سەنبى, 20 شىلدە 2024
بۇ نە مازاق؟ 2608 11 پىكىر 18 تامىز, 2023 ساعات 14:26

ميتتال ءۇشىن ءتىرى قازاقتىڭ دا، ءولى قازاقتىڭ دا قۇنى جوق...

كۇنى كەشە «ارسەللورميتتال تەمىرتاۋ» يەلىك ەتەتىن قاراعاندى وبلىسىنداعى «قازاقستان» كومىر شاحتاسىندا ءورت بولىپ، 227 كەنشى جەر استىندا قالىپ قويدى. 2 كەنشى قايتىس بولدى، 3 كەنشى ىزدەلىپ جاتىر، 13 كەنشى زارداپ شەككەن. 222 جۇمىسشى جەر بەتىنە شىعارىلىپ، قۇتقارىلدى.

ءۇندى كاسىپكەرىنىڭ قولىنداعى «ارسەللورميتتال تەمىرتاۋ» كومپانياسى يەلىك ەتەتىن قاراعاندى وبلىسىنداعى مەتاللۋرگيا كومبيناتى مەن كومىر وندىرەتىن شاحتالاردا جارىلىس تا كوپ، ادام ءولىمى دە كوپ.

بىلتىر لەنين اتىنداعى شاحتادا جارىلىس بولىپ، سالدارىنان بەس ادام قازا تاپتى. تورتەۋى جارالانىپ، مەتاننان ۋلاندى.

2021 جىلى اباي شاحتاسىندا اپات بولىپ، كومىر مەن گازعا تۇنشىققان التى كەنشى قازا تاپتى.

ميتتال لاكشمي باسقارعان 16 جىلدا تەمىرتاۋدا 100-گە جۋىق جۇمىسشى قازا تاپقان.

2022 جىلى پرەزيدەنت توقاەۆ جيىلەپ كەتكەن ادام ولىمىنەن كەيىن:

«وكىنىشكە قاراي، «ارسەلورميتتال تەمىرتاۋ» كاسىپورنىندا اپاتتار جيىلەپ، قايتالانا بەرەتىن جاعدايعا جەتتى. بۇل – بيىل ادام ولىمىنە الىپ كەلگەن ەكىنشى قايعىلى وقيعا. 2006 جىلدان بەرى مەتاللۋرگيا كومبيناتىندا 20-دان استام اپات بولىپ، 100-دەن اسا ازامات قازا تاپتى.
وسىعان وراي جەدەل تۇردە قاتاڭ شارالار قابىلداۋعا تۋرا كەلەدى. مەن بۇل جونىندە جۋىردا قاراعاندىدا سويلەگەن سوزىمدە ەسكەرتتىم. كاسىپورىنعا كەشەندى تەكسەرۋ جۇرگىزۋ كەرەك. سونىڭ ىشىندە ەڭبەك قاۋىپسىزدىگى مەن بارلىق ەكولوگيالىق نورما تالاپتارىنىڭ ساقتالۋىنا ءمان بەرىلۋگە ءتيىس. كومبيناتتىڭ يەسى تەحنيكالىق جاعدايدى جاقسارتۋعا جانە جاڭعىرتۋعا جەتكىلىكتى دارەجەدە ينۆەستيتسيا قۇيعانىن انىقتاۋ ماڭىزدى. بالكىم بۇل جۇمىسقا زاۋىتتىڭ جاعدايىنا شىنايى باعا بەرەتىن حالىقارالىق كومپانيانى تارتۋ كەرەك شىعار. مۇنداي قايعىلى جاعداي قايتالانباۋى ءۇشىن بارلىق قاجەت شارانى قابىلداۋ كەرەك. ەڭ باستىسى – ازاماتتارىمىزدىڭ دەنساۋلىعى مەن ءومىرى»، – دەگەن بولاتىن.

دەگەنمەن ءبىزدىڭ بيلىك بۇدان ساباق الماعانعا ۇقسايدى. سودان بەرى تالاي ۋاقىت ءوتتى. بىراق تەمىرتاۋداعى اپات ازايعان جوق، كەرىسىنشە ۇدەي تۇسكەن.

توقاەۆ بۇل جولى تاعى دا ەسكەرتۋ جاسادى. ۇكىمەت باسشىسىنا وسى كاسىپورىنعا يەلىك ەتەتىن شەتەلدىك كومپانيامەن جۇمىسشىلاردىڭ قاۋىپسىزدىگىن مۇلتىكسىز قامتاماسىز ەتۋ جونىندە كەلىسسوز جۇرگىزۋدى تاپسىردى. قاراعاندى وبلىسىنىڭ اكىمدىگىنە اپات سەبەپتەرىنە جان-جاقتى تەرگەۋ جۇرگىزۋ، سونداي-اق زارداپ شەككەندەرگە قاجەت بارلىق كومەكتى كورسەتۋ جونىندە تاپسىرما بەردى.

«شەتەلدىك كومپانياعا تيەسىلى كاسىپورىنداردا ءجيى قايتالاناتىن اپاتتار ولاردىڭ ينۆەستيتسيالىق جانە وزگە دە مىندەتتەمەلەرىن ورەسكەل بۇزعانىن كورسەتەدى. اتالعان جاعدايلار ولاردىڭ قازاقستان نارىعىندا قىزمەت ەتۋىنە قاتىستى شەشىم شىعارۋعا ىقپال ەتەدى»،-دەدى پرەزيدەنت.

ەندەشە الداعى كۇندەرى ميتتالعا قاتىستى قاتاڭ شەشىم شىعادى دەپ كۇتەمىز. جاڭا قازاقستان وعان شىعار ەسىكتى نۇسقاۋى ءتيىس...

 

Abai.kz

11 پىكىر

ۇزدىك ماتەريالدار

اباي مۇراسى

اباي ىلىمىندەگى ءومىر ماقساتى نە؟

دوسىم وماروۆ 1310
وي تۇرتكى

المەرەك ابىزدىڭ ورالۋى - ەلگە ءدىننىڭ ورالۋى

باقتىباي اينابەكوۆ 2058
كورشىنىڭ كولەڭكەسى

رەسەي تىلدىك ءھام ساياسي ەكسپانسيانى قالاي جۇرگىزدى؟

بەيسەنعازى ۇلىقبەك 2106