قازىر قازاق اۋدارماسى نارىققا بەيىمدەلمەي، جەتىم بالانىڭ كۇيىن كەشىپ وتىرعانى جاسىرىن ەمەس. ۇلتتىق اۋدارماعا قاتىستى ءبىر اۋىزعا الارىمىز، «سەمەي - رۋحاني استانا» دەپ تەگىن اتالماعاندىعىن وسى ايماقتاعى دوستوەۆسكي اتىنداعى مۋزەي تانىتتى.

تانىتتى دەگەنىمىز – وبلىس ورتالىعىنداعى جاس اقىندار اراسىندا وق بويى وزىق تۇراتىن دارىن ەرىك قايراتبەكۇلى قازىرگى قازاق اۋدارماسىنىڭ پروبلەمالارى مەن بولاشاعىنا قاتىستى «مەنىڭ جانىم ولەڭنەن دەم الادى» اتتى شىعارماشىلىق كەزدەسۋىن وتكىزدى.

وسى كەزدەسۋدىڭ وتۋىنە اتالعان مۋزەيدىڭ باسشىلىعى مۇرىندىق بولدى.

كەزدەسۋگە قالامىزدىڭ N 36 جانە 22 مەكتەپتەرىنىڭ ۇستازدارى جانە ونىمەن بىرگە ونەرگە تالابى بار جاس وركەن شاكىرتتەر دە قاتىستى. وسى شىعارماشىلىق كەزدەسۋ بارىسىندا ەرىك قايراتبەكۇلى بەلگىلى ادەبيەتتانۋشى، Abai.kz پورتالىنىڭ اباي وبلىسى بويىنشا وكىلى ءابىل-سەرىك ابىلقاسىمۇلىمەن بىرلەسىپ «قۇنانباي قاجى اتىنداعى الاش اۋدارماشىلار وداعى» قوعامدىق قورىن قۇرعانىن مالىمدەدى.

جانە وسى شىعارماشىلىق كەزدەسۋگە قاتىسۋشىلارعا ەرىك قايراتبەكۇلى اتالعان قوردى قۇرۋداعى ماقساتىن كەڭىنەن ءتۇسىندىرىپ ءوتتى.

وسى كەزدەسۋدە تالانتتى اقىن ءوز اۋدارمالارىن ورىس جانە قازاق تىلدەرىندە وقىدى. وقىدى دەيتىن سەبەبىمىز، ەرىك پوليگلوت اۋدارماشى بولعاندىقتان، كوزىمىز ۇيرەنگەن ورىس ءتىلىن بىلاي قويعاندا، قىرعىز، ازەربايجان، تۇركىمەن، وزبەك جانە تۇرىك پەن اعىلشىن تىلدەرىنەن تىكەلەي اۋدارما جاسايدى. بۇعان دالەل رەتىندە كەزىندە ەرىك وقىعان ۋنيۆەرسيتەتتە ورىس ءتىلى مەن ادەبيەتىنەن ساباق بەرگەن رۋحتاس ءارى ولەڭ مەن ونەردەگى جاناشىر اپايى ەۆگەنيا ستانيسلاۆوۆنا رىبچەنكو-دەميانەنكو ءوز شاكىرتىنىڭ اۆتورلىق اۋدارماسىنداعى ءتول تۋىندىسىن وقىپ بەرىپ، وعان تەرەڭ ادەبي تالداۋ جاسادى.

قاتىسۋشىلار وتىنۋىمەن ساحناعا شىققان اۋدارماشى اقىن ەرتەرەك جانە كەيىنگى جازعان ولەڭدەرىن وقىپ، جاس تالاپ اقىنداردىڭ قويعان ءار قيلى سۇراقتارىنا جاۋاپ بەردى. كەزدەسۋ قىزا ءتۇسىپ، N 36 جانە 22 مەكتەپتىڭ ولەڭگە بەيىمى بار وقۋشىلارى ءوز شىعارماشىلىقتارىن ساحنا تورىنەن پاش ەتتى.

ەرىك قايراتبەكۇلى مەن بەلگىلى ادەبيەتتانۋشى، Abai.kz پورتالىنىڭ اباي وبلىسى بويىنشا وكىلى ءابىل-سەرىك ابىلقاسىمۇلدارى ءوز كىتاپتارىن مۋزەيگە سىيعا تارتتى.

سانا سارسەمبەكوۆا،

«ف.م.دوستوەۆسكي» اتىنداعى ادەبي-مەموريالدىق مۋزەيىنىڭ ەكسكۋرسيالىق-كوپشىلىك جۇمىسى سەكتورىنىڭ مەڭگەرۋشىسى

Abai.kz