەنىڭ ۇستانىمىمنان اينىتام دەپ تەككە تەرلەمەڭدەر!
مەنىڭ اينالامدى زاڭسىز تىمىسكىلەپ، ادۆوكاتتاردان «ارمان بيلىككە كەلسىن، جولىقسىن، اناۋسىن قويسىن، مىناۋسىن قويسىن» دەگەن سالەمدەمە جولداعاننان تۇك شىقپايدى!
مەن جۇزەگە اسىرعان «قازاقستان بارىسى» جوباسىن دا تىلگە تيەك ەتىپسىڭدەر، اينالايىندار، يدەيا مەنىكى بولعانىمەن، بۇل جوبا قازىر حالىقتىڭ قازىناسىنا اينالعان. اتالارىڭنىڭ اسى مەن ناۋرىزدا عانا ەستەرىڭە تۇسەتىن قازاق كۇرەسىن، تۇيە بالۋانداردى ەلگە تانىتىپ، سونداي جوبا جاساساڭدار، سەندەرگە كىم «قوي» دەدى؟!
مەنى قارالاپ، جەمقور قىلىپ، حالىقتىڭ الدىندا قارابەت قىلۋدى كوزدەگەن ەكەنسىڭدەر، اق جول! ءبىر قۋاناتىنى - قازىر حالىق وزگەرگەن، كوزى اشىق، بيلىك نە ايتسا سوعان قۇلدىق ۇرمايتىن قوعام قالىپتاسىپ كەلە جاتىر! سول ءۇشىن دە سەندەردىڭ ساپارلارىڭ قىسقا!
تيپا ءادىل وتكىزگەن سايلاۋدا ادىلدىكتىڭ كوزىن ويىپ تۇرىپ داۋىسىمدى ۇرلاپ الدىڭدار، بىراق مەنىڭ ازاماتتىق كوزقاراسىم مەن ءسوز بوستاندىعىمدى ۇرلاي المايسىڭدار!
قۇرمەتتى دوس-جاران، نيەتتەس-پىكىرلەستەر، بيلىكتىڭ جاڭا ستيلدەگى قۋعىن-سۇرگىنى مەن سوۆەتسكي شاڭ باسقان قىسىمىنا قىنجىلاتىن مەن ەمەس، مەن اقپىن!
Abai.kz
