مادەنيەت جانە اقپارات ءمينيسترى ايدا بالاەۆا مەكتەپتە حيدجاب كيۋ ماسەلەسى تۋرالى پىكىر ءبىلدىردى.

«قازىر الەۋمەتتىك جەلىدە مەكتەپتەردە حيدجاب كيۋ ماسەلەسىنە قاتىستى تالقى توقتار ەمەس.

وسىعان بايلانىستى، ءدىني سالاعا جاۋاپتى لاۋازىمدى تۇلعا رەتىندە، ءوز تاراپىمنان تۇسىنىكتەمە بەرۋدى ءجون كورىپ وتىرمىن.

اتا زاڭىمىزعا سايكەس قازاقستاندا ءدىن مەملەكەتتەن بولىنگەن. ءسوز جوق، مەملەكەت ءدىن بوستاندىعىنا كەپىلدىك بەرەدى. بىراق ءبىز - زايىرلى ەلمىز! سول ءۇشىن دە مەملەكەتتىك ساياساتتىڭ بارلىق ماسەلەلەرى ءدىني پاتۋالارمەن ەمەس، ازاماتتىق نورمالارمەن رەتتەلەدى. قۇقىقتىق-ءنورماتيۆتى اكتىلەر ءاربىر وقۋشىعا مەكتەپ قابىرعاسىندا ارنايى بەكىتىلگەن فورما كيۋدى مىندەتتەيدى. ويتكەنى، ءبىلىم بەرۋ ەرەكشەلىگى بىرىڭعايلىقتى تالاپ ەتەدى.

ال كونستيتۋتسيامىز بويىنشا مەكتەپتىڭ مىندەتى – ەل ازاماتتارىنا ساپالى ءبىلىم بەرۋگە كەپىلدىك بەرۋ جانە ونى قامتاماسىز ەتۋ.

سوندىقتان دا، مەكتەپتە بالا ەڭ الدىمەن ساپالى ءبىلىم الۋى كەرەك. سودان كەيىن بارىپ، ەرجەتە كەلە ءدىني نانىم-سەنىمىن، قانداي كيىم ۇلگىسىن كيەتىنىن ءوزى شەشەدى دەپ ويلايمىن»، - دەپ جازدى مينيستر الەۋمەتتىك جەلىدەگى پاراقشاسىندا.

بۇعان دەيىن قازاقستان مۇسىلماندارى ءدىني باسقارماسى مەكتەپتە حيدجاب كيۋ ماسەلەسىنە قاتىستى مالىمدەمە جاساعان ەدى. قمدب باليعات جاسىنا تولعان قىزدارعا مەكتەپتە حيدجاب كيۋگە رۇقسات سۇراپ، ۋاكىلەتتى مەكەمەلەرگە ۇسنىىس جولداعانىن ايتقان.

«قازاقستان مۇسىلماندارى ءدىني باسقارماسى وقۋشى قىزداردىڭ مەكتەپكە ورامال تاعىپ بارۋىنا قاتىستى تۋىنداعان ماسەلەگە ءوز مالىمدەمەسىن جاريالايدى.

يماندى، ءبىلىمدى ۇرپاق تاربيەلەۋ – ءاربىر اتا-انانىڭ باستى ماقساتى.

شاريعات بويىنشا باليعات جاسىنا تولعان مۇسىلمان قىزعا ورامال تاعۋ – پارىز. سول سەكىلدى ءبىلىم الۋدىڭ دا ۇكىمى – پارىز.

ءمۇفتيات شاريعات بويىنشا باليعات جاسىنا تولعان مۇسىلمان قىزعا ورامال تاعۋ پارىز ەكەنىن جوققا شىعارعان ەمەس. سونداي-اق ورامال تاعۋ – ۇلتتىق ءداستۇرىمىز. مۇنى مۇسىلمان قاۋىمى تەرەڭ ءتۇسىنۋى ءتيىس.

الايدا شاريعاتىمىز باليعات جاسىنا تولماعان قىزعا ورامال تاعۋدى مىندەتتەمەيدى. مۇنى دا مۇسىلمان جاماعاتى دۇرىس ءتۇسىنۋى كەرەك.

جىل سايىن جاڭا وقۋ جىلى قارساڭىندا وقۋشى قىزداردىڭ مەكتەپكە ورامال تاعىپ بارۋىنا قاتىستى قوعامدا ءتۇرلى پىكىرلەر ايتىلادى. بۇل ماسەلە ءمۇفتيات قىزمەتكەرلەرىن دە بەيجاي قالدىرمايدى.

قمدب ءوز قۇزىرەتى اياسىندا بۇل ماسەلەگە قاتىستى ۋاكىلەتتى مەملەكەتتىك مەكەمەلەرگە ءتيىستى ۇسىنىستار بەردى. مۇسىلمان جاماعاتىنىڭ ءوتىنىشى ەسكەرىلىپ، وڭ شەشىم قابىلدانادى دەپ ۇمىتتەنەمىز.

اللا تاعالا ەءلىمىزدى ءتۇرلى بۇلىكتەن ساقتاپ، حالقىمىزعا ىنتىماق-بەرەكە ءناسىپ ەتكەي!»،-دەلىنگەن قمدب حابارلاماسىندا.

Abai.kz