بۇگىن سەگىزىنشى سايلانعان پارلامەنتتىڭ ءبىرىنشى سەسسياسى رەسمي تۇردە جابىلدى.

دەپۋتاتتار بيىلعى 1 قىركۇيەككە دەيىن پارلامەنتتىك كانيكۋل دەپ جاريالاناتىنى تۋرالى ارنايى قاۋلى قابىلدادى. پارلامەنت پالاتالارىنىڭ بىرلەسكەن وتىرىسىندا ءماجىلىس پيكەرى قازاقستان سۋپەرپرەزيدەنتتىك جۇيەدەن پرەزيدەنتتىك رەسپۋبليكا ۇلگىسىنە كوشكەنىن اتاپ ءوتتى.

«ماجىلىسكە العاش رەت 6 ساياسي پارتيا سايلاندى. وسىعان دەيىن ۇزاق ۋاقىت بويى وپپوزيتسيادا بولعان پارتيا پارلامەنتكە ءوتتى. بۇل جولعى سايلانىم قازاقستان تاريحىنداعى ەڭ كوپ پارتيالى پارلامەنت بولىپ وتىر. ءماجىلىس ءتۇرلى كوزقاراستار مەن ساياسي كۇشتەر توعىسقان الاڭعا اينالدى. حالىق قالاۋلىلارىنىڭ جاڭا تولقىنى كەلدى. ءماجىلىس قۇرامى ۇزاق جىلدان بەرى العاش رەت ءبىرمانداتتى وكرۋگتەن سايلانعان، شىنايى ءارى تارتىستى باسەكەدە وزىپ شىققان دەپۋتاتتارمەن تولىقتى. سونىمەن قاتار ايەلدەر مەن ەرەكشە قاجەتتىلىگى بار ادامداردىڭ جانە جاستاردىڭ قاتارى كوبەيدى. سەگىزىنشى سايلانىمدى باسقا شاقىرىلىمدارعا قاراعاندا «ەڭ جاس پارلامەنت» دەپ اتاۋعا بولادى. جاسى ءالى 35-كە تولماعان 13 دەپۋتات قازاقستان جاستارى اتىنان وكىلدىك ەتۋدە»، - دەدى ەرلان قوشانوۆ.

ە.قوشانوۆتىڭ ايتۋىنشا، ءبىرىنشى سەسسيا نەبارى 100 كۇنگە سوزىلعانىمەن، اتقارىلعان مىندەتتەر بويىنشا بۇل سەسسيانىڭ جۇمىسى “وتە ماڭىزدى ءارى مازمۇندى بولدى”.

«بۇل سەسسيا بارىسىندا پالاتالاردىڭ 3 بىرلەسكەن وتىرىسى بولدى. سەناتتىڭ 12 جانە ءماجىلىستىڭ 15 جالپى وتىرىسى ءوتتى. وندا 120-دان استام ماسەلە قارالدى. پارلامەنتتىڭ قاراۋىندا 82 زاڭ جوباسى بولدى، سونىڭ ىشىندە 25 زاڭ قابىلدانىپ، 13 زاڭعا پرەزيدەنت قول قويدى. قازىرگى سايلانىمنىڭ باستى ەرەكشەلىگى – كوپتەگەن ماڭىزدى زاڭ جوبالارىنىڭ دەپۋتاتتاردىڭ باستاماسىمەن ازىرلەنۋى»، - دەدى ءماجىلىس توراعاسى.

ايتا كەتەيىك، بۇدان بۇرىن قوشانوۆ پارلامەنتكە دايىندىقسىز كەلەتىن شەنەۋنىكتەردى سىنعا العان بولاتىن.

Abai.kz