ۇلتتىق ستاتيستيكا بيۋروسى 2021 جىلعى حالىق ساناعىنىڭ قورىتىندىسى بويىنشا نەكە جانە وتباسى، سونداي-اق ءۇي شارۋاشىلىقتارى بويىنشا كەزەكتى جيناقتى شىعاردى.

وندا ايماقتار، جىنىس جانە جاس قۇرامى بولىنىسىندەگى كورسەتكىشتەردى، سونداي-اق سوڭعى ەكى ساناق اراسىنداعى ديناميكالىق وزگەرىستەردى كورۋگە بولادى.

نەكەدە تۇرعان ەرلەر مەن ايەلدەردىڭ سانى 2009 جىلى 6,6 ميلليوننان 2021 جىلى 8,2 ميلليونعا دەيىن ءوستى

2021 جىلعى ساناق قورىتىندىسى بويىنشا حالىقتىڭ 60,9% نەكەدە بولعان، وسىلايشا نەكەدە تۇرعان ازاماتتاردىڭ سانى — 8,2 ملن ادام.

ونىڭ ىشىندە 9% — قايتا نەكە قۇرعاندار.

جالپى حالىقتىڭ 28% — ەشقاشان ۇيلەنبەگەن، 5,3% — جەسىر، ال قالعان 5,8% — اجىراسقاندار.

ساناق ناتيجەسى ءۇي شارۋاشىلىقتارى سانىنىڭ 27,9% وسكەنىن كورسەتتى — 2009 جىلعى 4,3 ملن بىرلىكتەن 2021 جىلى 5,6 ملن بىرلىككە دەيىن.

قالالىق جەرلەردە ءۇي شارۋاشىلىقتارىنىڭ 3,7 ملن (66,4%), اۋىلدىق جەرلەردە — 1,8 ملن (33,6%) بىرلىگى ەسەپكە الىندى.

قازاقستان بويىنشا ءۇي شارۋاشىلىقتارىنىڭ ورتاشا مولشەرى 3,4 ادامدى قۇرادى.

بۇل رەتتە اۋىلدىق جەردەگى ءۇي شارۋاشىلىقتارىنىڭ ورتاشا مولشەرى قالالىق جەرلەرگە قاراعاندا ارتىق، تيىسىنشە 3,9 جانە 3,1 ادامنان.

ءۇي شارۋاشىلىقتارىنىڭ ەڭ جوعارى ورتاشا مولشەرى ماڭعىستاۋ، اتىراۋ، قىزىلوردا جانە تۇركىستان وبلىستارىندا بايقالدى — 4,3-تەن 5,2 ادامعا دەيىن.

ايتا كەتەيىك، الماتى، شىعىس قازاقستان، قاراعاندى وبلىستارى بويىنشا دەرەكتەر ساناق وتكەن ۋاقىتقا، ياعني ولار بولىنگەنگە دەيىن بەرىلگەن.

Abai.kz