ونلاين قۇربان شالۋعا بولا ما؟ بۇل سۇراققا باس ءمۇفتيدىڭ كەڭەسشىسى كەنجەتاي دۇيسەنباي جاۋاپ بەردى.

«بيىل ەلىمىزدە قۇربان شالۋ ءراسىمى وفلاين جانە ونلاين فورماتتا وتەدى. ءدىني باسقارما ەل ازاماتتارىنا، اسىرەسە قالا تۇرعىندارىنا قولايلى جاعداي جاساۋ ماقساتىندا قۇربان شالۋ ءراسىمىن قاشىقتان وتكىزۋگە ارنالعان qurban2023.kz سايتىن ىسكە قوستى. بارشا مۇسىلمان قاۋىمىن ءمۇفتياتتىڭ «راببىڭ ءۇشىن قۇربان شال» قايىرىمدىلىق اكتسياسىنا ۇلەس قوسىپ، ساۋاپتى ىستەردە بەلسەندى بولۋعا شاقىرامىز»، - دەدى كەنجەتاي دۇيسەنباي ورتالىق كوممۋنيكاتسيالار قىزمەتى الاڭىندا وتكەن ءباسپاسوز ءماسليحاتىندا.

قمدب وكىلىنىڭ مالىمدەۋىنشە، قۇربان شالۋ - مۇسىلماننىڭ پارىزى.

«ءدال قازىر قاسيەتتى زۋل-حيججا ايىندا وتىرمىز. بۇل ايدا مۇسىلماندار قۇربان شالادى ءارى بەس پارىزدىڭ ءبىرى بولعان قاجىلىعىن وتەيدى. قازاقستان مۇسىلماندارى ءدىني باسقارماسىنىڭ توراعاسى، باس ءمۇفتي ناۋرىزباي قاجى قازىر قاسيەتتى مەككەدە. قاجىلىق پارىزىن وتەپ جۇرگەن 4 مىڭ وتانداسىمىزدىڭ نيەتى مەن دۇعاسى قابىل بولىپ، ەلىمىزگە امان-ەسەن ورالۋىن تىلەيمىز»، - دەيدى ول.

Abai.kz