ءبىزدىڭ ماقسات – ۇلتتىق كۇرەسىمىزدى ۇشپاققا شىعارىپ، مايتالماندارىمىزدى ۇلىقتاۋ
ارمان شوراەۆ، «قازاقستان بارىسى» قازاق كۇرەسىن دامىتۋ قورىنىڭ توراعاسى:
– «قازاقستان بارىسى» جوباسى تۋرالى وي قايدان پايدا بولدى؟
– بۇل يدەيانى ويىمدا ءپىسىرىپ جۇرگەنىمە كوپ بولعان. كوپ جىلداردان بەرى قازاق كۇرەسى وليمپيادالىق سپورت تۇرلەرىنىڭ تاساسىندا قالىپ كەلدى. قازاق كۇرەسىنەن ازيا، الەم چەمپيوناتتارى ۇيىمداستىرىلا باستاعانىمەن، ونىڭ رۋحىن كوتەرىپ جىبەرەتىن ءبىر قۇبىلىس كەرەك ەدى. ءبىر ءىسساپارىمىزدا موڭعولياعا جول تارتقانبىز. تۋرا ۇلتتىق كۇرەستەن وتەتىن ءدۇبىرلى سايىستىڭ ۇستىنەن ءتۇسىپپىز. سونداعى تاڭ قالعانىمدى كورسەڭىز عوي! موڭعول ەلىنىڭ تۇكپىر-تۇكپىرىنەن كەلگەن ء ۇش مىڭعا جۋىق بالۋان ەكى كۇن بويى بەلدەسىپ، اقتىق ايقاسقا مىقتىلاردىڭ مىقتىسى عانا جولداما الدى، فينالدىق كەزدەسۋدىڭ ءوزى 3-4 ساعاتقا سوزىلدى. ال قاۋمالاعان جانكۇيەر سانىندا ەسەپ جوق! وسى جارىستىڭ جەڭىمپازى ەلدىڭ ۇلتتىق باتىرىنداي قۇرمەتتەلەدى ەكەن. شىنى كەرەك، مەن موڭعولداردىڭ ءتول كۇرەسىن وسىلاي تورگە شىعارىپ، ۇلكەن شوۋعا اينالدىرا العانىنا قۋاندىم. ال ءوز كۇرەسىمىزدى ءدال سولاي بيىككە كوتەرە الماي جۇرگەنىمىزگە قىنجىلدىم.
قاراڭىزشى، جاپونيا الەمگە سۋموسىمەن تانىمال. كارىستەر تاەكۆوندونى، جاپوندار دزيۋدونى وليمپيادا باعدارلاماسىنا ەنگىزىپ قويدى. سامبونى كوتەرەمىز دەپ ورىستار ءالى جانتالاسىپ ءجۇر.
ارمان شوراەۆ، «قازاقستان بارىسى» قازاق كۇرەسىن دامىتۋ قورىنىڭ توراعاسى:
– «قازاقستان بارىسى» جوباسى تۋرالى وي قايدان پايدا بولدى؟
– بۇل يدەيانى ويىمدا ءپىسىرىپ جۇرگەنىمە كوپ بولعان. كوپ جىلداردان بەرى قازاق كۇرەسى وليمپيادالىق سپورت تۇرلەرىنىڭ تاساسىندا قالىپ كەلدى. قازاق كۇرەسىنەن ازيا، الەم چەمپيوناتتارى ۇيىمداستىرىلا باستاعانىمەن، ونىڭ رۋحىن كوتەرىپ جىبەرەتىن ءبىر قۇبىلىس كەرەك ەدى. ءبىر ءىسساپارىمىزدا موڭعولياعا جول تارتقانبىز. تۋرا ۇلتتىق كۇرەستەن وتەتىن ءدۇبىرلى سايىستىڭ ۇستىنەن ءتۇسىپپىز. سونداعى تاڭ قالعانىمدى كورسەڭىز عوي! موڭعول ەلىنىڭ تۇكپىر-تۇكپىرىنەن كەلگەن ء ۇش مىڭعا جۋىق بالۋان ەكى كۇن بويى بەلدەسىپ، اقتىق ايقاسقا مىقتىلاردىڭ مىقتىسى عانا جولداما الدى، فينالدىق كەزدەسۋدىڭ ءوزى 3-4 ساعاتقا سوزىلدى. ال قاۋمالاعان جانكۇيەر سانىندا ەسەپ جوق! وسى جارىستىڭ جەڭىمپازى ەلدىڭ ۇلتتىق باتىرىنداي قۇرمەتتەلەدى ەكەن. شىنى كەرەك، مەن موڭعولداردىڭ ءتول كۇرەسىن وسىلاي تورگە شىعارىپ، ۇلكەن شوۋعا اينالدىرا العانىنا قۋاندىم. ال ءوز كۇرەسىمىزدى ءدال سولاي بيىككە كوتەرە الماي جۇرگەنىمىزگە قىنجىلدىم.
قاراڭىزشى، جاپونيا الەمگە سۋموسىمەن تانىمال. كارىستەر تاەكۆوندونى، جاپوندار دزيۋدونى وليمپيادا باعدارلاماسىنا ەنگىزىپ قويدى. سامبونى كوتەرەمىز دەپ ورىستار ءالى جانتالاسىپ ءجۇر. ءبىزدىڭ كۇرەس وسى جەكپە-جەك تۇرلەرىنەن اسىپ تۇسپەسە، كەم سوقپايدى عوي.
– مۇنداي اۋقىمدى جوبانى دۇنيەگە اكەلۋ وڭاي شارۋا ەمەس. ول ءۇشىن سپورتقا شىن جانكۇيەرلىك ءبىر بولەك، سول سپورت تۇرىنە قاتىسىڭ دا بولۋى كەرەك شىعار. جاس كەزىڭىزدە سپورتتىڭ قاي تۇرىمەن شۇعىلداندىڭىز؟
– گرەك-ريم كۇرەسىمەن اينالىسقانمىن جاس كەزىمدە. كەزەكتى ءبىر جاتتىعۋدا بەلىمنەن جاراقات الىپ قالىپ، سپورتپەن قوشتاسۋعا تۋرا كەلدى.
– جاڭا جوبا ىسكە قوسىلعالى قازاق كۇرەسى قانداي دەڭگەيگە كوتەرىلدى دەپ ويلايسىز؟
– قازاق كۇرەسى تاياۋدا دۇنيەجۇزىلىك ۋنيۆەرسيادا ويىندارىنىڭ قاتارىنا كىردى. بيىل قازاندا وتەتىن ۋنيۆەرسيادادا قازاق كۇرەسىنەن 4 سالماق دارەجەسى بويىنشا جۇلدە تاراتىلادى. مەن ءۇشىن بۇل ۇلكەن جەڭىس، ارينە. ەندى ازيا جانە وليمپيادا ويىندارىنىڭ تىزىمىنە ەنۋ ءۇشىن قادام جاساۋعا ءتيىسپىز. الگىندە ايتقانىمداي، قازاق كۇرەسىنىڭ بويىنا قان جۇرە باستادى. مۇنىڭ ءبارىن دۇنيەجۇزىلىك قازاق كۇرەسى فەدەراتسياسىنىڭ قۇزىرىنداعى شارۋا عانا دەپ قاراۋعا بولمايدى. ۇلتتىق سپورتتى ۇلىقتاۋ ءۇشىن ءبىر عانا فەدەراتسيانىڭ جۇمىسى جەتكىلىكسىز. ەگەر قازاق كۇرەسىن وليمپيادا ويىندارىنان كورگىمىز كەلسە، تۇتاستاي ءبىر قۇرىلىم جۇمىس ىستەۋگە ءتيىس دەگەن ويدامىن.
بىلتىر «قازاقستان بارىسى» جوباسىنىڭ ىرىكتەۋ تۋرنيرىنە رەس-پۋبليكا بويىنشا 700 مىڭنان اسا سپورتشى قاتىستى. بۇل – حالىقتىڭ 5 پايىزى! ەلىمىزدە مۇنشا ادام كۇرەستىڭ باسقا تۇرىمەن اينالىسپاۋى مۇمكىن. قانىمىزدا سىڭگەن سپورت بولعاننان كەيىن بە، قازاق كۇرەسىنە قىزىعۋشىلاردىڭ قاتارى دا قالىڭداي ءتۇستى. بۇل – ءبىر. ەكىنشىدەن، قازاق كۇرەسىنىڭ ۇيىرمەسىنە جازىلعان قارادومالاقتار سانى دا كۇرت ءوستى. ءتۋرنيردىڭ وتكەن جىلعى فينالدىق سىنى اياقتالعان سوڭ، ءجاسوسپىرىم بالۋاندارعا ارناپ «جاس بارىس» باسەكەسىن وتكىزدىك. ەلىمىزدىڭ ءار ايماعىنان سايدىڭ تاسىنداي ىرىكتەلىپ شىققان 100-دەن اسا بالعىن بالۋان بەلدەستى. اتالعان جاس بۋىن وكىلدەرىنىڭ ىشىندە بولاشاق چەمپيوندار دا ءجۇرۋى مۇمكىن عوي. مەنىڭشە، سوڭعى ەكى جىل ىشىندە حالىقتىڭ قازاق كۇرەسىنە دەگەن ىنتا-ىقىلاسى اۋدى. تەك قانا توي-دۋمانداردا عانا ەسكە تۇسەتىن قازاق كۇرەسى حالىقتىق سيپاتقا يە بولا باستادى.
– 2011 جىلعى العاشقى جارىستىڭ وزىنە تەك قازاق كۇرەسىنىڭ شەبەرلەرى عانا ەمەس، سامبو، دزيۋدو، گرەك-ريم كۇرەسىنەن دە نەبىر «سەن تۇر، مەن اتايىن» دەگەن مىقتىلار قاتىستى. وليمپيادانىڭ كۇمىس جۇلدەگەرى گەورگي تسۋرتسۋميانىڭ ءوزى نەگە تۇرادى؟ ال بىلتىر لوندون وليمپياداسىنا قاتىسۋشى ەرجان شىنكەەۆ تە اپتىعىن باسپاي جاتىپ، كىلەمگە اسىقتى. بۇل ناعىز سپورتتىق قۇمارلىقتان تۋعان ىنتىعىس پا، الدە بايگەگە تىگىلگەن قوماقتى جۇلدەنىڭ اسەرى دەپ ويلايسىز با؟
– مۇنى بالۋانداردىڭ ەنشىسىنە قالدىرعانىمىز ءجون بولار. كىمنىڭ اقشا ءۇشىن، كىمنىڭ ابىروي ءۇشىن كۇرەسىپ جۇرگەنىن انىقتاۋ ءبىزدىڭ مىندەتكە جاتپاس. ءبىزدىڭ ماقسات – ۇلتتىق كۇرەسىمىزدى ۇشپاققا شىعارىپ، مايتالماندارىمىزدى ۇلىقتاۋ. شىنايى شەبەرلەردى ۇلت باتىرى دەڭگەيىنە دەيىن كوتەرىپ، ولاردىڭ ماتەريالدىق جاعىنان تارشىلىق كورمەۋىن قاداعالاۋ كەرەك. ءبىز ءىرى كولەمدەگى سىياقىلاردى سول ءۇشىن تاعايىندادىق. ارينە، بالۋاندارعا، مەنىڭشە، اقشادان بۇرىن، نامىس، ابىروي قىمبات. مۇنى ەكى جىل قاتارىنان وتكەن تۋرنير بارىسىندا بايقادىم. ءبىر سوزبەن ايتار بولساق، «قازاقستان بارىسىنىڭ» اتاعى دا، اقشاسى دا جاقسى! تەك كىم نەنى تاڭدايدى، ماسەلە سوندا...
– وسىعان دەيىن ەكى جارىس وتكىزىپ ۇلگەردىڭىزدەر. وسى ەكى دودانىڭ ءبىر-بىرىنەن ايىرماشىلىعى بولدى ما؟
– ايتارلىقتاي ايىرماشىلىق بايقاعان جوقپىن. ءيا، العاشقى ماۋسىمدا ءبىراز كەمشىلىكتەر ورىن الدى. كوش جۇرە تۇزەلەدى عوي، جىل سايىن كەم-كەتىگىمىزدى جوندەپ، العا باسىپ كەلە جاتقان جايىمىز بار. «قازاقستان بارىسى» دا جاپونياداعى يمپەراتور كەشى سەكىلدى ۇلكەن سپورتتىق-مادەني شوۋعا اينالىپ كەلەدى. ءبىز وسى باعىتتان اينىمايمىز. مويىندايمىن، اۋىل-ايماقتارداعى ىرىكتەۋ كەزەڭىن وتكىزۋ كەزىندە ءبىراز ولقىلىقتار بولدى. الايدا بيىلعى، ءۇشىنشى ماۋسىمنان باستاپ بۇل جاعداي رەتكە كەلەدى دەپ ويلايمىن. سەبەبى «نۇر وتان» پارتياسىمەن ارىپتەس بولدىق. ەلىمىزدىڭ ءار تۇپكىرىندەگى قازاق كۇرەسىنىڭ شەبەرلەرىن انىقتاۋعا اتالعان پارتيا وكىلدەرى دە كومەكتەسەمىز دەپ وتىر.
– بيىل ءۇشىنشى ماۋسىم. بۇل كەزەڭ سپورت جانكۇيەرلەرىنە قانداي جاڭالىق اكەلمەك؟
– بيىل ايتارلىقتاي وزگەرىس جوق. تەك اقتىق باسەكە ادەتتەگىدەن ەرتەرەك وتەدى. فينالدىق ايقاس ەكى جىل قاتارىنان تامىز-قىركۇيەك ايىندا وتكەن بولاتىن. بيىل استانا قالاسىنىڭ 15 جىلدىعىنا ورايلاستىرىپ، فينالدى 30 ماۋسىمدا وتكىزەمىز دەپ شەشتىك. بالۋاندار جىلداعىداي رەسپۋبليكالىق تۋرنيرگە اۋىل، اۋدان، قالا جانە وبلىس كولەمىندە ەكشەلىپ كەلەدى. بىلتىرعى جەڭىمپاز بەيبىت ىستىباەۆ فينالعا بىردەن قاتىساتىن بولسا، تۇڭعىش «بارىس» ۇلان رىسقۇلعا ونداي مۇمكىندىك بەرىلمەيدى، ەل قاتارلى ىرىكتەۋلەردەن وتەدى. بۇل جوباعا ەندى استانا قالاسىنىڭ اكىمشىلىگى دە اتسالىسادى. كورەرمەندەر دە سىيلىقسىز قالمايدى. سونداي-اق سالت-داستۇرلەرىمىزگە قاتىستى ءبىراز يدەيالار بار. ونى ۋاقتىسىندا كورەرسىزدەر.
– اقشا، سىيلىق تۋرالى اڭگىمە قوزعالدى. ەندەشە دەمەۋشىلەر تۋرالى دا ايتا كەتسەڭىز. قارجىلىق قور سول بۇرىنعى دەڭگەيدە قالا ما؟
– قارجىلىق قور سول قالپىندا قالادى. باس جۇلدە العان بالۋانعا – 150, ەكىنشى ورىن يەسىنە – 30, ال قولا جۇلدەگەرگە 10 مىڭ اقش دوللارى كولەمىندە سىياقىمىز بار. باس دەمەۋشىمىز – «سامۇرىق قازىنا» ۇلتتىق ءال-اۋقات قورى. جىلداعىداي جۇلدەگەر بالۋانداردى باپتاعان جاتتىقتىرۋشىلار دا قۇر قول قالمايدى.
– جالپى جارىستىڭ العاشقى جىلى تورەشىلەردىڭ ساۋاتتىلىعىنا كۇمان كەلتىرۋشىلەر بولدى. قازىلاردىڭ قيىس قىلىقتارى بالۋانداردىڭ بولاشاعىنا بالتا شابۋى ابدەن مۇمكىن. سونىمەن قاتار كۇرەس ەرەجەسى مەن كيىمىنە دە ءمىن تاعۋشىلار بار. وسى تۋرالى پىكىرىڭىز قانداي؟
– «قازاقستان بارىسىنا» ءبىز كىم كورىنگەندى الىپ كەلىپ، تورەشى قىلعان جوقپىز. قازاق كۇرەسى فەدەراتسياسى بەكىتكەن بىلىكتى قازىلار جۇمىس ىستەدى. سوندىقتان تورەشىلەر تاراپىنا ايتارلىقتاي ءمىن تاعا المايمىن. مىسالى، الدىڭعى جىلعى تورەشىلەر القاسىن اتاقتى بالۋانىمىز داۋلەت تۇرلىحانوۆ باسقاردى. بىلتىر رزاقۇل نۇرتاەۆ، مارات جاقىت باستاعان تۋرا بيلەردىڭ كومەگىنە سۇيەندىك. اتالعان مامانداردى ءوز ءىسىنىڭ شەبەرلەرى دەپ بىلەمىن.
ال قازاق كۇرەسىندەگى سپورتتىق كيىمدەر مەن الاڭ كولەمى تۋرالى پىكىرلەردىڭ ايتىلۋى زاڭدى. بۇرىنعى زاماندا اتا-بابالارىمىز كىلەم تاڭدادى دەيسىز بە: ءتىپتى، كوك ءشوپتىڭ، شاعىل قۇمنىڭ ۇستىندە دە كۇرەسە بەرگەن. ءبىز دە ءتۋرنيردى ۇيىمداستىرۋ بارىسىندا كۇرەس ەرەجەلەرىنە ايتارلىقتاي جاڭالىق ەنگىزىپ، كىلەم وزگەرتۋدى قۇپ كورمەدىك. قازىر كۇرەس كىلەمدەرىنىڭ پوشىمى بىردەي. قازاق بالۋاندارى كيىپ شىعاتىن سپورتتىق كيىم تۋرالى اڭگىمە دە وسىعان ۇقساس. تاريحقا كوز جۇگىرتسەك، بابالارىمىزدىڭ كوپ جاعدايدا دەنەسىن جالاڭاشتاپ شىعاتىنى ايتىلادى. جەڭىل كۇرتەشە، شاپان، جەيدە كيىپ شىققان دە كەزدەرى بار. بۇل تۋرالى عالىم اعامىز ەلەمەس ءالىمحانوۆتىڭ ەڭبەكتەرىنەن كورۋگە بولادى. قازىرگى قازاق كۇرەسىنە ارنالعان كۇرتەشەنىڭ اۆتورى دا وسى كىسى. قازاق كۇرەسىندەگى ءادىس-ايلالار نەگىزىنەن بىلەكتەن ۇستاۋعا باعىتتالعان. بالۋاندارعا ىڭعايسىز بولماس ءۇشىن قىسقا جەڭ جەيدە كيگەننىڭ ايىبى جوق دەپ ويلايمىن.
– قازىر ءسىز جارىسقا قاتىسىپ، بەلدەسىپ جۇرگەن بالۋانداردىڭ كۇش-قۋاتىن ءبىلىپ، تانىپ قالدىڭىز. وسى «بارىستاردىڭ» قايسىسىنا بۇيرەگىڭىز ەرەكشە بۇرادى؟ جوبا كىمنىڭ باعىن اشتى دەپ ويلايسىز؟
– ەشكىمدى دە بولە جارعىم كەلمەيدى. ءبارى دە «بارىس» اتانۋعا لايىقتى، ەكى يىعىنا ەكى كىسى مىنەردەي قازاقتىڭ نار تۇلعالى جىگىتتەرى! كوز الدىمىزعا قازاقتىڭ ەرجۇرەك باتىرلارىن ەلەستەتەتىن بالۋانداردىڭ ءبارى دە الەۋەتتى. تەك، سپورت بولعان سوڭ، جەڭىمپازدىڭ دا بىرەۋ بولاتىنى زاڭدى. ال جوبانىڭ باعىن اشقان بالۋاندار دەپ جەڭىس تۇعىرىنا كوتەرىلگەن جىگىتتەردى ايتۋعا بولار. بۇگىندە ءاربىر جانكۇيەر ۇلان، بەيبىت، شالقار، ايبەك ەسىمدەرىن قازاقتىڭ ۇلتتىق كۇرەسىمەن بايلانىستىرادى. ياعني قازاق كۇرەسى، «قازاقستان بارىسى» دەگەندە كوز الدىمىزعا وسى بالۋاندار ەلەستەيدى.
– وسى جوبا بويىنشا سىزگە كومەكتەسىپ، قازاق كۇرەسىنىڭ دامۋىنا ەرەكشە ۇلەس قوسىپ جۇرگەن ماماندار تۋرالى نە ايتاسىز؟ جالپى بۇل جوبا «قازاق كۇرەسى» قاۋىمداستىعى جانە كۇرەس فەدەراتسياسىمەن قويان-قولتىق بىرلەسە جۇمىس ىستەي مە، بولماسا جەكە-دارا شابا ما؟
– «جالعىز اعاش ورمان ەمەس». قازاق كۇرەسىنىڭ مارتەبەسىن ارتتىرۋ، الەمگە تانىتۋ تەك ات توبەلىندەي توپقا مىندەتتەلگەن جۇك ەمەس. قازاق كۇرەسىن جاپونداردىڭ سۋموسى سەكىلدى الەم مويىنداسىن دەسەك، بىزگە ءبىر جاعادان باس، ءبىر قولدان جەڭ شىعارىپ، بىرلەسە قىزمەت اتقارۋ كەرەك. دۇنيەجۇزىلىك قازاق كۇرەسى فەدەراتسياسى ءبىزدىڭ سەنىمدى ارىپتەسىمىز. سوندىقتان ءبىزدىڭ بىرلەسكەن قىزمەتىمىز ودان ءارى جالعاسىن تابادى دەپ ويلايمىن.
– بيىل باس قالامىزدىڭ برەندى بولادى دەگەن بىرنەشە سپورت مەكەمەسىنىڭ باسىن بىرىكتىرگەن «استانا» پرەزيدەنتتىك كاسىبي سپورت كلۋبى قۇرىلدى. سولاردىڭ قاتارىندا سىزدەر دە بارسىزدار. ونىڭ «قازاقستان بارىسىنا» تيگىزەر پايداسى قانداي بولادى دەپ ويلايسىز؟
– قازىر ءوز ەلىڭدى الەمگە تانىتۋدىڭ ەڭ جارقىن جولى – سپورت. بۇگىندە قازاقستان دەگەندە، اۋزىنا الدىمەن «استانا» ۆەلوكومانداسى تۇسەتىن شەتەلدىكتەردىڭ تالايىن كوردىم. دەمەك «استانا» برەندى ءوزىن قالىپتاستىرىپ ۇلگەردى. ال پرەزيدەنتتىك كاسىبي سپورت كلۋبىنىڭ قاتارىنا ەنۋ ارقىلى ءبىز قازاق كۇرەسىن الەمگە تانىتا تۇسۋگە مۇمكىندىك الامىز. سەبەبى بۇل جوبانىڭ اۋقىمى كەڭ. الدا ءبىز قازاق كۇرەسىن ۇلتتىق برەند دەڭگەيىنە كوتەرۋ ءۇشىن جۇمىس ىستەي بەرەمىز.
– ءسىز مۇنىمەن قوسا كتك ارناسىنىڭ جەتەكشىسىز. ياعني ەكى كەمەنىڭ قۇيرىعىنان ۇستاپ كەلەسىز. قيىن ءتيىپ جۇرگەن جوق پا؟
– قازاق كۇرەسىنەن وسىنداي اۋقىمدى جوبانى جۇزەگە اسىرۋ ءۇشىن «قازاقستان بارىسى» قازاق كۇرەسىن دامىتۋ قورى قۇرىلدى. ياعني بۇل جوبانى وتكىزۋ بارىسىندا ۇلتتىق سپورتقا جانى اشيتىن ازاماتتاردىڭ باسى بىرىكتى. بۇكىلحالىقتىق سيپات الاتىن مۇنداي ءتۋرنيردى وتكىزۋ ءۇشىن تاۋەكەلگە بەل بۋ كەرەك بولدى. وسىنداي ساتتە ءتول سپورتىمىزدىڭ بولاشاعىنا بەي-جاي قارامايتىن، قازاق سپورتىنىڭ قىر-سىرىن تەرەڭ ۇعىنعان بىلىكتى ماماندار قول ۇشىن سوزدى. ارينە، العاشىندا «بۇل جوبا حالىقتىڭ كوڭىلىنەن شىعادى ما، بولاشاعى قانداي بولادى؟» دەگەن قوبالجۋ بولدى ىشىمدە. بىراق «تاۋەكەل ءتۇبى – جەل قايىق» ەمەس پە؟! انە-مىنە دەگەنشە ەكى ماۋسىم دا ءوتىپ كەتتى. ەلدىڭ پەيىلى دە جامان ەمەس. اتقا مىنۋگە جارايتىن ازاماتتىڭ تىلەگى دە ەلدىڭ ىقىلاسىنا، حالىقتىڭ مەيىرىنە بولەنۋ عوي. ەل ءۇشىن، جۇرت ءۇشىن اتقارىلعان ەڭبەكتىڭ قيىندىعى بولمايدى.
– «حالىق ءسوزى» گازەتىنىڭ وتكەن ۇلۋ جىلىندا جاريالانعان حالىق تاڭداۋىندا «جىلدىڭ ەڭ ۇزدىك مەنەدجەرى» اتالىمىنا يە بولدىڭىز؟ قانداي اسەردەسىز؟
– وسى سۇحباتىمىزدى پايدالانا وتىرىپ، اتالعان ساۋالنامانى جۇرگىزگەن «حالىق ءسوزى» گازەتىنە، ماعان داۋىس بەرگەن ازاماتتارعا زور العىسىمدى بىلدىرگىم كەلەدى. ءار ادام ءۇشىن حالىقتىڭ قۇرمەتىنەن اسقان باعا جوق! ءتىپتى، جەر جۇزىنە داڭقى جايىلىپ، اتاعى اسپانداپ كەتكەن ادام دا حالىقتان ۇلكەن ەمەس. وسى رەتتە ازعانتاي عانا ەڭبەگىمدى باعالاعان سىزدەرگە راحمەت ايتقىم كەلەدى. مەن ءۇشىن ەڭ قىمباتى – حالىقتىڭ ىقىلاسى! بۇقارالىق اقپارات سالاسىندا ەڭبەك ەتىپ كەلە جاتقانىما دا ءبىرتالاي جىل بولعان ەكەن. وسى ۋاقىت ىشىندە مەنىڭ اتقارعان جۇمىسىم ەل كوڭىلىنەن شىعىپ كەلە جاتسا، حالىقتىڭ قالاۋلىسى بولۋ دەگەن سول عوي دەپ ويلايمىن.
حالىق ءۇشىن قىزمەت ەتىپ جۇرگەن سىزدەرگە دە شىعارماشىلىق تابىس تىلەيمىن!
Abai.kz
