ءماجىلىس قازاقستان مەن فرانتسيا ۇكىمەتى اراسىنداعى جاھاندىق جىلىنۋعا قارسى كۇرەس سالاسىنداعى ىنتىماقتاستىقتى ىسكە اسىرۋ تۋرالى ارنايى كەلىسىمدى راتيفيكاتسيالايتىن زاڭدى قابىلدادى. كەلىسىم اياسىندا جامبىل وبلىسىندا قۋاتى 1 گۆت بولاتىن جەل ەلەكتر ستانتسياسىن سالۋ كوزدەلگەن.

«ارنايى كەلىسىمنىڭ ماقساتى – قازاقستان اۋماعىندا جاڭارتىلاتىن ەنەرگيا كوزدەرىن ورنىقتى دامۋ سالاسىنداعى ءىرى جوبالاردى ازىرلەپ، ىسكە اسىرۋ. كەلىسىم شەڭبەرىندە جامبىل وبلىسىنداعى ميرنىي كەنتىنىڭ ماڭىندا جالپى قۋاتى 1 گۆت جەل ەنەرگياسىن پايدالاناتىن جەل ەلەكتر ستانتسياسىنىڭ جوباسىن سالۋ جوسپارلانعان. جوبانى ىسكە اسىرۋ 2030 جىلعا قاراي جاڭارتىلاتىن ەنەرگيا كوزدەرىنىڭ ەنەرگەتيكا جۇيەسىندەگى ۇلەسىن 15%-عا قول جەتكىزۋدى كوزدەيتىن ينديكاتورلارعا قول جەتكىزۋگە، سونداي-اق جىل سايىنعى كومىرقىشقىل گازىنىڭ شىعارىندىسىن قىسقارتۋعا مۇمكىندىك بەرەدى»، - دەدى قۇجاتتى تانىستىرعان ەنەرگەتيكا ءمينيسترى الماسادام ساتقاليەۆ.

ونىڭ سوزىنشە، جوبا اياسىندا 250-گە دەيىن تۇراقتى جۇمىس ورنى، 2500-گە دەيىن ۋاقىتشا جۇمىس ورنى قۇرىلماق.

شامامەن 820 ميلليارد تەڭگە ينۆەستيتسيا تارتىلىپ، قوسىمشا 3,6 ملرد كۆت/ساع جاسىل ەنەرگيا وندىرىلمەك.

«وزدەرىڭىز بىلەتىندەي، قازىرگى تاڭدا ەۋروپا ەلدەرى كومىرتەگى سالىعىن ەنگىزۋ باعىتىندا جۇمىس ىستەپ جاتىر. جاسىل ەنەرگيا گەنەراتسيالايتىن قوسىمشا قۋاتتاردى ەنگىزۋ قازاقستاندىق تاۋارلاردىڭ حالىقارالىق نارىقتاعى باسەكەگە قابىلەتتىلىگىنە وڭ اسەرىن تيگىزەدى»، - دەدى ەنەرگەتيكا ءمينيسترى.

ۆەدومستۆو باسشىسى جوبا ينۆەستوردىڭ قاراجاتى ەسەبىنەن ىسكە اساتىنىن اتاپ ءوتتى.

دەپۋتاتتار كەلىسىمدى راتيفيكاتسيالاۋ جونىندە شەشىم قابىلدادى.

Abai.kz