ادىلەتسىز كەن ورىندارى كەلىسىمدەرىن زاڭسىز دەپ سانايمىز!

بۇگىن قر پارلامەنتى ءماجىلىسىنىڭ جالپى وتىرىسىندا ءماجىلىس دەپۋتاتى قازىبەك يسا قر پرەمەر-ءمينيسترى ءا.سمايىلوۆقا ەلىمىزدەگى ستراتەگيالىق كەن ورىندارىمەن جاسالعان قۇپيا كەلىسىمشارتتاردى قايتا قاراۋ تۋرالى «اق جول» فراكتسياسىنىڭ دەپۋتاتتىق ساۋالىن جولدادى.

قر پرەمەر-ءمينيسترى ءا.سمايىلوۆقا،

1. «اق جول» پارتياسى بيلىك ويلارىنا كەلگەنىن ىستەگەن وتىز جىلداعى مۇناي-گاز، ياعني ستراتەگيالىق كەن ورىندارىمەن جاسالعان قۇپيا كەلىسىمشارتتاردى قايتا قاراۋدى، حالىققا ءتيىمسىز، ادىلەتسىز كەلىسىمدەردى توقتاتۋدى تالايدان بەرى كوتەرىپ كەلەدى.

2. • شەتەلدىكتەرمەن كەن ورىندارى جايلى جاساسقان ءونىمدى ءبولۋ كەلىسىمدەرىن (وبك) اشىق جاريالاۋ كەرەك.

• ستراتەگيالىق كەن ورىندارىنداعى ەلىمىز ۇلەسى 51%-دان از بولماۋىن زاڭمەن بەكىتۋ كەرەك.

• ءبىز حالقىمىزعا قاتىستى ادىلەتسىز بولعان جاعدايدا، ءونىمدى ءبولۋ كەلىسىمدەرىن زاڭسىز دەپ تانۋ كەرەك.

3. ءونىمدى ءبولۋ تۋرالى كەلىسىم دەگەن نە؟ ول – قاشاندا ەلدىڭ ەمەس، تەك ينۆەستوردىڭ مۇددەسى مەن پايداسىن عانا قورعايدى. دامىعان ەلدەردە مۇنداي كەلىسىم جاسالمايدى.

4. مىسالى، باق مالىمەتىنشە، مەملەكەتكە قاشاعانداعى مۇناي مۇحيتىنان تيەتىنى تامشىداي عانا - 2 پايىز؟!

ال قاشاعان قازاقستاندا وندىرىلەتىن بۇكىل مۇنايدىڭ 20 پايىزىن بەرەدى. وسى وراسان مۇناي كەنىشىنەن بىزگە تۇسەتىن پايدا جوقتىڭ قاسى بولسا، بۇل جەردە ەشقانداي دا ينۆەستوردىڭ ەلگە تيگىزەر يگىلىگى جوق!

بۇل-شەتەلدىك ينۆەستور مەن سول كەزدەگى پرەزيدەنت نازارباەۆ ءۇشىن زور كەلىسىم بولعان شىعار، حالىق ءۇشىن قور كەلىسىم بولدى!

ءبىز وسى قورلىققا وتىز جىلعا جۋىق ءتوزىپ كەلەمىز!

5. ءبىزدىڭ شەكەسى تار شەنەۋنىكتەر شەشىمىنە ساي، جەر قويناۋىنىڭ يەسى - قازاقستان حالقى شەتەلدىكتەردىڭ ءوز مەنشىكتەرىن قالاي پايدالانىپ جاتقانىن بىلمەۋى كەرەك؟!

ياعني، بار بايلىعىڭدى توناپ جاتقانداردان «نە ىستەپ جاتسىڭدار؟» دەپ سۇراۋعا بولمايدى ەكەن…

6. كونستيتۋتسياعا سايكەس، قازاقستاندا حالىقارالىق شارتتار پارلامەنت ولاردى راتيفيكاتسيالاعان جاعدايدا عانا ۇلتتىق زاڭنامادان ۇستەم بولا الادى.

ال ءونىمدى ءبولىسۋ كەلىسىمى پارلامەنتتە تالقىلانباعان جانە راتيفيكاتسيالانباعان، سوندىقتان ولار ءبىزدىڭ زاڭدارىمىز بەن كونستيتۋتسيامىزعا باعىنۋى ءتيىس.

7. ءبىز ۇكىمەتكە قۇپيا كەلىسىم (وبك) شارتتارىن جاريالاۋدى تالاپ ەتىپ، ەكى رەت دەپۋتاتتىق ساۋال جولدادىق. ءاليحان سمايىلوۆ مىرزا، ءوزىڭىز باستاپ، ۇكىمەت ەكەۋىندە دە باس تارتتى.

8. قارا التىنىمىز، مۇنايىمىز – ەكونوميكالىق قان تامىرىمىز.

قانىمىزدى كىمدەر قالاي سورىپ جاتقانىن بىلۋگە قاقىمىز بار ما، جوق پا؟

حالىقتان جاسىرىپ، حالىق بايلىعىن شەتەلگە اسىرىپ وتىرعانداردىڭ اتىن بىلۋگە حالىقتىڭ تولىق قاقىسى بار!

2022 جىلى جازدا قازاقستان پرەزيدەنتى قاسىم-جومارت توقاەۆ بۇرىنعى ءونىمدى ءبولۋ تۋرالى كەلىسىمشارتتار 30 جىل بۇرىن باسقا جاعدايدا جاسالعانىن، قازىر ولارعا تۇزەتۋ ەنگىزۋ كەرەكتىگىن ايتتى.

9. قازاقستاندا الەمدىك بانك زەرتتەۋىنشە، سيرەك اسىل قازىنالار جاتقان 5 مىڭ كەنىشتىڭ قۇنى 46 تريلليون دوللاردان اسادى!؟

ال وسى التىن قازىنانىڭ ۇستىندە جالاڭاياق وتىرعان ەلدە بالالارىنا ءسۇت ساتىپ اپەرە الماي وتىرعاندار از ەمەس…

مۇنايىنا يە بولعاندار قۇدايىنا باعىنعىسى كەلمەي جاتقان زاماندا ءبىز مۇناي مەن گازدىڭ ۇستىندە تەزەك جاعىپ وتىرىپ، وزگە ەلدەردىڭ سوڭىندا تەزەك تەرىپ قالدىق.

10. ءيا، وتىز جىل جاسىرىلعان مينالار جارىلا باستادى.

قاڭتار قاسىرەتى دە، قاراعاندى قايعىسى دا سول جارىلىستار!

ادەتتەگىدەي، كەزەكتى رەت بولىپ وتىرعان قاراعاندىداعى قارالى وقيعالار جۇزدەگەن ادام ءومىرىن قيدى. كەنشىلەردىڭ قاۋىپسىزدىگىن، ءومىرىن ويلامايتىن، تەك تەمىرى مەن كومىرىن ويلايتىن، كومىر قازۋشىلاردى وزدەرىنە قابىر قازۋشىلارعا اينالدىرعان قانداي كەلىسىم-شارت ول؟!

قاپتاعان قابىرلەردىڭ ۇستىندە ميتتالدىڭ ميللياردتار ساناۋى، ال ءبىزدىڭ قۇرباندىقتار ساناۋىمىز قاشان توقتايدى؟!

11. حالىق تۇبەگەيلى وزگەرىستى، ادىلەتتى قازاقستاندى ەرتەڭ ەمەس - بۇگىن، قاعاز جۇزىندە ەمەس - ومىردە كورگىسى كەلەدى!

ۇسىنىستار:

1. بارلىق ادىلەتسىز جاسالعان كەن ورىندارى كەلىسىمدەرىن زاڭسىز دەپ سانايمىز! ولارعا تۇگەل اۋديت جاسالۋى ءتيىس.

2. الداعى ۋاقىتتا جەر قويناۋىن پايدالانۋ كەلىسىمشارتتارىندا قوعام ءۇشىن جابىق باپتار مەن نورمالاردى قولدانۋعا تىيىم سالۋدى تالاپ ەتەمىز.

3. كونستيتۋتسيا نورماسىنا ساي ستراتەگيالىق كەن ورىندارداعى قازاقستاننىڭ ۇلەسىن 51%-دان از بولماۋىن زاڭمەن بەلگىلەۋدى ۇسىنامىز.

قۇرمەتپەن، «اق جول» فراكتسياسى.

Abai.kz