قازاقستان تاراپى رەسەيلىك پروپاگاندا ارناسى سانالاتىن "تسارگراد" سايتى مەن ارناسىن بۇعاتتاپ تاستادى. پروپاگاندالىق سايت رەسەيلىك وليگارح كونستانتين مالوفەەۆكە تيەسىلى.

سايتتى بۇعاتتاماس بۇرىن ءتورت مارتە ەسكەرتۋ جاسالعان بولاتىن. سايتتا ەكسترەميستىك باعىتتاعى ماقالالار جاريالانعان. ەسكەرتۋ جاسالىپ، ءوشىرىلۋى ءتيىس ماقالالاردىڭ بىرقاتارى كەلەسىدەي ەدى: «جەڭىس كۇنى قارساڭىندا قازاق ۇلتشىلدارى ورىس ايەلدەرىنە كۇن كورسەتپەۋدە»، «قازاقستاننان ورىستاردى قۋماق بولعان مامبەت كامەرا الدىندا كەشىرىم سۇرادى»، «قازاقستاندا ورىستاردى تىزەرلەتۋدى ويلاي ما؟». ارنا وسىعان ۇقساس سيپاتتاعى ماقالالاردى جازۋدى توقتاتپادى.

قازاقستاندا ءتۇرلى سايتتارعا كىرۋدى باقىلايتىن Kaz Blocking Tracker سەرۆيسى رەسەيلىك سايت پەن ارناعا قازاقستان اۋماعىندا بلوك قويىلعانىن راستادى. قازىرگى ۋاقىتتا tsargrad.tv جانە kz.tsargrad.tv-عا قازاقستان اۋماعىنان كىرە المايسىز.

رەسەيلىك پروپاگاندالىق سايت ازىرگە بۇعاتتاۋعا قاتىستى پىكىر بىلدىرمەدى. «روسكومسۆوبودانىڭ» مالىمەتىنشە  2020 جىلى YouTube «تسارگرادتىڭ» ارناسىن ءوشىرىپ تاستاعان ەدى. ال 2022 جىلى رەسەيلىك اگرەسسيانى جاقتاعان اقپارات كوزى رەتىندە باتىس سانكتسيا سالدى. سايت يەسى كونستانتين مالوفەەۆتىڭ ءوزى دە سانكتسيا تىزىمىندە. ول ۋكراينا شىعىسىنداعى سەپاراتيستەردى قارجىلاندىرعانى ءۇشىن حالىقارالىق ىزدەستىرۋ جۇيەسىنە ەنگىزىلگەن.

Abai.kz