جۇما, 23 اقپان 2024
اقمىلتىق 2125 12 پىكىر 2 قاراشا, 2023 ساعات 15:44

 «قۇرمەت» نەگە قۇرمەتسىز بولىپ قالدى؟ 

بىزدە وسى وردەن نە مەدال، بولماسا اتاق بەرۋ سەكىلدى ماراپاتتاۋ جالپىلاما شۇلەن تاراتۋ سەكىلدى دۇنيەگە اينالىپ، اياعى ايقاي-شۋمەن بىتەتىندىگى نەسى ەكەن؟

مىنە، ءبىرازدان بەرى الەمجەلدەگى قالىڭ جۇرت انا «قۇرمەت» وردەنىن العان ءانشى ءالي وقاپوۆتى بىتپەس داۋعا اينالدىردى. ءبىر جاعى دۇرىس ەكەن دەپ قولداپ جاتسا، ەكىنشى جاعى ءالى تىم جاس، ەڭبەگى سىڭگەن جوق دەگەن ۇستانىمدا. اقىر اياعىندا، جاس بالا وسى ءبىر ونبەس تىرشىلىكتەن شارشادى، بىلەم، «بۇل ناگرادادان باس تارتامىن» دەپ جاريالادى. ەندى مىنە ەكى ورتادا ەش جازىعى جوق جاس بالانى اۋرە-سارسەڭگە سالىپ قويدىق. ال ماسەلە اليدە ەمەس قوي.

اڭگىمە وسى وردەن-مەدالدى الۋعا لايىقتىلاردى ىرىكتەيتىن مەملەكەتتىك نارادالار جونىندەگى كوميسسيادا سەكىلدى. ولار نەگە «بۇل ۇمىتكەردىڭ حالىقتىڭ الدىندا سىڭىرگەن ەڭبەگى قانداي ەدى، نەسىمەن ەلدى ەرەكشە تاڭ قالدىردى؟» دەگەن سۇراقتار قويماي ما؟ الدە ول كىمنىڭ بالاسى نەمەسە تۋىسى دەگەن كريتەريمەن قاراي ما؟ مۇنىڭ اتىن تامىر-تانىستىق پەن جەڭ ۇشىنان جالعاسۋ دەپ اتايدى. كەزىندە جاس بولسا دا روزا رىمباەۆا تەك «ءاليا» اتتى انىمەن تالاي كونكۋرستا جەڭىمپاز اتانىپ، تەك وداققا قانا ەمەس، بۇكىل الەمگە ايگىلى بولدى ەمەس پە؟ مىنە، ولشەم دەگەن وسى. مەن بۇل جەردە روزا باعلانوۆا، ەرمەك سەركەباەۆتى جانە قازىر كوزى ءتىرى بيبىگۇل تولەگەنوۆانى ءتىپتى ايتىپ وتىرعان جوقپىن.

ەكىنشىدەن، وسى وردەن-مەدال دەگەندەردەن قادىر كەتكەلى قاشان؟ ولاردى قازىر قايدا تاعاسىڭ؟ تويعا ما، كوشەگە مە؟ ونىڭ ۇستىنە، قازىرگى اقشا بيلەگەن زاماندا ءبارى دە ساۋدا ەمەس پە؟ وسىدان ونشاقتى جىل بۇرىن قوستانايداعى ورتاڭقول بيزنەسمەننىڭ ءبىرى سول «قۇرمەت» وردەنىنىڭ قۇنى 20 مىڭ دوللار تۇراتىندىعىن ايتىپ، ءبىر ماقتانعانى بار. سونى «جۋعا» ارنالعان شاعىن جيىندا ەشكىمنىڭ ەشتەڭە دەمەۋىنە قاراعاندا وعان ەشكىم دە تاڭ قالمايتىن سەكىلدى. سودان بەرى ول تاريف ءبىرشاما وسكەن دە شىعار؟

جالپى، ءبىر جاعىنان مەملەكەتتىك ناگردادا دەگەن قالىپتاسقان قاساڭ تۇسىنىكتى مۇلدەم وزگەرتىپ، ولاردىڭ سانىن مەيلىنشە قىسقارتقان دا ءجون شىعار. ءتىپتى ولاردان ءبىرجولاتا باس تارتقانننىڭ دا ارتىقتىعى جوق بولار. شەتەلدەگى وسى ماسەلە جونىندەگى باي تاجىريبەنى دە ەسكەرسەك قايتەدى؟ ويتكەنى بىزدە قانداي دا ءبىر اتاق ءادىل بولىنە بەرمەيدى. لايىقتىلارى كەيدە ەسكەرۋسىز قالادى. ال ۇسىنىلا قالسا، سوڭى ۇلكەن داۋعا ۇلاسادى. ماسەلەن، كەزىندە ءىلياس ەسەنبەرلين كسرو مەملەكەتتىك سىيلىعىنا ۇسىنىلعاندا ۇستىنەن قانشاما ارىز-شاعىم تۇسكەندىگىن قايدا قويامىز؟

قانىش ساتباەۆ تا سوتسياليستىك ەڭبەك ەرىنە ۇسىنىلعاندا دا ءدال وسىنداي جاعداي قايتالانعان.

بۇل نە سوندا، كەزدەيسوق جاعداي ما، الدە قانعا سىڭگەن قاسيەت پە؟ سوڭعىسى بولسا، قايتىپ ەل بولامىز؟

جايبەرگەن بولاتوۆ

Abai.kz

12 پىكىر

ۇزدىك ماتەريالدار

ادەبيەت

قاۋىرسىن

ءالىمجان ءاشىمۇلى 1542
ءالىپبي

لاتىن جايى

بيجومارت قاپالبەك 1604