قازاقستاننىڭ قۋعىنداعى وپپوزيتسيالىق ساياساتكەرى، قازىر فرانتسيادا تۇراتىن مۇحتار ءابليازوۆ پوليتسيا ورگاندارى 30 كۇن ىشىندە فرانتسيادان كەتۋدى تالاپ ەتكەنىن حابارلادى. الايدا ونىڭ سوزىنشە، سوت تىڭداۋى بەلگىلەنگەنىنە بايلانىستى ابليازوۆقا فرانتسيادان كەتۋگە تىيىم سالىنعان.

ءابليازوۆتىڭ سوزىنە قاراعاندا، پوليتسيا فرانتسيا سوتىنىڭ جەلتوقسان ايىندا شىعارعان شەشىمىنە سىلتەگەن. ول كەزدە سوت فرانتسيا بەرگەن ساياسي باسپانادان ايىرۋ تۋرالى شەشىمگە كەلىسپەگەن مۇحتار ءابليازوۆتىڭ اپەللياتسيالىق شاعىمىن قاراپ، قايتارىپ تاستاعان.

ءابليازوۆ فرانتسيا سوتىنىڭ شەشىمىنىڭ ساياسي استارى بار جانە بۇرىن-سوڭدى بولماعان جاعداي دەپ اتادى. ونىڭ سوزىنشە، سوت شەشىمىنە "قازاقستاننىڭ توقتاۋسىز قىسىمى" اسەر ەتكەن.

- مەنەن 30 كۇن ىشىندە فرانتسيادان كەتۋدى تالاپ ەتتى. بىراق مەندە نە پاسپورت، نە ۆيزا جوق. بىراق ديكتاتورلار رەجيمىنە قاراعاندا باتىس ەلدەرى سوت جۇيەسى ارقىلى كۇرەسۋگە مۇمكىندىك بەرەدى. ءيا، بۇل جۇيە دە زاڭسىز شەشىم شىعارۋى مۇمكىن. بىراق… ول شەشىممەن سوتتىڭ كەلەسى ينستانتسياسى ارقىلى كۇرەسۋگە بولادى. كوپ جىل كۇرەسىپ، جەڭىپ جۇرگەنىم دە سونىڭ ارقاسى! - دەپ Facebook پاراقشاسىنا جازعان مۇحتار ءابليازوۆ بۇل شەشىمدى دە سوتقا بەرەتىنىن ايتقان.

ءابليازوۆتىڭ ايتۋىنشا، قازاقستان قىلمىستىق ءىس قوزعاۋ تۋرالى فرانتسيا سوتىنا ارىز تۇسىرگەن، تاياۋدا فرانتسيادا سوت تىڭداۋى وتەدى، سول سەبەپتى فرانتسيادان شىعا المايدى.

ءابليازوۆ وزىنە قارسى "جاپپاي مايدان اشىلدى" دەپ مالىمدەدى. ول "ۋكراينامەن سوعىستا پۋتينگە كومەكتەسىپ وتىرعان" قازاقستان پرەزيدەنتى قاسىم-جومارت توقاەۆ پەن ونىڭ كومەكشىلەرىنە سانكتسيا سالدىرۋعا تىرىساتىنىن مالىمدەدى.

مۇحتار ءابليازوۆ 1990 جىلداردىڭ ورتاسىنان باستاپ قازاقستان ۇكىمەتىندە جۇمىس ىستەگەن. 2001 جىلى "قازاقستان دەموكراتيالىق تاڭداۋى" قوزعالىسىن ۇيىمداستىرۋشىلاردىڭ ءبىرى بولعان.

2017 جانە 2018 جىلدارى قازاقستان سوتى مۇحتار ءابليازوۆتى 20 جىلعا سىرتتاي سوتتاعان. قازاقستان بيلىگى ونى "اسا ءىرى كولەمدە اقشا جىمقىردى، 2004 جىلى بيزنەس-سەرىكتەسى ەرجان تاتىشەۆكە جاسالعان قاستاندىقتى ۇيىمداستىردى" دەپ سانايدى. ءابليازوۆ تاعىلعان ايىپتاردىڭ ءبارىن تەرىسكە شىعارعان.

Abai.kz