2024 جىلدىڭ ءبىرىنشى توقسانىندا، ەگەر ءبارى ءبىز ويلاعانداي بولسا، قازاقستان حالقىنىڭ سانى 20 ميلليون مەجەسىن باعىندىرماق. قازىر وعان 200 مىڭداي جەتپەي تۇر. جانە سول جىلى اقشا بويىنشا ءبىز 60/40 پاريتەتىنە قول جەتكىزەمىز دەپ توپشىلاۋعا بولادى - ياعني حالىق جيناعى جالپى قورجىندا 40% ۇلەسكە يە بولادى. ول قالاي بولماق؟

جالپى كارتينانى تۇسىندىرە كەتەيىن.

قازىر قازاقستان مەملەكەتىندە 127,4 ميلليارد دوللار بار. ونىڭ ىشىندە، ۇلتتىق قوردا 59,2 ميلليارد دوللار، تازا حالىقارالىق رەزەرۆتە 33,5 ميلليارد دوللار، ەركىن اينالىمداعى ۆاليۋتادا 15,5 ميلليارد دوللار، التىندا 19,9 ميلليارد دوللار جاتىر.

ال حالىقتا 73,1 ميلليارد دوللار بار. ونىڭ 35 ميللياردى زەينەتاقى قورىندا، 38,1 ميلليارد دوللارى بانك دەپوزيتەرىندە قوردالانعان. ءبىر ەسكەرەتىنى، حالىق جيناقتارى مەملەكەت جيناعىنا قاراعاندا تەز ءوسىپ كەلەدى. ول ىشكى تۇراقتىلىققا وتە جاقسى اسەر بەرەتىن بولادى. ال يدەالدى ەلدە حالىقتىڭ اقشاسى مەملەكەت قارجىسىنان كوپ بولۋى ءتيىس. ءبىز سوعان بارا جاتىرمىز.

قازىر، حالىق پەن مەملەكەتتى قوسقاندا بىزدە 200 ميلليارد دوللار بار. بار بايلىعىمىز وسى. سالىستىرمالى تۇردە العاندا، بۇل جامان ەمەس. ءبىز ارينە، باي مەملەكەت ەمەسپىز. ورتانقول جانە كوشتەن قالمادىق دەپ ايتۋعا بولادى.

ءبىر قۋانارلىعى، ءسىز بەن ءبىزدىڭ ەلىمىزدە ءبارى جاقسى بولادى. S&P 2026 جىلعا دەيىن، جىل سايىن ەكونوميكامىز 4% ءوسىپ وتىرادى دەگەن بولجامىن ناقتىلادى. ول تەڭىز كەنىشىنىڭ ءوز قۋاتىن ۇلعايتاتىنىنا بايلانىستى. ءدال وسى كەزدە، بۇۇ 2026 جىلعا دەيىن مۇنايعا دەگەن سۇرانىس 23%-عا كوبەيەدى دەپ بولجاپ وتىر. مۇنايدى كوبىرەك وندىرەمىز جانە ونى لايىقتى باعاعا ساتا الامىز.

2030 جىلى ماڭعىستاۋدا گيدروگەن (جاسىل سۋتەگى) ءوندىرىپ، ونى ەۋرووداققا ساتۋى ءتيىس Sveving Group باسشىسى ۆولفگانگ كروپ 50 ميلليارد دوللار ينۆەستيتسياسىن جيناپ ۇلگەردى. جانە جوبالاۋ جۇمىستارىن اياقتاپ، بارلاۋ فازاسىنا كىرىستى. سول سەبەپتى، گەرمانيانىڭ فەدەرالدى پرەزيدەنتى فرانك-ۆالتەر شتاينمايەر قازاقستان باسشىسى قاسىم-جومارت توقاەۆپەن كەزدەسكەننەن كەيىن، ۇكىمەتارالىق دەلەگاتسياعا ۆولفگانگ كروپتى دا ەنگىزگەن بولاتىن. كروپ ماڭعىستاۋدا قازاقستان پرەمەرى ءاليحان سمايىلوۆتى كۇتىپ الىپ، ريتۋالدى كنوپكا باسقىزدى. بارلاۋ كەلەسى جىلى بىتەدى، سونىمەن Hyrasia One جوباسىنىڭ قۇرىلىسى باستالادى.

ينۆەستورلارعا عانا سەنىپ، ىشكى وتاندىق كاسىپكەرلىكتى ۇمىت قالدىرۋ ۇلكەن قاتەلىك بولار ەدى. بۇل رەتتە بار ءۇمىت - ۇكىمەت باستاعان دەمونوپوليزاتسياعا ارتىلىپ وتىر. كەزىندە وتباسىعا جاقىن توپتار بۇتىندەي ءبىر سالالاردى (قانت، مۇناي-گاز، كومىر) ەش باسەكەلەس كەلمەيتىندەي قىلىپ بۋىپ تاستاعان بولاتىن. ول وتاندىق بيزنەستى تازا دەگراداتسياعا ۇشىراتتى. ەگەر دەمونوپوليزاتسيا قارقىندى جانە دۇرىس باعىتتا جۇرەتىن بولسا، ءبىز ونىڭ ناقتى جەمىسىن 2026 جىلدارى جەيمىز.

قازاقستان - پەرسپەكتيۆاسى مىقتى مەملەكەت. S&P, دۇنيەجۇزىلىك بانك اناليتيكتەرى ءار ءسوزىن سالماقتاپ، تەرەڭ زەرتتەۋدەن كەيىن عانا ايتادى. سوندىقتان، ءسىز بەن ءبىز ەرتەڭ كۇلىپ وياناتىن بولامىز.

ايبار ولجاەۆتىڭ الەۋمەتتىك جەلىدەگى جازباسى

Abai.kz