وراسان كوپ اقشا جۇرگەن جەردە ايقاي-شۋسىز، ۇرىس-كەرىسسىز ءومىر قاشاندا قىزىقسىز عوي. وسىنداي ءبىر ۇلكەن داۋ ءبىزدىڭ قوستانايدا دا باستالدى.

ۇستىمىزدەگى جىلدىڭ شىلدە ايىندا وبلىس اكىمى قۇمار اقساقالوۆ كورشىمىز رەسەيدەگى «ۆولگا»، «ۋفا»، «تورپەدا زيل» سەكىلدى فۋتبول كلۋبتارىندا ويناعان، كەيىن وزبەكتەردىڭ «ناۆاحور» كلۋبىنا باپكەر بولىپ اۋىسقان اندرەي كانچيلكيس دەگەندى اناۋ-مىناۋ ەمەس، وسىنداعى «توبىل» فۋتبول كلۋبىنىڭ باس ديرەكتورلىق قىزمەتكە قولقالاپ شاقىرىپ الدى. قوياردا ماقتاۋىن جەتكىزىپ باقتى. ونسىز كۇنىمىز قاراڭ سەكىلدى.

ەندى وسىدان ءۇش اي بۇرىن ءتىپتى، تابىنۋعا اينالعان بۇل مىقتىمىز ءبىر-اق كۇندە تابىستى قىزمەتىنەن ايىرىلىپ قالدى. اتالمىش كلۋبتىڭ ءباسپاسوز قىزمەتىنىڭ حابارلاۋىنشا، بۇل باس ديرەكتورمەن كەلىسىم-شارت بۇزىلىپ، وسىناۋ اسا تالانتتى اداممەن ماڭگىلىك قوش ايتىسىپپىز. مۇنى وسى كلۋبتىڭ قوسالقى قۇرىلتايشىسى ءالىمجان قالدياروۆ تا راستادى.

وسىمەن اڭگىمە ءبىتتى دەسەڭىزدەر، قاتتى قالەلەسىزدەر. قىزىق پەن شىجىق ەندى باستالدى. جاقىندا، كۇنى كەشە عانا اندرەي دەگەن باتىرىڭىز: «مەن بۇل قىزمەتتەن ءوز ەركىممەن كەتكەن جوقپىن. قازىر كەزەكتى ەڭبەك دەمالىسىندامىن. مەنى قۋدالاپ جاتىر. كەرەك بولسا حالىقارالىق فيفا مەن ۋەفا كلۋبتارىنا شاعىمدانامىن»، - دەپ ايبات شەگىپ جاتىر. مۇنىسىمەن قويماي ول «توبىلدىڭ» يەسىنىڭ ءبىرى، الگى ءالىمجان قالدياروۆتى دا قىرىنا العان سەكىلدى. ونىڭ كەيبىر كەلەڭسىز ىستەرىن بىلەتىندىگى جونىندە ەمەۋرىن جاسايدى.

ارينە، جىلىنا 2 ميلليارد تەڭگەدەن استام قاراجات قۇيىلاتىن جەردەگى مايلى جىلىككە بەرگىسىز ۇلكەن لاۋازىمدى كوزى قيىپ تاستاپ كەتەتىن كەلىمسەك اندرەي سونشا ءيىس الماس بىرەۋ دەيسىزدەر مە؟ ونىڭ ۇستىنە ءوزىمىز قوياردا-قويماي قولقالاپ شاقىرىپ الساق؟ تاپقان ەكەنسىڭدەر، اقىماقتى.

سونىمەن ەلىمىزگە بەلگىلى اتاقتى فۋتبول كلۋبىنان ەندى دۇنيەجۇزىنە تارايتىن داۋ تۋىنداپ جاتىر. ال وسى كلۋبتىڭ قوجايىنى، وبلىس اكىمى قۇمار اقساقالوۆ ەشتەڭە بولماعانداي تىم-تىرىس. وبلىستىڭ فۋتبول جانكۇيەرلەرى بولسا، بۇل ماسەلەنى سان-ساققا جۇگىرتىپ، وزدەرىنشە دۇرلىگىپ جاتىر.

اياعى نە بولار ەكەن؟

جايبەرگەن بولاتوۆ

Abai.kz