جىل سايىن ماۋسىم ايىنىڭ سوڭعى دەمالىسىندا قوعامدىق ماڭىزى بار داتا رەتىندە رەسپۋبليكا جۋرناليستەرىنىڭ كاسىبي مەرەكەسى اتالىپ كەلەدى. بۇل كەزدەيسوق ەمەس، ويتكەنى باق جانە جۋرناليستيكا قوعامنىڭ بولىنبەيتىن تۇتاس بولشەگى رەتىندە ونىڭ العا قاراي ۇزدىكسىز دامۋىن قامتاماسىز ەتۋدىڭ بىردەن ءبىر ءتيىمدى تەتىگى بولىپ سانالادى. وسىعان بايلانىستى، بۇل ايتۋلى كۇندى اتاپ ءوتۋدىڭ ءىس-شارالارىن تەك بىركۇندىك سالتاناتتى ماراپاتتاۋلارمەن شەكتەمەي، جۋرناليستيكا سالاسىنىڭ وزەكتى ماسەلەلەرىن جان-جاقتى تالقىلاۋعا ارناۋ قاجەت دەپ سانايمىز. ول ءۇشىن ماۋسىم ايىنان باستاپ جىلدىڭ سوڭىنا دەيىن اقپاراتتىق ناسيحات تۇرىندەگى اكتسيالاردىڭ وتكىزىلگەنى ءجون دەپ بىلەمىز. ءبىزدىڭ ويىمىزشا ولاردىڭ بىرنەشە تاقىرىپتىق باعىتتا ۇيىمداستىرىلعانى دۇرىس.
بىرىنشىدەن، قازاقستاندىق جۋرناليستيكانىڭ تاۋەلسىزدىك جىلدارىندا دامۋ كەزەڭدەرى رەسپۋبليكالىق ماسس-مەديا مايتالماندارىنىڭ ەستەلىكتەرى ارقىلى تاريحي تۇرعىدان مەيلىنشە سارالانعانى كەرەك. سوندا دەموكراتيالىق قۇندىلىقتارعا جالپىلاي توسقاۋىل قويىلعان ساتتەن ولاردىڭ ءبىزدىڭ بۇگىنگى ومىرىمىزگە قايتىپ ورالعان كۇنىنە دەيىنگى ارالىقتا قانداي جەتىستىكتەرگە قول جەتكىزگەنىمىزگە شىنايى باعا بەرە الامىز ءارى بۇل سول ءۇشىن دە ماڭىزدى.
وتاندىق جۋرناليستيكانىڭ نىق ورنىعۋىنا مول ۇلەس قوسىپ، تەرەڭ ءىزىن قالدىرعان، بىراق ومىردەن ەرتە وتكەن جۋرناليستەرگە تاعزىم ەتىپ، ەسكە الۋدان ارتىق ماڭىزدى ەشتەڭە جوق. بۇل تۇرعىدا، استانا قالاسىندا قالامدارىنان نۇر تامعان دارىندى جۋرناليستەردى ەسكە الۋ كەشىن ۇيىمداستىرىپ جۇرگەن «ۇلى دالا قىراندارى» رەسپۋبليكالىق قوعامدىق قوزعالىسىنىڭ باستاماسى تولىق قولداۋعا تۇرارلىق. ەگەر باق وكىلدەرى مۇنداي يگى شارانى ءىلىپ اكەتىپ، تيىسىنشە جۇمىستاردى قولعا الىپ جاتسا نۇر ۇستىنە نۇر بولار ەدى.
باق تاراپىنان سونداي-اق بۇگىنگى كۇنى وتاندىق اقپاراتتىق كەڭىستىكتە جەمىستى ەڭبەك ەتىپ، مەملەكەتىمىزدىڭ ىشكى ساياسي قالىپتىلىعىن نىعايتۋعا، قازاقستاندىقتاردىڭ اقپاراتتانۋ دەڭگەيىن جانە ساياسي مادەنيەتىن كوتەرۋگە، قوعامدا رۋحاني بىرلىكتى، ىزگىلىكتى جانە توزىمدىلىكتى ورنىقتىرۋعا ۇلكەن ۇلەس قوسىپ جۇرگەن جۋرناليستەرگە دە كوڭىل بولىنۋلەرى قاجەت-اق. سوندىقتان، باق بەتتەرىندە ءوز ىستەرىنىڭ بىلىكتى ماماندارى جايلى ەسسە، وچەرك، رەپورتاج، بەينە بايان ءتارىزدى ماتەريالداردىڭ كوپتەپ شىعارىلىپ جاتقانى ابزال.
قازىر ەلىمىزدىڭ مەديا ءورىسى وزگەشە سيپات الىپ، ول جاڭا جانرلارىمەن ەرەكشەلەنەتىن ۆيرتۋالدى باعىتقا قاراي ويىسۋدا. ينتەرنەت داعدىلى اقپارات قۇرالدارىن وزىنە قاراي بەيىمدەي باستادى جانە جەدەل، اقپاراتتىق، ىسكەرلىك جۋرناليستيكادا العى شەپكە شىقتى. ءبىر سوزبەن ايتقاندا، جاڭا ىلگەرىلەۋدىڭ كۋاسى بولىپ وتىرمىز. دەگەنمەن، ءوز كەزەگىندە، بۇل وزەكتى ماسەلەلەرگە دە جول اشىپ وتىر. ولار تىكەلەي جۋرناليستەردىڭ بىلىكتىلىگى مەن جاۋاپكەرشىلىگىنە كەرى اسەرىن تيگىزۋدە. ەندەشە كادرلەردى دايارلاۋ، اسىرەسە اۋداندىق دەڭگەيدە، جانە قايتا دايارلاۋدان وتكىزۋ، جۋرناليستەردى مامانداندىرۋ، ءجۋرناليستىڭ ەتيكا كودەكسىنىڭ ونىڭ كاسىبي قىزمەتىنە تيگىزىپ جاتقان اسەرىن سارالاۋ ءتارىزدى ماسەلەلەردى بۇقارالىق اقپارات قۇرالدارى ءجىتى قاراي وتىرىپ، مەيلىنشە تالقىلاۋعا سالۋلارى كەرەك دەگەن ويدامىز. بۇدان ءبىز ۇتپاساق، ۇتىلمايتىنىمىز انىق.
تەرەڭ تالقىلاۋعا جاتاتىن ماڭىزدى تاقىرىپتىڭ تاعى ءبىر ءتۇزىلىمى – ول   ءجۋرناليستىڭ زاڭ دەڭگەيىندە ستاتۋسىن انىقتاۋ، ونىڭ الەۋمەتتىك ماسەلەلەرىن شەشۋ، باق-تىڭ كۇندەلىكتى جۇمىسىنا كەرى اسەرىن تيگىزەتىن كەدەرگىلەردى الىپ تاستاۋ سياقتى دۇنيەلەرگە سايادى. بىلايشا ايتساق، ازاماتتاردىڭ اقپارات الۋ كونستيتۋتسيالىق قۇقىقتارىن تولىق قامتاماسىز ەتۋ ماقساتىندا «كوپشىلىك اقپاراتقا قول جەتكىزۋ تۋرالى» قر زاڭىن قابىلداتۋعا، جالا مەن نامىسىن قورلاۋ قۇرامىن زاڭنامالىق دەڭگەيدە قىلمىستىق جازادان تەزىرەك ازاماتتىق قۇقىقتىق جاۋاپكەرشىلىك ساناتىنا كوشىرۋگە، مورالدىق زياندى وتەۋ سوماسىنىڭ جوعارى شەكتەرىن بەلگىلەتۋگە، سونداي-اق قاساقانا كەلتىرىلمەگەن مورالدىق زيان ءۇشىن باق جاۋاپكەرشىلىگىن الدىرتىپ تاستاۋعا ىقپال ەتىلۋ قاجەت دەپ سانايمىز. سونىمەن قاتار، جۋرناليستەر كۇنىن اتاپ ءوتۋدىڭ ناقتى مەرزىمى تۇرعىسىندا بىرجاقتى شەشىم شىعارۋ ءۇشىن ۇسىنىستار بەرىلۋ كەرەك دەپ ەسەپتەيمىز.
جوعارىدا ايتىلعانداردى جانە قازىرگى زامانعى جۋرناليستيكانىڭ وزگە دە وزەكتى ماسەلەلەرىن جۇيەلى تۇردە جاريالاپ وتىرۋ ماقساتىندا باق-تا ارنايى ايدارلار اشىلىپ، دەباتتار وتكىزىلسە، توك-شوۋلار ۇيىمداستىرىلسا جانە بۇل ءىس-شارالارعا دەپۋتاتتار، مەملەكەتتىك قىزمەتشىلەر، جۋرناليستەر، ساراپشىلار، قوعامدىق پىكىر سەركەلەرى، قۇقىق قورعاۋشىلار مەن ۇكىمەتتىك ەمەس ۇيىمدار وكىلدەرى، باسقا دا مۇددەلى ورىندار قاتىستىرىلسا دەگەن تىلەك بىلدىرەمىز.