بۇلىنگەننەن بۇلدىرگى الما دەيدى. بۇل ءبىزدىڭ مەملەكەتتىك كومپانيالارعا قاراتا ايتىلعانداي. نەگە دەيسىز بە، ورتالىق ازياعا دا، بىزگە دە سانكتسيادان كەيىن تۇمسىعى تاسقا سوعىلعان رەسەيلىك كومپانيالار اعىلۋدا.

وسى اعىننىڭ ىشىندە 2014 جىلى رەسەيدىڭ قىرىمدى اننەكسيالاۋىنا بايلانىستى باتىستىق سانكتسيانىڭ قۇرىعىنا العاشىقىلاردىڭ ءبىرى بولىپ ىلىككەن گازپرومبانك بار. باتىس پەن اقش تەك بانكتىڭ وزىنە عانا ەمەس، ونىڭ توپ-مەنەدجمەنتىنە سانكتسيا سالعان بولاتىن.

وسىنداي كىناراتى بار قازاقشا ايتقاندا «بايدان شىققان قاتىنداي» بولعان گازپرومبانكپەن ءبىزدىڭ مەملەكەتتىك كومپانيادىڭ ءبىرى سانالاتىن «تكش قازورتالىعىنىڭ» مەموراندۋمعا قول قويۋىنىڭ استارىندا نە جاتىر دەگەن ويعا ەرىكسىز قالاسىز. سونىمەن «تكش قازورتالىعى» اق باسقارما توراعاسى ءادىلحان ومىرباەۆ پەن گازپرومبانكتىڭ ۆيتسە-پرەزيدەنت – سينديكاتتالعان جانە حالىقارالىق قىرجىلاندىرۋ دەپارتامەنتىنىڭ باسشىسىنىڭ ورىنباسارى اناستاسيا شاكين وزدەرىنىڭ قولدارىن سۇيكەكتەتىپ قويعاندىعىن سەيسەنبى كۇنى قازاقستان رەسپۋبليكاسى ونەركاسىپ جانە قۇرىلىس مينيسترلىگى مالىمدەدى. اتالعان مالىمەمدە «قۇجاتقا سايكەس، تاراپتار قازاقستاندا تۇرعىن ءۇي-كوممۋنالدىق شارۋاشىلىعىن جاڭعىرتۋ مەن دامىتۋ جونىندەگى مەملەكەتتىك باعدارلامانى ىسكە اسىرۋ كەزىندە بانكتىك سۇيەمەلدەۋ تاجىريبەسىن قولدانۋعا نيەتتى.

ءوز كەزەگىندە، گازپرومبانك وسى تەحنولوگيانى باسقا ەلدەرگە ەكسپورتتايتىن جالعىز رەسەيلىك نەسيەلىك ۇيىم بولا وتىرىپ، سەرىكتەسكە ءونىم بويىنشا ادىستەمەلىك، كونسۋلتاتسيالىق جانە باسقا دا ساراپتامالىق قولداۋ كورسەتەدى» دەگەن شىعارىپ سالما ءسوز كەزىگەدى.

100% مەملەكەتتىك ۇلەستەگى كومپانيانىڭ بۇنداي قادامعا بارۋىنىڭ ار جاعىندا رەسەي پايداسىنا جەكەلەندىرۋ بۇعىپ جاتپاسىنا كىم كەپىل؟ مەموراندۋم شارتىنداعى «تۇرعىن ءۇي-كوممۋنالدىق شارۋاشىلىعىن جاڭعىرتۋ مەن دامىتۋ جونىندەگى مەملەكەتتىك باعدارلامانى ىسكە اسىرۋ كەزىندە بانكتىك سۇيەمەلدەۋدە تاجىريبەسى زور» گازپرومبانك تاقىرعا وتىرعىزىپ كەتە مە دەگەن ساۋال جۇرەكتى تىرنايدى.

باتىستىڭ سانكتسيا بۇعاۋى بىلەگىنە 2014 جىلى ىلىنگەن ءوز ەلىنىڭ «تۇرعىن ءۇي-كوممۋنالدىق شارۋاشىلىعىن جاڭعىرتۋ مەن دامىتۋدا» تالاي كوزبوياۋشىلىققا بارعان ءارى مۇنايدان تۇسكەن اقشانى وڭدى-سولدى كوز جۇما جۇمساۋعا ۇيرەنگەن بانكىن ەلىمىزگە كىم جولاتىپ ءجۇر وسى جۇمباقتىڭ شەشۋى قالاي تابىلماق؟

Abai.kz