رەسپۋبليكادا دەرەكتەردى وڭدەۋدىڭ جاڭا ورتالىقتارىنىڭ قۇرىلىسى جۇرگىزىلۋدە. قوسشى قالاسىندا الماتىداعى ورتالىقتان 3 ەسە قۋاتتى سۋپەركومپيۋتەردى ىسكە قوسۋ جوسپارلانىپ وتىر. بۇل تۋرالى "قازاقتەلەكوم" اق باسقارما توراعاسى باعدات مۋسين ۇكىمەت وتىرىسىندا ايتتى.

قازاقستاندا دەرەكتەردى وڭدەۋدىڭ جاڭا ورتالىقتارىنىڭ قۇرىلىسى جۇرگىزىلىپ جاتىر. بۇل باعىتتا "قازاقتەلەكوم" اق ەلىمىزدەگى دەرەكتەردى وڭدەۋ ورتالىقتارىنىڭ ەڭ ءىرى جەلىسىن باسقارادى. ولار – 1,7 مىڭنان استام سەرۆەرلىك تىرەك، قۋاتى – 25 مۆت، نارىقتىڭ 47%-ى تيەسىلى.

وتكەن جىلدىڭ قازان ايىندا الماتىدا ونىمدىلىگى 1,5 پەتافلوپس بولاتىن AI-Farabium سۋپەركومپيۋتەرى ىسكە قوسىلدى. بۇگىندە ول الەمدەگى ەڭ ءونىمدى سۋپەركومپيۋتەرلەر اراسىندا 103-ورىندا تۇر، ونىڭ ەسەپتەۋ قۋاتى 100% جۇكتەلگەن.

"سونداي-اق، دەرەكتەردى وڭدەۋدىڭ جاڭا ورتالىقتارىنىڭ قۇرىلىسى جۇرگىزىلۋدە، بيىل قاراشا ايىندا قوسشى قالاسىندا الماتىداعى ورتالىقتان ءۇش ەسە قۋاتتى سۋپەركومپيۋتەردى ىسكە قوسۋ جوسپارلانۋدا", – دەپ اتاپ ءوتتى باعدات مۋسين.

بۇدان باسقا "قازاقتەلەكوم" ەكىباستۇز قالاسىندا دەرەكتەردى وڭدەۋ ورتالىقتارىنىڭ القابىن سالۋ جونىندەگى جوبانىڭ وپەراتورى بولىپ بەلگىلەندى. 20-دان استام گيپەرسكەيل-كومپانيالارمەن كەلىسسوزدەر جۇرگىزىلۋدە، 100 مۆت-تان استام الدىن الا سۇرانىس جاساقتالدى.

Abai.kz