قازاقستان پارلامەنتى سەناتىنىڭ دەپۋتاتى قايرات تاستەكەەۆ: «تەلەارنالاردان شەتەلدىك سەريالداردى كورسەتۋگە شەكتەۋ قويۋ قاجەت», - دەيدى.

دەپۋتات شەتەلدىك سەريالداردىڭ ۇلتتىق-مادەني قۇندىلىقتارعا كەرى اسەر ەتەتىنىن ايتتى جانە وعان بولىنەتىن قاراجاتتى قازاق كينوسىن دامىتۋعا جۇمساعان ابزال ەكەنىن اتادى.

«شەتەلدىك تەلەسەريالدى ساتىپ الۋ ءۇشىن ءبىز بيۋدجەتتەن ميلليونداعان قاراجات جۇمسايتىنىمىز انىق. ەگەر دە وسى بيۋدجەتتە جۇمسالاتىن قاراجاتتى ەلىمىزدە قالدىراتىن بولساق وتاندىق مامانداردى قولداۋ ءۇشىن بىرنەشە ماسەلەنى شەشۋگە بولاتىن ەدى»، - دەيدى دەپۋتات.

ول سونىمەن بىرگە شەتەلدىك كينولاردى شەكتەۋگە قاتىستى حالىقارالىق تاجىريبەگە سۇيەنىپ، ءتيىستى زاڭ جوبالارىنا وزگەرىستەر ەنگىزۋ قاجەت دەدى.

تاياۋدا دەپۋتات ماقسات تولىقباي دا رەسەيلىك تەلەارنالاردىڭ قىزمەتىنە شەكتەۋ قويۋ كەرەك ەكەنىن ايتقان بولاتىن.

«بىزدە قازىر سول رەسەيلىك اقپارات كەڭىستىگىندە ءومىر سۇرەتىن ءبىراز وتانداسىمىز بار. رەسەيدىڭ پروپاگانداسىنا تويىپ العان. ۇلتارازدىق ماسەلەلەرى قىزىلجار بولسىن، باسقا جەرلەردە بولسىن تۋىنداپ تا جاتىر. قاراڭىزدارشى مەنىڭ ۇيىمدە تەلەديدار تۇر. مەنەن ەشكىم رۇقسات سۇراعان جوق. ۇيىمە كىرىپ الدى...سونى كورگەن بالالار ۋلانىپ جاتىر...ولار كىرگەنى ءۇشىن بىزگە اقشا تولەسىن. ءبىز سونى ساعالاپ، شەكتەۋ قويۋىمىز كەرەك»، - دەدى ول الەۋمەتتىك-مادەني دامۋ كوميتەت وتىرىسىندا.

دەپۋتات رەيتينگكە قاراپ، رەسەيلىك باعدارلامالاردى قازاقشا باعدارلامالاردان بيىك قويۋدى دوعارۋ كەرەك ەكەنىن ايتتى.

«رەيتينگ دەگەن پالە بار. تەلەارنالاردىڭ رەيتينگىسى قالاي ولشەنەدى. حالىق سانى 100 مىڭنان اسقان ءىرى قالالاردا 1 نەمەسە 2 ادامنىڭ ۇيىنە قوندىرعى قويادى سونىمەن ولشەيمىز. رەيتينگىگە قاراساڭ بۇكىل قازاق «پۋست گوۆوريات» كورەتىن سياقتى. حالىقتىڭ جارتىسى 40 پياىز قايدا تۇرادى، اۋىلدا تۇرادى. بىراق اۋىلدىقتار بىزدە ەسەپكە الىنبايدى. اۋىلدىڭ تۇرعىندارى ادام ەمەس پە؟ ءبىزدىڭ قازاقشا باعدارلامالاردىڭ عۇمىرى قىسقا بولاتىن دا سوندىقتان»، - دەدى ماقسات تولىقباي.

ونىڭ سوزىنشە، حالىققا قۇندى دۇنيە بەرەتىن، ماعىنالى تەلەباعدارلامالارعا قولداۋ كورسەتىلىپ وتىرعان جوق.

«مىسالى ءۇشىن «دومبىرا» دەيتىن تەلەارنا بار بىزدە. بايعۇس يەسى 4 كامەرەاسى بار، بۇكىل وڭىرلەردى ارالاپ، ءداستۇرلى انشىلەردى، ءبىزدىڭ كۇيشىلەردى ءتۇسىرىپ، يۋتۋبتان بەرىپ جاتىر. نەگە الما TV-عا بولسىن، باسقاسىنا بولسىن نەگە قوسىلمايسىڭ دەسەم، ايىنا 600 مىڭ تەڭگە تولەۋىم كەرەك دەيدى... ءبىر جىلعا 7 ملن. تەڭگە كەرەك. ەكى جىل تولەسە، شىعىنى 14 ملن. بولادى. سودان كەيىن الما TV تەگىن قوسادى دەيدى. ۇلتتىق ونەر، «دومبىرا» سياقتى تەلەارنالاردى نەگە قولدامايمىز. مىسالى «قالاۋلىم» قانشا؟ 3 ساعاتتىق ەفيرىنە 2 ملن. تەڭگە كەتىپ جاتىر. سوندا «دومبىرا» سياقتى ارنالارعا ءبىر جىلدىق بيۋدجەت بەرە المايمىز با؟ مەن سەنبەيمىن، بۇكىل قازاق «پۋست گوۆوريات»، «پولە چۋدەس» كورەدى دەگەنگە. سوندىقتان مينيسترلىك اۋىلدى دا ەسەپكە الۋ كەرەك»، - دەدى دەپۋتات.

مادەنيەت جانە اقپارات ۆيتسە-ءمينيسترى قانات ىسقاقوۆ بۇل ماسەلەنىڭ ناقتى شەشىمىن تاباتىنىن ايتتى.

«رەسەيلىك تەلەارنالاردى كورمەۋ تۇگىلى، ولارعا اقشا تولەيمىز. ياعني ۋدى ءبىز ءوزىمىز ساتىپ الامىز. ەڭ الدىمەن ءبىز تولەم ماسەلەسىن شەشىپ الۋىمىز كەرەك. ءسىز كابىلدى وپەراتورعا ايىنا 5 مىڭ اقشا تولەيسىز عوي. سول بەس مىڭ اقشانىڭ ىشىنەن 3 مىڭىن ولار رەسەيگە تولەيدى. سوندىقتان ءبىز ءبىرىنشى وسى ماسەلەمەن جۇمىس ىستەيمىز. ياعني ءبىز سىرتقى ارنالارعا اقشا تولەمەۋدەن بوساتامىز. ءبىز شەتەلدىك ارنالارعا اقشا تولەسەك، ءوز ارنالارىمىز كابىلدى وپەراتورعا اقشا تولەيدى. قۇداي قالاسا وسى جولى بۇل ماسەلە ناقتى شەشىمىن تاباتىن بولادى»، - دەگەن بولاتىن.

Abai.kz