مەكتەپتە حيدجاپ كيۋ ماسەلەسى قوعامدا قىزۋ تالقىلانىپ جاتىر. بۇل جىلداعى وقۋ جىلى باستالعاندا كوتەرىلەتىن ۇيرەنشىكتى جاعداي دەسەك تە، قوعامدا مەكتەپتە حيدجاپ كيۋ ماسەلەسى ازاماتتاردى ەكىگە جارىپ وتىر دەۋگە بولادى، دەپ جازادى Arasha.kz.

وسى ماسەلەگە قاتىستى ءمۇفتياتتىڭ رەسمي وكىلى اعابەك قوڭىربايۇلى بۇعان دەيىن دە الەۋمەتتىك جەلىدە پىكىر جازعان بولاتىن. بۇگىن تاعى ءبىر پوست ارنادى.

ءمۇفتيات بۇل ماسەلەنى ءوز قۇزىرەتى، ءدىن مەن ءداستۇر ساباقتاستىعى اياسىندا شەشۋدىڭ وڭتايلى جولىن ۇسىندى. ناقتى ايتقاندا، ءتيىستى مەكەمەگە ورامالدىڭ اق جانە كوك ءتۇسى ۇسىنىلدى. وسىعان قاتىستى ءالى دە وڭ شەشىم قابىلدانار دەگەن ۇمىتتەمىز. اللا الاۋىزدىقتان ساقتاسىن! – دەدى رەسمي وكىل ءوز پاراقشاسىندا.

وسى جەردە اعابەك قوڭىربايۇلى ايتىپ وتىرعان «ءتيىستى مەكەمە» قاي مەكەمە دەگەن زاڭدى سۇراق تۋىندايدى. ارينە، مەكتەپكە قاتىستى بولعاندىقتان، وقۋ-اعارتۋ مينيسترلىگى ەكەنى بەلگىلى.

الايدا وقۋ-اعارتۋ مينيسترلىگىنىڭ ءباسپاسوز حاتشىسى مەرەكە نۇرمۇحانوۆا ءمۇفتيات تاراپىنان مەكتەپتە حيدجاپ كيۋگە قاتىستى ەشقانداي ۇسىنىس تۇسپەگەنىن ايتتى.

Abai.kz