استانا مەتامورفوزاسى
...ءار قالانىڭ بولادى ەكەن ءوز جانى!
ءھام
سۇيەگى،
قانى،
ارى،
وجدانى،
ساناسى مەن سەزىمى دە،
مۇڭى دا،
وردالى ويدىڭ ورمانى مەن ءسوز باعى!
ارمانى مەن ءۇمىتى دە،
سەنىمى،
قاسيەتى مەن كيەسى دە – ەڭ ۇلى!
تۋادى ولار،
وسەدى ولار،
ولەدى،
قالا ءومىرى – حالىقتاردىڭ ءومىرى!
ال ءولىمى – وركەنيەتتەر ءولىمى!
جاياۋ – جالعىز،
ات ۇستىندە – كوپپىز ءبىز!
توپىراقپىز، جەلمىز، سۋمىز، وتپىز ءبىز!
ساقتا، ءتاڭىر،
جازمىشتى سوكپەدىك،
زاماناعا ءتىل تيگىزگەن جوقپىز ءبىز!
«بار بول!» دەدىڭ...
ءبىز بار بولدىق،
ورلەدىك،
شەر دە كەشتىك،
كەر دە كەشتىك،
ولمەدىك.
مالىمىزدىڭ سانىن – دالامەن ولشەدىك،
بالامىزدىڭ باسىن ساناپ كورمەدىك.
ايباتىمىز – سىرتقا،
ىشكە – قايراتى،
حالىق بولدىق،
قازىققا ات بايلادىق.
قوبىز ارشىپ،
قوڭىر دومبىرا ءھام جەبە
جوندىق،
قىلىش قايرادىق.
ساقتا، ءتاڭىر،
ءالھامدۋللاح، كوپپىز ءبىز!
دومبىرامىز، الداسپانبىز، وقپىز ءبىز!
داۋىرلەردى تەجەمەدىك،
جويمادىق،
ادامزاتقا زيان قىلعان جوقپىز ءبىز!
سۇيدىك ءبارىن!
باۋىر دەستىك،
اتالى
سوزگە قوناق،
تۇراق بەردىك باتالى.
انامىزدىڭ باۋىرى – كەڭ جايلاۋداي،
اتامىزدىڭ قىرىق كوش جەر شاپانى.
جەر بەتىنەن جويىلۋعا شاق قالىپ،
تۇرعاندا دا،
اماناتتى اقتادىق.
قۋعىن كوردىك – قانىمىزدى بۇزبادىق،
اتىلدىق ءبىز – ارىمىزدى ساقتادىق.
ءبىر قىرانعا قايران قىلماس كوپ قۇزعىن،
شەتىن كەتپەي، شەكتەن شىقپاي، شەپ بۇزدىم!
ءبىزدىڭ تاريح اردان عانا تۇرادى،
ۇيالاتىن ەشتەڭەمىز جوق ءبىزدىڭ!
ساقتا، ءتاڭىر!
ساقپىز،
عۇنبىز،
تۇركىمىز،
تۇراندا وسكەن تۇلپار تەكتەس تۇرقىمىز!
ەر توڭعانىڭ،
تونىكوكتىڭ،
تۇماردىڭ،
ءاز تاۋكەنىڭ،
ابىلايدىڭ جۇرتىمىز!
ءسوز كيەسىن،
وي سالماعىن،
جىر قۇنىن،
قاسيەتىن بىلدىك دالا عۇرپىنىڭ،
كوشپەندىنىڭ قارا شاڭىراعىمىز،
وتانىمىز ءۇش ءجۇز ميلليون تۇركىنىڭ!
قونىس قاراپ،
قانشا قالا تۇرعىزدىق،
كوشىن باستاپ،
كەرۋەنىن جۇرگىزدىك.
دۇشپانداردى تالتاڭداتىپ قاشىردىق،
دوسىمىزدى الشاڭداتىپ كىرگىزدىك!
قاق ماڭدايدا حاق ءتاڭىردىڭ وتى بار،
تاڭدايىمدا – تۇركىلەردىڭ داتى بار!
تاراز،
سايرام،
بالاساعۇن،
الماتۋ،
ءسۇياب،
ساۋران،
سارايشىق پەن وتىرار –
قالا سالعان بابالاردىڭ شىراعى،
ءتۇن عاسىرىن جارىق ەتىپ تۇرادى.
كوك كەسەنە،
تۇركىستان مەن
سىعاناق،
بوزوق،
سۇتكەنت – تاريحىمنىڭ تۇمارى!
سودان بەرى قانشا ءداۋىر الماستى،
قانشا كەزەڭ كەزەڭدەرگە جالعاستى.
قانشا قالا قۇم كوشكەندە – جۇتىلىپ،
قانشا كىتاپحانالاردى شاڭ باستى!
ساقتا، ءتاڭىر،
ساقپىز،
عۇنبىز
تۇركىمىز،
ءداشتى قىپشاق،
ءدىن يسلامنىڭ كىرتىمىز!
ءال-فارابي،
ياسساۋي،
ءھام ماحامبەت،
بۇقار،
اباي،
جامبىلداردىڭ جۇرتىمىز!
بەر ءتاڭىرى!
ءتاڭىر بەرگەن تەكتى جۇرتتىڭ دالاسىن،
التاي مەنەن اتىراۋدىڭ اراسىن،
الاتاۋ مەن شىڭعىستاۋدىڭ اراسىن،
كەڭ جايلاعان كۇللى قازاق بالاسىن،
قوساتىنداي ءبىر بيىك،
عاسىرلاردىڭ ىشتە كەتكەن نالاسىن،
عاسىرلاردىڭ ىشتەن بىتكەن جاراسىن،
دوستاردىڭ دا الاسىن،
دۇشپاننىڭ دا تاباسىن،
باساتىنداي ءبىر بيىك،
دۇنيەگە ءار قازاقتىڭ كەسىمىن،
دۇنيەگە ءار قازاقتىڭ شەشىمىن،
دۇنيەگە ءار قازاقتىڭ ەسىمىن،
دۇنيەگە ءار قازاقتىڭ ەسىگىن،
اشاتىنداي ءبىر بيىك
قالا تۋدى!
عاسىرلاردى جارىپ شىققان جان جايلى،
قاراڭعىنى قارىپ شىققان تاڭ جايلى،
قارا قازاق – قايىسپاعان نار جايلى،
ءھام
ار جايلى داستان ەدى بۇل قالا!
كوكىرەكتەن تارقاتىلعان شەر جايلى،
كوكىرەگىن قالقان قىلعان ەر جايلى،
جاراسىنان ەندى ايىققان جەر جايلى،
ءھام
سۇڭعىلا ەل جايلى داستان ەدى بۇل قالا!
ءار عاسىرعا ءبىر-ءبىر تاۋدان جيدىرىپ،
ءار جىلدارعا ءبىر بورەنە ءيدىرىپ،
ءار كۇندەرگە ءبىر-ءبىر كىرپىش قۇيدىرىپ،
ءار ساعاتقا ءبىر شاتىرىن جاپتىرىپ،
ءار مينۋتقا ءبىر-ءبىر شەگە قاقتىرىپ،
ءاربىر ءساتى دايىن تۇرعان ساپ قۇرىپ،
تۋدى داعى وسە بەردى گۇل قالا،
ءار ءسات سايىن بايتەرەگى ىرعالا،
ءار قازاقتى اينالدىرار تۇلعاعا،
تۇلعالىقتىڭ داستانى ەدى بۇل قالا!
ساقتا، ءتاڭىر!
ءالھامدۋللاح، كوكپىز ءبىز!
بايتەرەكپىز، سامۇرىقپىز، دوقپىز ءبىز!
كوزىمىزدى جوعارى ۇستاۋ ءۇشىن دە،
ءسوزىمىزدى تومەن ايتقان جوقپىز ءبىز!
پاڭ استانا،
پاتشا استانا،
ءور بولعان،
مىڭجىلدىقتىڭ قولىنداعى ءمور بولعان،
التى قۇرلىق سالتاناتى وزىندە،
التى الاشقا ءتور بولعان،
اقىن قالا،
اپپاق قالا،
ءاز قالا،
كەربەزدەنە، بوي تۇزەيدى نازدانا،
التى قۇرلىق اڭسارى ءبىر وزىندە،
التى الاشقا ءتاج قالا!
بيىك قالا،
بەكزات قالا،
باق قالا،
سەن – استانا عۇنعا، تۇركى، ساققا دا،
التى قۇرلىق نازارى ءبىر وزىندە،
التى الاشقا تاق قالا!
بەر، ءتاڭىرى!
قالا تۋدى!..
تۋادى،
تۋادى ءالى زامانالار شۋاعى،
تۇرادى ءالى –
ءبىر قالانىڭ وزىندە –
وتىز ميلليون ۇلى قازاق تۇرادى!..
تۇرادى ءالى،
تۇران – ەلدىڭ ءبىر اتى،
قۇزار شىڭعا قول سوزاتىن قۇلاتى،
مەن ارمانشىل ءبىر بالا ەدىم،
ارمانىم –
ءۇش ءجۇز ميلليون ەر تۇركىنىڭ مۇراتى!..
ەرلان ءجۇنىس
Abai.kz
