«جەر استىنان جىك شىقتى ەكى قۇلاعى تىك شىقتى» دەگەن ءسوز ازەربايجاننىڭ تاريحي بولىگى تاۋلى قاراباققا قاراتا ايتىلعانداي.

ونداعى «ارتساح رەسپۋبليكاسىن» ءتىپتى، جاقىنى ارمەنيادا مويىنداعان جوق. ارمەنيادان ءبىر، رەسەيدەن ءبىر قارجىلىق كومەك الىپ، ابدەن داڭدايسىعان ءوڭىردى ازەربايجان 2020 جىلى تاۋبەسىنە كەلتىردى.

«قىرىق ءبىر جاق، قىڭىر ءبىر جاق» دەگەن ءسوزدىڭ شىندىعىن وسى تاۋلى قاراباقتاعى 2020 جىلدان كەيىن بولعان وقيعالاردان كورە الدىق. ءتىپتى، وزدەرىنىڭ جاڭا باسشىسى سامۆەل شاحرامانياندى سايلاپ، ءۇي ىشىنەن ءۇي تىكتى. سوندا سەنگەندەرى اقش پەن فرانتسياداعى ءسوزىنىڭ سالماعى بار ارميان دياسپوراسى بولدى.

بىراق بۇل ءۇمىت اقتالماي، ازەربايجان اسكەرىن كىرگىزگەن سوڭ، قارۋلارىن تاستاپ، ءبىرتۇتاس ازەربايجانىڭ ءبىر بولشەگىنە اينالىپ شىعا كەلدى. 130 مىڭ تۇرعىننىڭ 65 مىڭدايى بۇعان كونبەي، تاۋلى قاراباقتى تاستاپ شىقتى. وسىلايشا سوعىستان كوز اشپاعان وڭىرگە بەيبىت ءومىر ماڭگىگە ورنىقتى.

زاڭسىز سايلانعان تاۋلى قاراباقتىڭ باسشىسى سامۆەل شاحرامانيان جىكشىل رەسپۋبليكانىڭ ءومىر ءسۇرۋىن توقتاتقانى تۋرالى جارلىق شىعاردى. ەندى ءبىز ءوز وقىرماندارىمىزعا وسى جارلىقتىڭ تولىق ءماتىنىن ۇسىنىپ وتىرمىز.

قالىپتاسقان اسكەري-ساياسي جاعدايعا بايلانىستى ارتساح حالقىنىڭ ءدىن اماندىعى مەن ومىرىلىك مۇددەسىن باسشىلىققا الا وتىرىپ، رەسەي بىتىمگەرلىك كونتينگەنتى باسشىلىعىنىڭ اراعايىندىعىمەن ازەربايجان رەسپۋبليكاسىمەن قول جەتكىزگەن كەلىسىمشارتتار نەگىزىندە قارۋىن تاستاپ بەرىلگەن اسكەريلەردى قوسا العاندا، تاۋلى قاراباقتىڭ تۇرعىندارىنىڭ ەركىن، ەرىكتى جانە كەدەرگىسىز ءوز مۇلىكتەرىمەن، جەكە كولىكتەرىمەن لاشىن ءدالىزى بويىنشا ءجۇرىپ-تۇرۋىن قامتامسىز ەتۋ ءۇشىن تاۋلى قاراباق كونستيتۋتسيانىڭ 93 بابىن باسشىلىققا الا وتىرىپ تومەندەگى شەشىم قابىلداندى:

1. 2024 جىلدىڭ 1 قاڭتارىنان باستاپ بارشا مەملەكەتتىك مەكەمەلەر مەن ۇيىمدار جانە وعان باعىنىشتى ۆەدومستۆالار تاراتىلادى جانە تاۋلى قاراباق رەسپۋبليكاسى (ارتساح) ءوز ءومىر ءسۇرۋىن توقتادى.

2. تاۋلى قاراباق تۇرعىندارى، ونىڭ ىشىندە رەسپۋبليكادان تىسقارى تۇراتىندارى اتالعان جارلىق كۇشىنە ەنگەن كەيىن ازەربايجان رەسپۋبليكاسى ۇسىنعان رەينتەگراتسيا جاعدايىمەن تانىسىپ، تاۋلى قاراباق قالۋ (ورالۋ) مۇمكىندىگىندە قاتىستى دەربەس تە، جەكە باستىق شەشىم قابىلداي الادى.

اتالعان جارلىق جاريالانعان كۇنىنەن باستاپ كۇشىنە ەنەدى.

Abai.kz