مەملەكەت باسشىسى قاسىم-جومارت توقاەۆ قازاقستاننىڭ حالىق ءارتىسى بيكەن ريموۆانىڭ تۋعانىنا 100 جىل تولۋىنا ارنالعان «BIKEN» ءى حالىقارالىق تەاتر فەستيۆالىنىڭ قاتىسۋشىلارىنا قۇتتىقتاۋ حات جولدادى.

پرەزيدەنت لەبىزىن جەتىسۋ وبلىسىنىڭ اكىمى بەيبىت يساباەۆ وقىدى.

«سىزدەردى قازاقستاننىڭ حالىق ءارتىسى، مەملەكەتتىك سىيلىقتىڭ يەگەرى بيكەن ريموۆانىڭ تۋعانىنا 100 جىل تولۋىنا ارنالعان «BIKEN» I حالىقارالىق تەاتر فەستيۆالىنىڭ اشىلۋىمەن قۇتتىقتايمىن!

بيكەن ريموۆا – ءتول مادەنيەتىمىزدى وركەندەتۋگە ولشەۋسىز ۇلەس قوسقان ءبىرتۋار تۇلعا. ول تەاتر جانە كينو سالاسىندا اياۋلى جاردىڭ، اسىل انانىڭ، ارداقتى اجەنىڭ بەينەسىن شەبەر سومداپ، ۇزاق جىل بويى كورەرمەننىڭ كوزايىمى بولدى. ساحنا ساڭلاقتارىنىڭ عيبراتتى عۇمىرى تۋرالى ەستەلىك كىتاپتار جازدى.

ومىردە دە، ونەردە دە وزگەلەرگە ۇلگى بولا ءبىلدى»، - دەلىنگەن قۇتتىقتاۋ حاتتا.
Cونداي-اق «حالقىمىزدىڭ پاراساتتى پەرزەنتىنىڭ ەڭبەگىن ۇمىتپاي، جان-جاقتى ناسيحاتتاۋ – ورتاق پارىز. وسى ورايدا تاعىلىمدىق ءارى تانىمدىق ءمانى بار حالىقارالىق فەستيۆال وتكىزۋدىڭ ماڭىزى زور. بۇگىنگى ءىس-شاراعا قاتىسىپ وتىرعان ازەربايجان، قىرعىزستان، وزبەكستان، تۇركيا، تۇركىمەنستان مەملەكەتتەرىنىڭ ونەرپازدارىنا شىنايى ريزاشىلىعىمدى بىلدىرەمىن. وسىنداي جوبالار باۋىرلاس ەلدەردىڭ مادەني-رۋحاني بايلانىسىن نىعايتا تۇسەرى ءسوزسىز. ءتول ونەرىمىزدى دامىتۋعا ارنالعان يگى شارالار بولاشاقتا دا جالعاسا بەرەدى دەپ سەنەمىن.

بارشاڭىزعا زور دەنساۋلىق، باق-بەرەكە تىلەيمىن!»، - دەلىنگەن قۇتىقتاۋ حاتتا.
سونداي-اق جەتىسۋ وبلىسىنا ساپارى اياسىندا فەستيۆالگە ارنايى قاتىسقان قر مادەنيەت جانە اقپارات ءمينيسترى ايدا بالاەۆا قاتىسۋشىلاردى قۇتتىقتاي وتىرىپ، بۇل مەرەكەنىڭ ماڭىزدىلىعىن اتاپ ءوتتى.

«فەستيۆالدى بيكەن ريموۆا ەسىمىمەن بايلانىستىرۋ ونىڭ تالانتىنا تاعزىم ەتۋ عانا ەمەس، سونىمەن قاتار، تەاتر ونەرىنىڭ دامۋىنا ۇلەس قوسقان بارلىق ۇلى ادامداردىڭ شىعارماشىلىعىن ناسيحاتتاۋ دەپ بىلەمىن. اڭىزعا اينالعان اكتريسانى ۇلىقتاۋ ءۇشىن باسقا ەلدەردەن كەلگەن دوستارىمىزعا دا العىس ايتامىن.
ارينە، بۇگىنگى فەستيۆال ءار تەاتر ترۋپپاسىنىڭ الەۋەتىن كورۋگە، جاڭا تۇلعالاردى تانۋعا، ءارتۇرلى ەلدەردىڭ شىعارماشىلىق ۇجىمدارى اراسىنداعى قاراپايىم ادامي قارىم-قاتىناستاردى ورناتۋعا جانە نىعايتۋعا تاماشا مۇمكىندىك بەرەدى»،- دەدى مينيستر.
ەستەرىڭىزگە سالا كەتەيىك، تالدىقورعاندا بيكەن ريموۆانىڭ تۋعانىنا 100 جىل تولۋىنا ارنالعان «BIKEN» ءى حالىقارالىق تەاتر فەستيۆالى ءوتىپ جاتىر. ءىس-شارا اياسىندا ەلىمىزدىڭ جانە شەتەلدەردىڭ تەاتر ۇجىمدارى قويىلىمدار قويىپ، رەسپۋبليكالىق عىلىمي-تانىمدىق كونفەرەنتسيا ءوتىپ جاتىر.

Abai.kz